އިންޑިއާގެ ދެ ހެލިކޮޕްޓަރާއި ޑޯނިއާ މަތިންދާބޯޓު ދުއްވަން ރާއްޖޭގައި މިހާރު ތިބީ އިންޑިއާގެ މަދަނީ މީހުން ކަން ކަށަވަރުވާ ކަމަށް ޑިފެންސް މިނިސްޓަރު ޣައްސާން މައުމޫން ވިދާޅުވެއްޖެ އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ޣައްސާން ވިދާޅުވީ ރާއްޖޭގައި މިހާރު ތިބި ސިވިލިއަނުން ޖަވާބުދާރީވާން ޖެހޭނީ އިންޑިއާ އަސްކަރިއްޔާއަށް ނޫން ކަމަށާއ އެމީހުން ޖަވާބުދާރީ ވާނީ މިނިސްޓްރީ އޮފް ޑިފެންސާއި އެމްއެންޑީއެފްއަށް ކަމަށެވެ.
"އަޅުގަނޑުމެން އެމީހުންގެ ޕާސްޕޯޓުތަކާއި އެމީހުންގެ ވަނަވަރުތައް ބަލާފައި، އަޅުގަނޑުމެންނަށް އެއީ ސިވިލިއަނުންކަން މިއަދު ދިވެހި ރައްޔިތުންނަށް ދެންނެވޭނެ،" ޣައްސާން ވިދާޅުވި އެވެ.
ފޮރިން މިނިސްޓަރު މޫސާ ޒަމީރު ވިދާޅުވީ އަސްކަރީ މީހުން ވެސް އިންޑިއާއަށް ރާއްޖެއަށް ފޮނުވީ އޮޅުވާލައިގެން ނޫން ކަމަށާއި ސިފައިން ފޮނުވީ އެއްބަސްވުމެއްގެ ދަށުން ކަމަށެވެ.
ރާއްޖޭގައި މިހާރު ތިބީ އިންޑިއާގެ 76 މަދަނީން ކަމަށާއި އެއީ ސ. ގަމުގައި 26 މީހުން، ހދ. ހަނިމާދޫގައި 25 މީހުން އަދި ލ. ކައްދޫގައި 25 މީހުން ކަމަށް ޒަމީރު ވިދާޅުވި އެވެ.
ރާއްޖޭގައި މަދަނީންގެ ތެރެއިން ލ. ކައްދޫ އާއި ސ. ގަމުގައި ތިބި ސިވިލިއަނުންގެ މުއްދަތު ހަމަވާނީ ފެބްރުއަރީ، 2025 ގައި ކަމަށާއި، އަދި ހދ. ހަނިމާދޫގައި ތިބި ސިވިލިއަނުންގެ މުއްދަތު ހަމަވާނީ ފެބްރުއަރީ، 2026، ގައި ކަމަށެވެ.
ސަރުކާރުން ބުނީ ރާއްޖޭގައި ތިބި އިންޑިއާ 76 ސިފައިން މޭއި، 9 ގައި ރާއްޖެއިން ފައިބައިފާ ކަމަށެވެ. އަދި އޭގެ ކޮންމެ ސިފައިންގެ މީހަކަށް ސިވިލިއަނެއް އަނބުރާ ގެނެސްފައިވާ ކަމަށެވެ.
