ދުނިޔޭގެ އުތުރު އަދި ދެކުނު ބިތުގެ އެންމެ ފާހަގަކޮށްލެވޭ އެއް ސިފައަކީ ރޭ ގަނޑުގެ އުޑުން ފެންނަ ކުލަވަރުތައް ނުވަތަ އަރޯރާތަކެވެ.
އުތުރުން އައިސްލޭންޑް، ނޯވޭ، ސްވިޑެން އަދި ފިންލޭންޑް ފަދަ އެންމެ އުތުރުގައި ހުންނަ ގައުމަތަކަށް މި އަލިތައް އާންމު ގޮތެއްގައި ފެންނައިރު ދެކުނުން އަލިތައް އެންމެ ގިނައިން ފެންނާނީ އެންޓާޓިކާއަށެވެ. އަދި މަދުން ނަމަވެސް ނިއުޒިލޭންޑަށް އެ އަލިތަކެއް ފެނެ އެވެ.
ދުނިޔެއާ ދިމާލަށް އިރުން ފޮނުވާ ރާޅުތަކުގައި ހިމެނޭ އަޔަންތަކުގެ ތެރެއިން ބޮޑު ބައެއް ދުނިޔޭގެ މެގްނެޓިކް ފީލްޑުގައި ޖެހި ޖައްވުގެ ތެރެއަށް ބުރައިގެންދެ އެވެ. އިރުގެ ވަރުގަދަ ހަމަލާތަކުން ދުނިޔެ ދިފާއު ކުރާނެ މެގްނެޓިކް ފީލްޑެއް ނެތްނަމަ މި ރާޅުތަކުން ދުނިޔެ އަދި ދުނިޔޭގެ ދިރުމަށް ބޮޑެތި ގެއްލުންތަކެއް ވާނެ އެވެ.
މި އަލިތައް އުފެދެނީ އިރުން ބޭރުވާ އަޔަންސްގެ ރާޅުތައް ނުވަތަ ސޯލާ ވިންޑުގެ ތެރެއިން މެގްނަޓިކް ފީލްޑުގައި ޖެހި ދުނިޔޭގެ ދެ ޕޯލް ހިމެނޭ ސަރަހައްދުގައި ތާށިވާ އަޔަންތަކާއި ދުނިޔޭގެ ޖައްވުގައި ހުންނަ އޮކްސިޖަން އަދި ނައިޓްރޮޖަން ގޭސްތަކާ ޖެހި ހިނގާ ކެމިކަލް ރިއެކްޝަންގެ ސަބަބުންނެވެ.
އާންމުކޮށް އަރޯރާ ނުފެންނަ ޖަރުމަނުގެ އުޑުމަތި ދިއްލާލާފަ - ފޮޓޯ: ގެޓީ
މި ހަފުތާގައި ދުނިޔެއަށް މި އަލިތައް އާދަޔާ ހިލާފު ބޮޑަށް ފެނެ އެވެ. ސަބަބަކީ އާދަޔާ ހިލާފު ސޯލާ ސްޓޯމް ނުވަތަ ތޫފަނެކެވެ. މިއީ މި ދަހަރުގައި ދުނިޔެ ދެކޭ އެންމެ ވަރުގަދަ ސޯލާ ތޫފާނެވެ. އެމެރިކާގެ ސްޕޭސް ވެދާ ޕްރެޑިކްޝަން ސެންޓަރުން މި ތޫފާން މިނާފައިވަނީ ލެވެލް ފަހެއްފެ ތޫފާނެއްގެ ގޮތުގަ އެވެ. އެންމެ ފަހުން އެެ ލެވެލްގެ ތޫފާނެއް އިރުން ފޮނުވާލާފައިވަނީ 2003 ގަ އެވެ.
ޖީޕީއެސް، ކަރަންޓު ވިއުގަތައް އަދި މުއާސަލާތީ ނިޒާމުތަކަށް ބުރޫއެރުމުގެ ނުރައްކާ އޮތް ނަމަވެސް މި ތޫފާނާއެކު ދުނިޔޭގެ އުތުރު އަދި ދެކުނު ބިތުން ފެށިގެން މެދު ދުނިޔޭގެ ބައެއް ގައުމުތަކަށް ވެސް މި ވަނީ އާދަޔާ ހިލާފު ތަޖުރިބާއެއް ކޮށްލުމުގެ ފުރުސަތު ލިބިފަ އެވެ.
ދެކުނުން މުޅި ނިއުޒިލޭންޑަށް އަދި އުތުރުން އެމެރިކާގެ ބޮޑު ބަޔަކަށާއި ޖަރުމަނު ފަދަ ޔޫރަޕުގެ ގިނަ ގައުމުތަކަށް ވެސް ރޭ ވަނީ އަރޯރާ ފެނިފަ އެވެ. އެ ގައުމުތަކުގެ އުޑުމަތި ވަނީ މީގެ ކުރިން ނުދެކޭ ކުލަތަކަކުން ދިއްލާލައިފަ އެވެ.
އާންމުކޮށް ނޮދާން ލައިޓްސް ފެންނަ ގައުމުތަކަށް ވެސް ރޭ ފެނުނު ކުލަތައް ގަދަވެފައި ތަފާތު ކަމަށް ގިނަ ބަޔަކު ދަނީ ސޯޝަލް މީޑިއާގައި ބުނަމުންނެވެ. މި އަލިތައް ފެންނަ އެތައް ފޮޓޯތަކަކާއި ވީޑިއޯތަކެއް ސޯޝަލް މީޑިއާގައި ދަނީ ދައުރުވަމުންނެވެ.
އިރުން ހަކަތަ އުފައްދާ މިންވަރު ނުވަތަ އިރުގެ އެކްޓިވިޓީ މަތިވެ ދަށް ވަނީ 11 އަހަރުގެ ސައިކަލް އަކުންނެވެ. ނާސާއިން ބުނާ ގޮތުގައި މި އަހަރަކީ އެގޮތަށް އިރުގެ ހަރަކާތްތައް އެންމެ މަތީގައި ހުންނާނެ އަހަރެވެ. މި ސަބަބާއެކު މި އަަހަރު ނިމުމާ ހަމައަށް މިފަދަ ސޯލާ ތޫފާންތައް ކުރިމަތިވާނެ ކަމަށް ލަފާކުރެވެ އެވެ.
