ރައްޔިތުންގެ މަޖިލީހަށް މެންބަރުން ހޮވަން މިއަދު ކުރިއަށް ގެންދާ އިންތިހާބަކީ ރާއްޖޭގައި މިފަހުން ބޭއްވި އެންމެ ސުލްހަވެރި އިންތިހާބަށް ވެދާނެ ކަމަށް ބެލެވިއްޖެ އެވެ.
މިއަދުގެ އިންތިހާބުގައި ހަމަނުޖެހުމެއް ރިޕޯޓްކުރިތޯ ނުވަތަ ބަލަން "އަދަދު" އިން ދެފަހަރެއްގެ މަތިން އިލެކްޝަންސް ކޮމިޝަން (އީސީ) ގެ އޮފިޝަލުންނާ ސުވާލުކުރި އިރު، އެފަދަ އެއްވެސް ކަމެއް ރިޕޯޓްކޮށްފައި ނުވާ ކަމަށް އެކޮމިޝަނުން ބުންޏެވެ.
އެގޮތުން މިއަދު މެންދުރުފަހު، ފުރަތަމަ މައުލޫމާތު ހޯދި އިރު އީސީގެ މެމްބަރު އަދި ތަރުޖަމާނު ހަސަން ޒަކަރިއްޔާ ވިދާޅުވީ އެހައިތަނަށް ހުށަހެޅީ ކުދިކުދި ޝަކުވާތައް ކަމަށާއި ބޮޑު މައްސަލައެއް ރިޕޯޓްކޮށްފައި ނުވާ ކަމަށެވެ. އެ ކޮމިޝަންގެ ކޮމްޕްލެއިންސް ބިއުރޯއަށް މިހައިތަނަށް ލިބިފައި ވަނީ ވޯޓުލައި ނިމިގެން ޕޯލިން ސްޓޭޝަނުގައި މަޑުކުރުމާއި މީހުންނާ ސަލާމް ކުރުން ފަދަ ކަންތައްތަކުގެ ޝަކުވާތައް ކަމަށެވެ.
"އަނެއްހެން މޭޖާ، މާ ބޮޑު ކަމެއް ނެތް ފާހަގަކުރެވިފައެއް މިވަގުތާ ހަމައަށް، ޝަކުވާގެ ގޮތުގައެއް. ދެން ވޯޓު ކަރުދާސް ދެއްކުމުގެ ޝަކުވާތަކެއް އެބަ އުޅޭ އެއީ ފައްނުޖަހައި ފޮށްޓަށް ލާކަމުގެ ޝަކުވާ،" ހަސަން ވިދާޅުވި އެވެ.
ވޯޓުކަރުދާސް ދެއްކިކަމުގެ ތުހުމަތަށް ދެމީހަކު ހައްޔަރުކުރި ކަމަށް ފުލުހުން ބުންޏެވެ.
ވޯޓުލާ ވަގުތު ނިމި ފޮށިތައް ބަންދުކުރި ފަހުން ދެވަނަ ފަހަރަށް މައުލޫމާތު ދެއްވި އިރު ވެސް އީސީން ހަސަން ޒަކަރިއްޔާ ވިދާޅުވީ ބޮޑު ޝަކުވާއެއް ލިބިފައި ނުވާ ކަމަށާއި ހަމަނުޖެހުމެއް ވެސް ރިޕޯޓްކޮށްފައި ނުވާ ކަމަށެވެ.
"މީހުން ކޮންމެވެސް ވަރަކަށް ރުޅިއައިސްގެން އުޅުނު، ޕޯލިން ސްޓޭޝަނަކުން ނުކުންނަން ހުރި ދެ ގޭޓެއްގެ ތެރެއިން އެއް ގޭޓް ބަންދުކުރުމާ ގުޅިގެން، އެނޫނީ އެފަދަ ކަމެއް ވެސް ރިޕޯޓްކޮށްފައެއް ނެތް،" އޭނާ ވިދާޅުވި އެވެ.
ވޯޓުލާން ނުކުތް މީހުންގެ އަދަދު ވެސް މަދު
މިއަދުގެ އިންތިހާބުގައި ވޯޓު ފޮށިތައް ބަންދުކުރަން ފެށިއިރު, ވޯޓުލާން ނިކުތީ ވޯޓުލުމުގެ ހައްގު ލިބިފައިވާ މީހުންގެ ތެރެއިން އެންމެ 73 ޕަސަންޓު މީހުންނެވެ.
އެހެންކަމުން މިއީ ގިނަ ޕާޓީ ހިމެނޭ ގޮތަށް ރައްޔިތުންގެ މަޖިލީހުގެ އިންތިހާބު ބާއްވަން ފެށި ފަހުން އެންމެ މަދުން މީހުން ވޯޓުލާން ނުކުތް އިންތިހާބަށް ވެދާނެ އެވެ. ނަމަވެސް ފޮށިތައް އެއްކޮށް ބަންދުކޮށް އަދި ނުނިމެ އެވެ.
ވޯޓު ފޮށިތައް ބަންދުކުރަން ފެށީ ހަވީރު 5:30 ގަ އެވެ. އެ ވަގުތާ ހަމައަށް 73 ޕަސަންޓު މީހުން ވޯޓުލީއިރު, ބައެއް ފޮށިތަކުގެ ކިއޫގައި މީހުން އަދިވެސް އެބަ ތިއްބެވެ. އެއީ ގާތްގަނޑަކަށް 208،942 މީހުންނެވެ.
އިލެކްޝަންސް ކޮމިޝަނުން ބުނާ ގޮތުގައި 5:30 ގެ ކުރިން ވޯޓުލާން ކިއޫއަށް އަރާ މީހުންނަށް, އެ ކިއޫގައި ތިބި މީހުން ވޯޓުލާ ނިމެންދެން ފުރުސަތު އޮންނާނެ އެވެ. އަދި އެ ވަގުތަށްފަހު އިތުރަށް ކިއޫއަކަށް ނޭރޭނެ ކަމަށް ވެސް އެ ކޮމިޝަނުން ބުނެ އެވެ.
ފެހި ގާނޫނު އަސާސިގެ ފަހުން 2009 ގައި ބޭއްވި އިންތިހާބުގައި ޓާންއައުޓް ހުރީ 78 ޕަސެންޓުގަ އެވެ. 2014 ގައި ވެސް 78 ޕަސެންޓުގައި ހުރިއިރު 2019 ގައި އެ އަދަދު 81 ޕަސެންޓަށް އިތުރުވި އެވެ.
އެހެންކަމުން, މިފަހަރުގެ އިންތިހާބު މިއީ އެންމެ މަދުން ވޯޓުލާން މީހުން ނިކުތް އިންތިހާބެވެ.
ރައްޔިތުންގެ މަޖިލީހުގެ އިންތިހާބުގައި 93 ގޮނޑިއަށް މީހުން އިންތިހާބު ކުރާނެ އެވެ. މި އިންތިހާބުގައި 369 ކެންޑިޑޭޓުން ވާދަ ކުރެ އެވެ. އަދި ވޯޓުލުމުގެ ހައްގު ލިބޭ މީހުންގެ އާބާދީއަކީ 284،663 އެވެ.
މީގެ ކުރިން 2009 ގައި ބޭއްވި ރައްޔިތުންގެ މަޖިލީހުގެ އިންތިހާބުގައި 166،105 މީހުން ވޯޓުލި އެވެ. އެއީ ވޯޓުލާން ހައްގު އޮންނަ އާބާދީގެ 78.15 ޕަސެންޓު މީހުންނެވެ. އޭގެ ފަހުން 2014 ވަނަ އަހަރުގެ އިންތިހާބުގައި ވޯޓު ދިނީ 189،642 މީހުންނެވެ. އެއީ ހައްގު ލިބުނު މީހުންގެ ތެރެއިން 78.80 ޕަސެންޓު މީހުންނެވެ. ދެން 2019 ވަނަ އަހަރު ވޯޓު ދިނީ 215،053 މީހުންނެވެ. އެއީ ވޯޓު ދިނުމުގެ ހައްގު ލިބުނު މީހުންގެ ތެރެއިން 81.3 ޕަސެންޓު މީހުންނެވެ.
