ރައްޔިތުންގެ މަޖިލީހުގެ މެމްބަރުން އިންތިހާބުވެ ތަމްސީލުކުރައްވާ ޕާޓީން ވަކިވެއްޖެ ނަމަ އިސްތިއުފާ ދޭން ޖެހޭ ގޮތަށް ފާސްކުރި ބިލު ތަސްދީގުނުކޮށް ރައީސް ޑރ. މުހައްމަދު މުއިއްޒު މަޑުކުރައްވަނީ މެންބަރުން "ބައްލަވައިގަންނަވަން" ބޭނުންވާތީ ކަމަށް މަޖިލީހުގެ މާފަންނު ހުޅަނގު ދާއިރާގެ މެންބަރު މުހައްމަދު ފަލާހު ތުހުމަތުކުރައްވައިފި އެވެ.
ފަލާހު ނިސްބަތްވާ އަދި ރައްޔިތުންގެ މަޖިލީހުގެ މެޖޯރިޓީ އޮންނަ އެމްޑީޕީއާއި، ޑިމޮކްރެޓްސް މެންބަރުން ހިމެނޭ ގޮތަށް 33 މެންބަރުން ވޯޓުން އެ ބިލު ފާސްކުރީ މި މަހު 1، ގަ އެވެ.
ގާނޫނު އަސާސީގައި އޮންނަނީ ބިލެއް ފާސްކުރާތާ 15 ދުވަހުގެ ތެރޭގައި ތަސްދީގު ކުރުމާ މެދު ރައީސުލްޖުމްހޫރިއްޔާ ގޮތެއް ނިންމަވަން ޖެހޭނެ ކަމަށެވެ.
ގައުމުގައި ހިނގަމުންދާ ބޮޑެތި މައްސަލަތަކަށް ވާހަކަ ދެއްކުމުގެ މަގުސަދުގައި "އަދަދު" ނޫހުން ފެށި "ޑިބޭޓްސް" ޝޯގެ ފުރަތަމަ އެޕިސޯޑުގައި ބައިވެރިވެވަޑައިގެން ފަލާހު ވިދާޅުވީ އިންތިހާބުވާ ޕާޓީ ދޫކޮށްދިޔުމަކީ ރައްޔިތުންގެ އެ ކަމުގައި ކަންބޮޑުވުން އޮތް ކަމެއް ކަމަށެވެ.
ދެ ހަފުތާ ފަހުން އޮންނަ މަޖިލިސް އިންތިހާބުގައި އެމްޑީޕީއަށް މެޖޯރިޓީ ލިބުމުގެ އުންމީދު އެބަ އޮތް ކަމަށާއި، އެހެން ނަމަވެސް އެއާ އެކީ، އިންތިހާބުވާ ފަހުން ސަރުކާރުން އެ މެންބަރަކު "ގަނެގެން" ގެންދިޔުމުގެ ބިރު ވެސް އެބަ އޮތް ކަމަށް އޭނާ ވިދާޅުވި އެވެ.
"ސަރުކާރު އައި އިރު އަޅުގަނޑުމެންގެ ވެސް 60 އެއްހާ މެންބަރުން ތިބި، ދެން ހަމަ ކުއްލިއަކަށް އެއިން 13 ވަރަކަށް މެންބަރުން ސަރުކާރު ހިންގާ ޕީއެންސީއަށް ގޮސްފި، ހަމަ ރިޝްވަތުގެ ހުތުރު އަމަލު ހިންގައިގެން، އެ ނޫން ސަބަބެއް ނެތް، އަޅުގަނޑުމެންގެ ވަރަށް ދުވަސްވީ މެންބަރުން ވެސް ގޮސްފި،" ފަލާހު ވިދާޅުވި އެެވެ.
އެންޓި ޑިފެކްޝަން ގާނޫނަކީ އެމްޑީޕީން ނަވާރަވަނަ މަޖިލީހުގެ އިިންތިހާބުގެ ކެމްޕެއިނަށް ހުށަހެޅި ލެޖިސްލޭޓިވް އެޖެންޑާގެ މެނިފެސްޓޯގައި ވެސް ހިމެނޭ ކަމެކެވެ. އެކަމަކު އެ ޕާޓީން ވެސް އެ ބިލު ހުށަހެޅީ މަޖިލީހުގެ ފަސް އަހަރުގެ ދައުރު ނިމެން ކުޑަ ދުވަސްކޮޅަކަށްވީ ފަހުންނެވެ.
މެމްބަރު ކަމުން ވަކިވާ ހާލަތްތައް ބަޔާންކޮށްފައި ވަނީ އެންޓި ޑިފެކްޝަން ބިލުގެ ތިންވަނަ މާއްދާގަ އެވެ. އެ މާއްދާގައިވާ ގޮތުން މަޖިލީހަށް ޕާޓީ ޓިކެޓެއްގައި ވާދަކޮށް އިންތިހާބުވާ މެމްބަރަކު އަމިއްލަ އަށް ޕާޓީން ވަކިވުން ނުވަތަ ޕާޓީ ބަދަލުކުރުމުން މެމްބަރުކަމުން އަމިއްލައަށް އިސްތިއުފާ ދޭންޖެހޭނެ އެވެ.
ޕާޓީން ވަކިކޮށްފި ހާލަތެއްގައި ހަތް ދުވަހުގެ ތެރޭގައި މެމްބަރަކަށް އެ މައްސަލަ ކޯޓަށް ހުށަހެޅުމުގެ އިހުތިޔާރު ލިބިގެންވާ ކަމަށް ވެސް އެ ބިލުގައި އޮވެ އެވެ. އަދި, ކޯޓުން މެމްބަރަކާ ދެކޮޅަށް މައްސަލަ ނިންމައިފިނަމަ އީސީން މަޖިލީހަށް އެންގުމުން އިސްތިއުފާ ދޭން ޖެހޭނެ ކަމަށް އެބަ އޮތެވެ.
ވަނީ ކޯޓަށް މައްސަލަ ހުށަނާޅާނަމަ އީސީން މަޖިލީހަށް އެންގުމުން މެމްބަރު އިސްތިއުފާ ދޭން ޖެހޭ ކަމަށް ވެސް ބިލުގައި އެބަ އޮތެވެ.
