ހުޅުމާލޭ ފޭސް ދޭއްގައި ފުލުހުން ޖެހި ޗެކްޕޯސްޓެއްގައި ހިނގި ކަންކަމާ ގުޅޭގޮތުން އެތެރޭގެ ތަހުގީގެއް ކުރިއަށްގެންދިޔުމަށް ނިންމާފައިވާކަން ފުލުހުންގެ އިދާރާއިން ހާމަކޮށްފި އެވެ.
އެކްސްގައި ކުރެއްވި ޕޯސްޓެއްގައި އެކަން ހާމަކުރެއްވީ ފުލުހުންގެ ތަރުޖަމާނު އަހުމަދު ޝިފާން އެވެ. ރޭގެ ވަގުތެއްގައި ހިނގި މި ހާދިސާއާ ގުޅިގެން އެކި ތުހުމަތުތައް ފުލުހުންނަށް އަމާޒުވެފައި ވަނިކޮށް އެ ހާދިސާގެ ސީސީޓީވީ ފުޓޭޖު ވެސް ސޯޝަލް މީޑިއާގައި ވަނީ އާންމުވެފަ އެވެ.
"މިއީ ހުޅުމާލެ ފޭސް 2 ގައި ގާއިމުކޮށްފައި ހުރި ވެހިކަލް ޗެކް ޕޮއިންޓަކާއި އަރާ ހަމަވުމުން ސައިކަލު އެކްސެލެރޭޓްކޮށް ޗެކް ޕޮއިންޓްގެ ފަހަތުގައި ތިބި ފުލުހުންގައިން ނައްޓާ ކުރިއަށް ދިއުމަށް އުޅުމުގެ ތެރޭގައި ސައިކަލް ވެއްޓިގެން ހިނގާފައިވާ ހާދިސާއެއް. ސައިކަލްދުއްވާފައިވަނީ ލައިސަންސް ނެތް ފަރާތެއް އަދި ހުޅުމާލެ ހޮސްޕިޓަލުން އަނިޔާވިފަރާތްތަކަށް ފަރުވާ ރޭގައި ދެވުނު," އެކަމާ ގުޅިގެން ފުލުހުންގެ ބަހަކީ މިއީ އެވެ.
އެ ވީޑިއޯއިން ފެންނަ ގޮތުގައި މަގުގެ އެއްފަރާތުގައި ޖަހާފައި ހުރި ޓްރެފިކް ޗެކްޕޯސްޓުގައި ހުރި ފުލުހަކު ސައިކަލަކަށް މަޑުކުރަން އެންގުމުން ޗެކްޕޯސްޓުން ނައްޓާފައި ކުރިއަށްދެ އެވެ. އަދި, އެ ފުލުސް މީހާ ކައިރިން ސައިކަލު ނައްޓާލާ ވަގުތު އަތުގައި އޮތް އެއްޗެއް ސައިކަލު ފަހަތުގައި އިން އަންހެން މީހާގެ ފުރަގަހަށް ވާ ގޮތަށް ހޫރާލާ މަންޒަރު ފެނެ އެވެ.
އޭގެ ފަހުން ފެންނަނީ ސައިކަލު ކަހާލައިގެން ދެ މީހުންނާ އެކު ވެއްޓޭ މަންޒަރެވެ. ނަމަވެސް, އެ ސައިކަލު ވެއްޓެން މެދުވެރިވީ ފުލުސް މީހާ ހޫރާލި އެއްޗެއްގެ ސަބަބުން ކަމެއް ވީޑިއޯއިން ސާފެއް ނުވެ އެވެ.
އެއާއެކު ސޯޝަލް މީޑިއާގައި ބައެއް ފަރާތްތަކުން ވަނީ ސައިކަލު ފަހަތުގައި އިން އަންހެން ކުއްޖާއަށް ފުލުހުން ހަމަލާދީ ވައްޓާލި ކަމަށް ބުނެފަ އެވެ. އެކަމާ ގުޅިގެން ހުޅުމާލޭގައި ހުންނަ ފުލުސް ސްޓޭޝަން ކައިރިއަށް ބަޔަކު ރޭ އެއްވި އެވެ.
