ހުރިހާ ވެސް މައްސަލައަކީ ދައުލަތުގެ ބަޖެޓުން ސިޔާސީ ޕާޓީތަކަށް ފައިސާ ދިނުން ކަމަށް ވިދާޅުވެ އެކަން ހުއްޓާލަން އިލެކްޝަންސް ކޮމިޝަން (އީސީ) ގެ ކުރީގެ ނައިބުރައީސް އިސްމާއިލް ހަބީބު ގޮވާލައްވައިފި އެވެ.
މިހާރު "އަދަދު" އިން ގެނެސްދޭ "އެއްޗެއްކަޅެއް" ޕްރޮގްރާމުގައި ހަބީބު މިހެން ވިދާޅުވީ ސިޔާސީ ޕާޓީތަކުގެ ދަފްތަރުގެ މައްސަލައިގައި ވާހަކަ ދައްކަވަމުންނެވެ.
ރާއްޖޭގައި ސިޔާސީ ޕާޓީތަކަށް ފައިސާ ދޫކުރަނީ އެ ޕާޓީއެއްގައި ތިބޭ މެމްބަރުންގެ އަދަދަށް ބަލައިފަ އެވެ. އެގޮތުން ފައިސާ ދޫކުރަމުން އަންނަނީ 10،000 އަށް ވުރެ ގިނަ މެމްބަރުން ތިބޭ ޕާޓީތަކަށް އެ ޕާޓީއެއްގައި މެމްބަރުން ތިބޭ އަދަދަށެވެ.
މި މައްސަލައިގައި އޭނާ ދެކެވަޑައިގަންނަވާ ގޮތް ހިއްސާކުރައްވަމުން ހަބީބު ވިދާޅުވީ ސިޔާސީ ޕާޓީތަކުގެ ދަފްތަރެއް އޮންނަން ޖެހޭ ކަމަށް ގަބޫލުނުކުރައްވާ ކަމަށެވެ. އަދި މިހެން ފައިސާ ދިނުމުގެ ބަދަލުގައި ސިޔާސީ ޕާޓީތަކުން އެހެން ގޮތްގޮތުން ފައިސާ ހޯދޭނެ ކަމަށް ގަބޫލުކުރައްވާ ކަމަށާއި އެގޮތުން ޕްރޮޖެކްޓު ހިންގައި، ބޭރުގެ އެހީ ހޯދައިގެން ވެސް ޕާޓީތައް ހިންގޭނެ ކަމަށް އޭނާ ވިދާޅުވި އެވެ.
"މިއީ ބޮޑު ސަކަރާތެއްކަހަލަ ކަމެއް. އިންތިހާބެއް އޮންނަ އިރު މިލިއަނުން ހަރަދުކުރާއިރު ޕާޓީތަކުގައި ނުހުރޭ އެހާ ފައިސާއެއް. ފައިސާ ނުދޭ ޕާޓީގެ ކެންޑިޑޭޓު ވެސް އިންތިހާބަށް ބޮޑެތި ހަރަދުކުރާތަން ވެސް ފެނޭ" ހަބީބު ވިދާޅުވި އެވެ.
އޭގެ އިތުރުން ހަބީބު ވިދާޅުވީ ރާއްޖޭގައި އިންތިހާބުގެ ކުރިން ހިނގާ ކަންކަން ރަނގަޅު ކުރަން ޖެހޭ ކަމަށެވެ. އޭނާ ވިދާޅުވީ އިންތިހާބަކަށް ގޮވާލުމުގެ ކުރިން އަދި އިންތިހާބަށް ގޮވާލުމަށްފަހު އެ އޮންނަ 30 ދުވަހުގެ މުއްދަތުގެ ތެރޭގައި އިންތިހާބަށް ނުފޫޒު ފޯރުވުމުގެ ކަންކަން އަބަދުވެސް ހިނގާ ކަމަށާއި އެކަން ބަދަލުވާން ޖެހޭ ކަމަށެވެ. އަދި މިކަން ބޭރުގެ އޮބްޒާވަރުން ހަދާފައި ހުންނަ ރިޕޯޓުތަކާއި ޓްރާންސްޕޭރެންސީ މޯލްޑިވްސްއިން ހެދި ދިރާސާއެއްގައި ވެސް ފާހަގަކޮށްފައިވާ ކަމަށް އޭނާ ވިދާޅުވި އެވެ.
މައްސަލަތައް ހުރި ނަމަވެސް ހަބީބު ވިދާޅުވީ ރާއްޖޭގައި ވޯޓުގެ ކަންކަން ހިނގަމުންދަނީ ދުނިޔޭގެ ފެންވަރުގައި ގުނާލެވޭ ނިޒާމަކުން ކަމަށާއި، ރާއްޖޭގައި އޮންނަ ހާމަކަން ބޮޑު ނިޒާމެއް ދުނިޔޭގެ އެހެން ގިނަ ގައުމުތަކުގައި ނޯންނަ ކަމަށެވެ. އަދި ބައެއް ބަދަލުތަކާ އެކީ މިހާރަށް ވުރެ ވެސް އިންތިހާބުތަކުގެ ފެންވަރު ރަނގަޅު ކުރެވޭނެ ކަމަށް އޭނާ ވިދާޅުވި އެވެ.
"ރާއްޖޭގައި ބޭއްވޭ އިންތިހާބުތަކަކީ ވަރަށް ފެންވަރުގައި ބޭއްވޭ އިންތިހާބުތަކެއް. ގާނޫނުތައް އެބަ ޖެހޭ ބަދަލުވާން. ޑިޖިޓަލްކޮށް ކަންކަން ނުކުރެވެނީ ގާނޫނުގައި އޮންނަ ގޮތަށް ބައެއް ފަހަރު ކަންކަން ކުރަން ޖެހޭތީ. އިންތިހާބީ ނިޒާމަށް ވެސް ބަދަލުތައް ގެންނަން ޖެހޭ" ހަބީބު ވިދާޅުވި އެވެ.
އީސީގައި 21 އަހަރު ހިދުމަތް ކުރެއްވުމަށްފަހު ދައުރު ހަމަވުމުން އަންގާރަ ދުވަހު ކޮމިޝަނުން ވަކިވެވަޑައިގެންނެވި ހަބީބު ވިދާޅުވީ ފާއިތުވި 21 އަހަރު އީސީގައި މަސައްކަތްކުރެއްވީ ނަޒާހަތްތެރިކަމާއެކުކަން ވަރަށް ފޮނިކޮށް ބުނެވޭނެ ކަމަށެވެ. އެގޮތުން ހަބީބު ވިދާޅުވީ ސިޔާސީ މީހުންނާއި މަޖިލިސް މެމްބަރުންނާ އޮތީ އެއް ފެންވަރެއްގެ ގުޅުމެއް ކަމަށާއި، އެ މުއްދަތުގައި އެއްވެސް ސިޔާސީ ޕާޓީއެއްގެ ދަފްތަރުގައި ވެސް ހިމެނިފައި ނުވާނެ ކަމަށެވެ.
ކުރިމަގާ ގުޅޭގޮތުން ހަބީބު ވިދާޅުވީ ޕޯޑިއަމްތަކަށް އަރައި މީހުންނަށް އެއްޗެހި ކިޔާކަހަލަ ވަޒީފާއަކަށް ގޮސްދާނެ ކަމަށް ހިތް ނުބުނާ ކަމަށާއި، އީސީގެ ނަޒާހަތްތެރިކަން އަދި އަމިއްލަ މީހާގެ ނަޒާހަތްތެރިކަމާމެދު ސުވާލު އުފެދޭ ވަޒީފާއަކަށް ނުދާނެ ކަމަށެވެ. މީގެ އިތުރުން ރާއްޖޭގެ އިންތިހާބުތައް ހިނގައިދިޔަ ގޮތުގެ ދިރާސާއެއް ހަދަން މިހާރު ފަށްޓަވާފައިވާ ކަމަށާއި، އެކަން ފުރިހަމަ ކުރުމަށް މިހާރު އަޒުމް ކަނޑައަޅައިގެން ހުންނެވި ކަމަށް އޭނާ ވިދާޅުވި އެވެ.
