އިލެކްޝަންސް ކޮމިޝަނުގެ ނައިބު ރައީސް ކަމުގައި ހުންނެވި އިސްމާއިލް ހަބީބުގެ ދައުރު ހަމަވުމުން, އެ މަގާމަށް އެ ކޮމިޝަނުގެ މެމްބަރު އަލީ ނަޝާތު އައްޔަނުކުރަން މިއަދު ބޭއްވި އެ ކޮމިޝަނުގެ އާންމު ޖަލްސާގައި ނިންމައިފި އެވެ.
އީސީގެ އާ ނައިބު ރައީސަށް މަރުހަބާ ދަންނަވައި ހަބީބު ވިދާޅުވި ގޮތުގައި ނަޝާތަކީ އިންތިހާބުތައް ޒަމާނީ ފެންވަރަށް ގެންގޮސް, ޑިޖިޓަލައިޒް ނިޒާމަކަށް އީސީގެ ހިދުމަތްތައް ބަދަލުކޮށް, ހުރިހާ ފަރާތްތަކަށް ފަސޭހަކަމާއެކު ހިދުމަތްތައް ފޯރުކޮށް ދިނުމުގެ ފަންނުވެރި ކަމާއި ގާބިލްކަން ހުރި ނައިބު ރައީސެކެވެ.
ހަބީބުގެ ދައުރު ހަމަވިއިރު, އޭނާއަކީ އީސީގެ ފަރާތުން މީޑިއާއަށް މައުލޫމާތު ދޭން ކަނޑައަޅާފައިވާ މެމްބަރުވެސް މެ އެވެ. އެހެންކަމުން, މިއަދު ބޭއްވި ޖަލްސާގައި އީސީން ވަނީ, އެ ކޮމިޝަނުގެ ފަރާތުން މީޑިއާއަށް މައުލޫމާތު ދޭން, ކޮމިޝަނުގެ ސެކެޓްރީ ޖެނެރަލް ހަސަން ޒަކަރިއްޔާ ހަމަޖައްސާފަ އެވެ.
ނަޝާތު އެންމެ ފުރަތަމަ އީސީއަށް އައްޔަންކޮށްފައިވަނީ ރައީސް އަބްދުﷲ ޔާމީންގެ ވެރިކަމުގައި ޖުލައި 25، 2018 ގައެވެ. ދެވަނަ ދައުރަަކަށް އޭނާ އެ މަގާމަށް އައްޔަނުކުރީ ނޮވެމްބަރު 16, 2023 ގަ އެވެ.
އީސީގެ މެންބަރުންގެ ތެރެއިން ދެން އެންމެ އަވަހަށް ހަމަވާނީ އެ ކޮމިޝަނުގެ ރައީސް ފުއާދު ތައުފީގުގެ ދައުރެވެ. އޭނާ މެމްބަރު ކަމަށް އައްޔަނު ކުރީ ނޮވެމްބަރު 24، 2019 ގަ އެވެ. އާސިފް އައްޔަނު ކުރީ ސެޕްޓެމްބަރު 6، 2021، ގަ އެވެ. ޑރ. ޒާހިރު ފެބްރުއަރީ 21، 2021 ގައި މަގާމަށް އައްޔަނު ކުރިއިރު ދެ ވަނަ ދައުރަކަށް ނަޝާތު އައްޔަނު ކުރީ ނޮވެމްބަރު 16، 2023 ގަ އެވެ.
