ރައްޔިތުންގެ މަޖިލިސް މެމްބަރުންގެ "ދަތްދޮޅި ދުއްވައި ނުލައި" އިބާރާތް ބޭނުންކުރެއްވީ އޭނާއާ ގުޅުވާ އެ ބަސްތައް ބޭނުންކުރާތީ މަޖާޒީކޮށް ކަމަށާއި އެއްވެސް ގޮތަކަށް މާރާމާރީއަށް ހިތްވަރު ދިނުމުގެ ގޮތުން ނޫން ކަމަށް ލޯކަލް ގަވަމަންޓް މިނިސްޓަަރު އާދަމް ޝަރީފު އުމަރު މިއަދު ވިދާޅުވެއްޖެ އެވެ.
އާދަމް ޝަރީފު މި މައްސަލާގައި އެއްޗެއް ވިދާޅުވީ، ދަތްދޮޅި ދުއްވާލާނެ ކަމަށް ދެއްކެވި ވާހަކައިގެ މައްސަލަ ހޫނުވެ މަޖިލީހުގެ އިމްތިޔާޒު ކޮމިޓީއަށް އެ މައްސަލަ ހުށަހަޅުއްވާނެ ކަމަށް ރައްޔިތުންގެ މަޖިލީހުގެ ރައީސް، މުހައްމަދު އަސްލަމް ވިދާޅުވެފައި ވަނިކޮށެވެ. މި މައްސަލައިގައި މަޖިލިސްގެ އެހެން މެމްބަރުންނާއި އިދިކޮޅު ދެ ޕާޓީ، އެމްޑީޕީ އަދި ޑިމޮކްރެޓްސްއިންނާއި ބައެއް އާންމުން ވެސް ކަންބޮޑުވުން ފާޅުކޮށް، މިނިސްޓަރަށް ފާޑުކިޔާފައިވެ އެވެ.
މިކަމާ ގުޅޭގޮތުން އެކްސްގައި ކުރެއްވި ޕޯސްޓުގައި އާދަމް ޝަރީފު ވިދާޅުވީ "ދަތްދޮޅި" އެ ބަސް ބޭނުންކުރެއްވީ އެއްގޮތަކަށް ވެސް މާރާމާރީއަށް ހިތްވަރު ދިނުމުގެ ބޭނުމުގައި ނޫން ކަމަށެވެ.
"އަޅުގަނޑާ ގުޅުވައިގެން ކިޔާ އެއްޗަކަށް ވާތީ، ހިއުމާއަށް، މެޓަފޯއަކަށް ބޭނުން ކުރެވުނީ. އެހެން ގޮތަކަށް ވިސްނިވަޑައިގަންނަވާ ނަމަ މައާފަށް އެދެން" އޭނާގެ ޕޯސްޓުގައި ލިޔުއްވާފައިވެ އެވެ.
ރައީސް ޑރ. މުހައްމަދު މުއިއްޒުއާ އެކީ އަތޮޅުތެރެއަށް ވަޑައިގެން އުޅުއްވާ އާދަމް ޝަރީފު މި ވާހަކަ ދެއްކެވީ މ. ދިއްގަރުގައި އިއްޔެ ބޭއްވި ޖަލްސާއެއްގަ އެވެ. އޭނާ މި އިބާރާތްތައް ބޭނުންކުރެއްވީ ރައީސް މުއިއްޒުގެ ގާނޫނީ ޒިންމާ އަދާ ކުރެއްވުމަށް އޮތް އެންމެ ބޮޑު ހުރަހަކީ މަޖިލިސް ކަމަށް ވިދާޅުވަމުންނެވެ.
"އެކަމަކު އަޅުގަނޑު ހަމަ ހިތަށް އަރާ ހަމަ ހަގީގަތުގައި ވެސް އަޅުގަނޑު އެތަނުގައި މިއަދުވެސް ހުންނަ ނަމަ އެއިން މީހެއްގެ ދަތްދޮޅި ދުއްވާނުލައި ހުރެވޭނެބާއޭ،" އޭނާ އެވެ.
މި މައްސަލަ އިމްތިޔާޒު ކޮމިޓީއަށް ހުށަހަޅަން ނިންމެވައި އަސްލަމް "އަދަދު" އަށް ވިދާޅުވީ މަޖިލިސް މެމްބަރުކަން ކުރައްވާފައި ހުންނެވި ބޭފުޅަކު މަޖިލިސް މެމްބަރުންނާ ގުޅޭގޮތުން އާންމުންގެ ކުރިމަތީގައި ވާހަކަ ދެއްކެވުމަކީ ވަރަށް ޒިންމާދާރުކަން ކުޑަކޮށް ކުރި ކަމެއް ކަމަށެވެ.
"އެއީ މުޅި މަޖިލީހުގެ އިމްތިޔާޒަށް އަރައިގަތުން، އަދި ދައުލަތުގެ އެފަދަ މަގާމެއްގައި ހުރެފައި މާރާމާރީއަށް ހިތްވަރުދެވޭ ގޮތަށް ވާހަކަދެެއްކުމަކީ ވަރަށް ނުރައްކާތެރިކަމެއް،" އޭނާ ވިދާޅުވި އެވެ.
އާދަމް ޝަރީފް މި މޭރުމުން ވާހަކަ ދެއްކެވި މިއީ ފުރަތަމަ ފަހަރެއް ނޫނެވެ.
މީގެ ކުރިން ޕީޕީއެމްގެ ފުރަތަމަ ވެރިކަމުގައި، ޑިފެންސް މިނިސްޓަރެއްގެ ގޮތުގައި ޝަރީފް ހުންނެވިއިރު، ސިފައިންގެ އެތެރޭގެ ޖަލްސާއެއްގައި ވާހަކަ ދައްކަވަމުން މަޖިލިސް މެމްބަރެއްގެ ދަތްދޮޅި ދުއްވާލެވިދާނެ ކަމަށް ވިދާޅުވެ ވާހަކަދެއްކެވި އެވެ. އެ ވާހަކައާ ގުޅިގެން އޭރު ޝަރީފް ވަރަށް ބޮޑަށް ހޫނުފެނަށް ވެއްޓުނެވެ. އޭނާ އެ ވިދާޅުވާ ގޮތަށް އޭނާއަށް ނިސްބަތްކޮށް "ދަތްދޮޅި" ބޭނުންކުރަން ފެށީ މި ދުވަސްވަރެވެ.
އޭގެފަހުން 2022 ވަނަ އަހަރު ޕީޕީއެމްގެ ކެމްޕޭނު ހަރަކާތެއްގައި ވާހަކަދައްކަވަމުން ވެސް މަޖިލިސް މެންބަރުންގެ ދަތްދޮޅި ދުއްވާނުލައި ނުހުރެވޭނެ ކަމަށް އާދަމް ޝަރީފު ވިދާޅުވެފައިވެ އެވެ.
