ކުރީގެ ރައީސް އަބްދުﷲ ޔާމީން އިސްވެ ހުންނަވައިގެން އުފައްދަވާ ޕީޕަލްސް ނެޝަނަލް ފްރޮންޓް (ޕީއެންއެފް) އުފެއްދުމަށް ބޭނުންވާ 3،000 ފޯމު އިލެކްޝަންސް ކޮމިޝަން (އީސީ) އަށް ހުށަހަޅައިފި އެވެ.
އެ ކޮމިޝަނުގެ ނައިބުރައީސް އިސްމާއިލް ހަބީބު ވިދާޅުވީ ސިޔާސީ ޕާޓީގެ ގާނޫނުގައި ބަޔާންކުުރާ މުއްދަތުގައި ޕީއެންއެފް ރަޖިސްޓްރީ ކުރުމަށް 3،060 ފޯމު އެ ކޮމިޝަނަށް ހުށަހަޅާފައިވާ ކަމަށެވެ.
ކޮމިޝަނުން ވަނީ އެ ފޯމުތަކުގެ ސައްހަކަން ކަށަވަރު ކުރުމުގެ މަސައްކަތް ފަށާފައިވާ ކަމަށާއި ލަސްނުވެ ޕީއެންއެފް އުފެއްދުމަށް ޖަލްސާ ބޭއްވުމަށް ހުއްދަ ދޭނެ ކަމަށް ހަބީބް ވިދާޅުވި އެވެ.
ޕީއެންއެފް އުފެއްދުމުގެ ހުއްދަ އީސީން ދީފައި ވަނީ ޔާމީންގެ ދަރިކަލުން ޒެއިން އަބްދުﷲ ޔާމީނަށް މިދިޔަ އަހަރުގެ ނޮވެމްބަރު 29، ގަ އެވެ.
ޕީއެންއެފް އުފެއްދުމުގެ ކުރިން ޔާމީނު ހުންނެވީ ޕީޕީއެމް/ޕީއެންސީގެ ލީޑަރުކަމުގަ އެވެ. އެ ޕާޓީއާ ދުރަށް ޖެހިވަޑައިގަތީ ރިޔާސީ އިންތިހާބާ ހަމައިން ރައީސް ޑރ. މުހައްމަދު މުއިއްޒު އާއި އެމަނިކުފާނާ ދެމެދު ގުޅުން ހީނަރުވުމުންނެވެ.
