ފުލުހުންގެ ތަރުޖަމާނަކަށް އަނެއްކާ ވެސް ޗީފް ސުޕްރިންޓެންޑެންޓް އޮފް ޕޮލިސް އަހްމަދު ޝިފާން އައްޔަނުކޮށްފި އެވެ.
ތަރުޖަމާނަކަށް އައްޔަނުކުރި އިރު ޝިފާން ހުންނެވީ އޮފީސް އޮފް ދަ ކޮމިޝަނާގެ ހެޑްގެ މަގާމުގަ އެވެ. ފުލުހުން ބުނި ގޮތުގައި އޭނާއަށް ތަރުޖަމާނުގެ މަސްއޫލިއްޔަތު ހަވާލުކުރީ މިހާރު އަދާކުރައްވަމުންދާ މަގާމުގެ މަސްއޫލިއްޔަތުތަކުގެ އިތުރަށެވެ.
ހެޑް އޮފް އޮފީސް އޮފް ކޮމިޝަނަރު މަގާމުގައި ހުންނަ ބޭފުޅެއްގެ ޒިންމާއަކީ ފުލުހުންގެ ސްޓްރެޓެޖިކް ޕޮލިސީތައް އެކުލަވާލައި ތަންފީޒުކުރުމާއި، ސްޓްރެޓެޖިކް ކޮމިއުނިކޭޝަންގެ ޒިންމާ އަދާކުރުމުގެ އިތުރުން ފުލުހުންގެ އިދާރީ ކަންކަން ވެސް ހިންގުމުގެ އެންމެ އިސް ދައުރު އަދާކުރުމެވެ.
ޝިފާނަކީ އޮސްޓްރޭލިޔާއިން ތައުލީމު ހާސިލު ކުރެއްވުމުގެ އިތުރުން ދުނިޔޭގެ އެހެން ބައެއް ގައުމުތަކުގެ ޕޮލިސް ކޮލެޖުތަކުން ތަމްރީނުވެފައިވާ ބޭފުޅެކެވެ.
ރައީސް ޔާމީންގެ ވެރިކަމުގައި ޝިފާނު ހުންނެވީ ޑްރަގް އެންފޯސްމެންޓް ޑިޕާޓްމެންޓުގެ ވެރިޔަކަށެވެ. އޭރު އޭނާ ވަނީ ފުލުހުންގެ ތަރުޖަމާނުގެ މަގާމު ވެސް ފުރުއްވާފަ އެވެ.
