ކުރިޔަށް އޮތް ރައްޔިތުންގެ މަޖިލީހުގެ އިންތިހާބުގައި ވާދަކުރާ ކެންޑިޑޭޓުންގެ މަންދޫބުން އައްޔަނު ކުރުމުގެ ފުރުސަތު އިލެކްޝަންސް ކޮމިޝަން (އީސީ) އިން ހުޅުވާލައިފި އެވެ.
އީސީގެ ނައިބްރައީސް އިސްމާއިލް ހަބީބު ވިދާޅުވީ، ކެންޑިޑޭޓުންގެ މަސްލަހަތު ހިމެނޭ ކޮންމެ މަރުކަޒަކަށް ޝަރުތު ހަމަވާ އެއް މަންދޫބަކު އައްޔަނު ކުރުމުގެ ފުރުސަތު ފެބްރުއަރީ، 24 ވަނަ ދުވަހުގެ 15:00 ޖެހުމާ ހަމައަށް ހުޅުވާލާފައިވާ ކަމަށެވެ.
މަންދޫބުންގެ ފޯމު ބަލައިގަންނާނީ އީމެއިލް މެދުވެރިކޮށް ނުވަތަ ދަރުބާރުގޭގައި ހުންނަ އިންތިހާބާ ބެހޭ މަރުކަޒުގެ ރިސެޕްޝަނުން ރަސްމީ ބަންދު ނޫން ކޮންމެ ދުވަހަކު ހެނދުނު 09:00 އިން މެންދުރުފަހު 03:00 އަށް ކަމަށް އީސީން ބުނެ އެވެ.
އީސީން ބުނީ، ރަސްމީ ބަންދު ދުވަސްތަކުގައި ހެނދުނު 09:00 އިން މެންދުރުފަހު 03:00 އަށް އަދި ހުކުރު ދުވަހު މެންދުރުފަހު 03:00 އިން ހަވީރު 05:00 އަށް ފޯމު ބަލައިގަންނާނެ ކަމަށެވެ.
ކެންޑިޑޭޓުންގެ މަންދޫބުންގެ ޝަރުތުތައް:
- 18 އަހަރު ފުރިފައިވާ ދިވެއްސެއް ކަމުގައިވުން.
- ޖިނާއީ ކުށެއްގައި ހުކުމް ތަންފީޒު ކުރަމުންދާ މީހެއް ކަމުގައި ނުވުން.
- އިންތިހާބާ ބެހޭ މަސައްކަތެއް ކުރުމަށް އީސީގެ ފަރާތުން ހަވާލުވެގެން ހުރި މީހަކަށް ނުވުން.
- ފަނޑިޔާރެއް ނުވަތަ މިނިވަން މުއައްސަސާއެއްގެ މެމްބަރަކަށް ނުވުން.
- ސުލޫކީ މިންގަނޑާ ހިލާފުވެގެން ފިޔަވަޅެއް އަޅާފައިވާ މީހަކަށް ނުވުން.
- އިންތިހާބީ ކުށެއް ފާއިތުވީ ފަސް އަހަރު ދުވަހުގެ ތެރޭގައި ސާބިތުވެފައިވާ މީހަކަށް ނުވުން.
މަންދޫބުންނަށް އީސީން ދޫކުރާނީ ޑިޖިޓަލް ފާހެއްކަން ފާހަގަކުރައްވާ ހަބީބު ވިދާޅުވީ، އީސީން ކުރިޔަށް ގެންދާ މައުލޫމާތު ސެޝަން މަންދޫބުން ފުރިހަމަ ކުރަން ޖެހޭނެ ކަމަށެވެ.
މީގެއިތުރުން މަންދޫބަކަށް ވުމަށް ފޯމު ހުށަހެޅުމަށްފަހު، 3004459 ނަމްބަރަށް ގުޅުމަށްފަހު މެއިލް އީސީއަށް ލިބިފައިވާކަން ކަށަވަރު ކުރަން ޖެހޭނެ ކަމަށްވެސް ހަބީބް ވަނީ ވިދާޅުވެފަ އެވެ.
މަންދޫބުންގެ ފޯމު މެއިލްކުރާނީ އީސީގެ omc@elections.gov.mv މެއިލްއަށް ކަމަށާއި، އެޕްލިކޭޝަން އީސީގެ ވެބްސައިޓް އިން ލިބޭނެ ކަމަށް އެ ކޮމިޝަނުން ބުނެ އެވެ.
