ކުރިއަށް އޮތް ރައްޔިތުންގެ މަޖިލީސް އިންތިހާބުގައި ވޯޓުފޮށި ބަހައްޓާނީ ރާއްޖެއިން ބޭރު ދެ ގައުމެއްގައިކަން އިލެކްޝަންސް ކޮމިޝަނުން ހާމަކޮށްފި އެވެ.
ބޭރު ގައުމުތަކުގައި ވޯޓު ފޮށި ބެހެއްޓުމަށް އިލެކްޝަންސް ކޮމިޝަނުން ކަނޑައަޅާފައި ވަނީ 150 އަށްވުރެ ގިނަ މީހުން ރީ-ރެޖިސްޓަރީ ކުރާ ގައުމުތަކުގައި އެކަންޏެވެ. ރީ-ރެޖިސްޓްރޭޝަންގެ މުއްދަތު ހަމަވިއިރު، އެ އަދަދަށް ރީ-ރެޖިސްޓަރީ ކޮށްފައި ވަނީ ހަމައެކަނި މެލޭޝިޔާ އާއި ސްރީލަންކާއިންނެވެ.
އެހެންކަމުން އިލެކްޝަންސް ކޮމިޝަނުން ވަނީ, ކުރިން ވޯޓުފޮށި ބަހައްޓަން ނިންމާފައިވާ ހަތަރު ގައުމެއްގައި ފޮށި ނުބަހައްޓަން ނިންމާފަ އެވެ.
އިލެކްޝަން ކޮމިޝަނުން ކަނޑައަޅާފައިވާ ސީލިން ހަމަނުވުމުން, އިންޑިއާ, ތައިލެންޑް, އިނގިރޭސިވިލާތް އަދި ޔޫއޭއީގައި ވޯޓުފޮށި ނުބަހައްޓަން ނިންމުމާއެކު އެ ކޮމިޝަނުން ވަނީ އެތަންތަނުގައި ދިރިއުޅޭ ރައްޔިތުން އެހެން ތަނެއްގައި ވޯޓުލާން ރީ-ރަޖިސްޓާ ވުމުގެ ފުރުސަތު ހުޅުވާލާފަ އެވެ.
އީސީން ހުޅުވާލާފައިވާ މުއްދަތުގައި ރީ-ރަޖިސްޓާ ނުކޮށްފިނަމަ, އެމީހުންނަށް ވޯޓުލެވޭނީ ރަށްވެހިވެފައިވާ ރަށުގައި ކަމަށް ވެސް އެ ކޮމިޝަނުން ބުނެ އެވެ.
މީގެ އިތުރުން އީސީން ވަނީ ކުރިން ވޯޓުފޮށި ބަހައްޓަން ނިންމާފައިވާ 17 ރިސޯޓެއްގައި ވެސް ފޮށި ނުބަހައްޓަން ނިންމާފަ އެވެ.
މަޖިލިސް އިންތިހާބު ބޭއްވުމަށް މިހާރު އިލެކްޝަންސް އިން ކަނޑައަޅާފައި ވަނީ މާޗު 17 ގަ އެވެ. ނަމަވެސް ރައްޔިތުންގެ މަޖިލީހުން ވަނީ, އިންތިހާބު ރޯދައިގެ 10 ދުވަސް ފަހުން ބާއްވާ ގޮތަށް ގާނޫނަށް ބަދަލު ގެނެސްފަ އެވެ.
އީސީގެ ނައިބު ރައީސް އިސްމާއިލް ހަބީބް ވިދާޅުވި ގޮތުގައި, އިންތިހާބު ބާއްވާ އާ ތާރީހެއް އެ ކޮމިޝަނުން ކަނޑައަޅާނީ މަޖިލީހުން ފާސްކުރި ބިލު, ގާނޫނެއްގެ ގޮތުގައި ތަސްދީގު ކުރެއްްވުމުންނެވެ. އެހެންކަމުން, އަދިވެސް އިންތިހާބު ބާއްވާ ތާރީހަކީ މާޗް, 17 ކަމަށް ބަލައިގެން އިންތިހާބުގެ ތައްޔާރީތައް ވަމުންދާ ކަމަށް އޭނާ ވިދާޅުވި އެވެ.
ހަބީބް ވިދާޅުވީ, މަޖިލީހުން ފާސްކުރި ބިލު ގާނޫނަކަށްވުމުން, ވޯޓުލުމުގެ ހައްގު ލިބިގެންވާ މީހުންގެ ލިސްޓަށް ބަދަލު ގެންނާނެ ކަމަށެވެ. އަދި އިންތިހާބުގެ އާ ތާރީހެއް ކަނޑައެޅުމާމެދު މަޝްވަރާ ކުރާނީ ވެސް އޭރުން ކަމަށް އޭނާ ވިދާޅުވި އެވެ.
