ފ. އަތޮޅު ކައުންސިލްގެ ރައީސަކު ހޮވަން މިއަދު ކުރިއަށްދިޔަ ބައި އިލެކްޝަން ފ. ނިލަންދޫ، ފޮނިލުނބޯގެ، ހައްވާ އަބްދުލް އަޒީޒް ކާމިޔާބު ކުރުމުން، ރާއްޖޭގެ އަތޮޅު ކައުންސިލެއްގެ ރައީސްގެ މަގާމަށް ފުރަތަމަ ފަހަރަށް އަންހެނަކަށް ލިބިއްޖެ އެވެ.
ފ. އަތޮޅު ކައުންސިލްގެ ރައީސްގެ ހުސްވެފައިވާ ގޮނޑިއަށް ބޭފުޅަކު އިންތިހާބުކުރުމަށް މިއަދު ކުރިއަށްދިޔަ ބައި އިލެކްޝަނުގައި ހައްވަ ވާދަކުރީ ސަރުކާރުގެ ފަރާތުން ޕީއެންސީގެ ޓިކެޓްގަ އެވެ.
އެ މަގާމަށް ހައްވައާ ވާދަކުރެއްވީ ފ. ނިލަންދޫ، އަޒުމް، އިބްރާހިމް ހަލީލެވެ. އޭނާ ވާދަކުރީ އިދިކޮޅު އެމްޑީޕީގެ ޓިކެޓުގަ އެވެ.
ބައ އިލެކްޝަނުގެ ވަގުތީ ނަތީޖާއިން ދައްކާ ގޮތުން ހައްވަ އަށް ލިބުނީ 941 ވޯޓެވެ. އިބްރާހިމް ހަލީލަށް ލިބުނީ 888 ވޯޓެވެ. މި ދާއިރާއަށް ވޯޓުލިބުމުގެ ހައްގު ލިބިފައިވާ 4،385 މީހުން ތިބި ނަމަވެސް ވޯޓުލާފައިވަނީ އެ އާބާދީގެ 42.9 ޕަސެންޓް މީހުންނެވެ.
ފ. އަތޮޅު ކައުންސިލްގެ އިތުރުން މިއަދު ވަނީ ވ. ފެލިދޫ ކައުންސިލްގެ ރައީސާއި ރ. ރަސްގަތީމުގެ އަންހެނުންގެ ތަރައްގީ އަށް މަސައްކަތް ކުރާ ކޮމިޓީގެ ބައި އިލެކްޝަންގެ ވޯޓުލުން ވެސް ބާއްވައިފަ އެވެ.
ފެލިދޫ ކައުންސިލް ރައީސްގެ ގޮނޑި ކާމިޔާބުކުރީ ޕީއެންސީގެ ކެންޑިޑޭޓު ހުސެއިން ވިސާމް އެވެ. ރަސްގެތީމުގެ އަންހެނުންގެ ތަރައްގީ އަށް މަސައްކަތްކުރާ ކޮމިޓީގެ ގޮނޑި ކާމިޔާބުކުރެއްވީ އެމްޑީޕީގެ ކެންޑިޑޭޓު ހައްވާ އަލީ އެވެ.
