މާޗު 17، ގައި ބާއްވަން ހަމަޖެހިފައިވާ ރައްޔިތުންގެ މަޖިލީހުގެ އިންތިހާބުގައި ވާދަކުރަން ފޯމު ހުށަހެޅުމަށް ހުޅުވާލި މުއްދަތު ހަމަވާން ބާކީ ހަތަރު ދުވަހަށް ވެފައިވީ ނަމަވެސް އިއްޔެއާ ހަމައަށް ލިބިފައިވަނީ އެންމެ 18 ފޯމު ކަމަށް އިލެކްޝަންސް ކޮމިޝަން (އީސީ) އިން ބުނެފި އެވެ.
އިލެކްޝަންސްގެ ނައިބު ރައީސް އިސްމާއީލް ހަބީބު އެކްސްގައި ކުރެއްވި ޕޯސްޓެއްގައި މި ކަމުގެ ކަންބޮޑުވުން ފާޅުކުރެއްވި އެވެ.
"އެންމެ ފަހު ވަގުތުގައި ފޯމު ލައްވަން މަޑުކުރައްވައިފިނަމަ، ފަހަރެއްގައި ފޯމުގެ މައްސަލައެއް ދިމާވެގެން ފޯމު އިސްލާހު ކުރަން ޖެހިއްޖެ ހިނދެއްގައި، ފޯމު އިސްލާހު ކުރުމުގެ ފުރުސަތު ލިބިވަޑައިނުގެންފާނެ،" ހަބީބު ލިޔުއްވާފައިވެ އެވެ.
ހަބީބު ވިދާޅުވި ގޮތުގައި 18 ފޯމުގެ ތެރޭގައި އަމިއްލަ ކެންޑިޑޭޓުންގެ ފޯމުގެ އިތުރަށް ސިޔާސީ ޕާޓީތަކުގެ ޓިކެޓުގައި ވާދަކުރާ، ބައެއް ކެންޑިޑޭޓުންގެ ފޯމު ވެސް ލިބިފައިވެ އެވެ.
މަޖިލީހުގެ އިންތިހާބު ބާއްވާ ތާރީހު، ރޯދަ މަހުގެ ދުވަހަކާ ދިމާވާތީ އިންތިހާބު ފަސްކުރުމުގެ ވިސްނުމުގައި މަޖިލީހުގެ އަގުލަބިއްޔަތު އޮތް އެމްޑީޕީ އާއި ޑިމޮކްރެޓްސްއިން ދަނީ މަސައްކަތް ކުރަމުންނެވެ. އެ ކަމަށް ޓަކައި، ގާނޫނަށް ބޭނުންވާ ބަދަލުގެ ބިލެއް ހުށަހަޅައި ވަގުތީ ކޮމިޓީއަކުން ބިލު ދިރާސާކުރުމުގެ މަސައްކަތް ދަނީ ކުރަމުންނެވެ.
ހަބީބު ވިދާޅުވީ، އިންތިހާބުގެ ތާރީހު ފަސްކުރި ނަމަވެސް ކުރިމަތިލުމަށް ހުޅުވާލި މުއްދަތު އިތުރަށް ފަސްނުކުރެވޭނެ ކަމަށެވެ.
ސިޔާސީ ޕާޓީތަކުގެ ތެރެއިން، މި އިންތިހާބުގައި ގިނަ ދާއިރާތަކަށް ވާދަކުރުމުގެ މަސައްކަތް ކުރާ މަންޒަރު މިހާތަނަށް ފެންނަނީ ވެރިކަންކުރާ ޕީއެންސީގެ އިތުރުން އިދިކޮޅު އެމްޑީޕީއާއި ޑިމޮކްރެޓްސް އެވެ. ދެން، ކުރީގެ ރައީސް އަބްދުﷲ ޔާމީން އުފައްދަވާ ޕީއެންއެފްގެ ފަރާތުން، އަމިއްލަ ގޮތުން ކެންޑިޑޭޓުންތަކެއް ވާދަކުރާނެ ކަން ވަނީ އިއުލާންކޮށްފަ އެވެ.
ވިހިވަނަ ރައްޔިތުންގެ މަޖިލީހަށް 93 ދާއިރާއަށް މެންބަރުން އިންތިހާބު ކުރާނެ އެވެ. ދާއިރާތަކަށް ވާދަކުރަން މައި ދެ ސިޔާސީ ޕާޓީން ވާދަކުރާ ކެންޑިޑޭޓުންގެ ފޯމުތައް ހުށަހަޅަން ރާވާފައިވާ އިންތިޒާމުތައް ވެސް އަދި މުޅީން ސާފެއް ނޫނެވެ.
