ރޯދައާ ދިމާވަ އިންތިހާބުތައް ރޯދަ މަސް ނިމުމަށްފަހު 10 ދުވަސްފަހުން ބާއްވާ ގޮތަށް ބަދަލުކުރަން ހުށަހެޅި އިސްލާހުގެ މުއްދަތު ކުރުކޮށްދޭން އިލެކްޝަންސް ކޮމިޝަނުން އެދިއްޖެ އެވެ.
އިންތިހާބާ ބެހޭ އާންމު ގާނޫނަށް އިސްލާހު ގެނައުމުގެ ބިލުގައި އިސްލާހު ހުށަހަޅާފައި ވަނީ އިންތިހާބެއް ރޯދަ މަހާ ދިމާވާނަމަ, އެ އިންތިހާބެއް ބޭއްވުން ރޯދަ މަސް ނިމުމަށްފަހު 10 ދުވަސްފަހުން ބާއްވާ ގޮތަށް ބަދަލުކުރުމަށެވެ.
ބިލުގެ ކޮމިޓީ މަރުހަލާގައި އީސީގެ ނައިބު ރައީސް އިސްމާއިލް ހަބީބް ވިދާޅުވީ އިންތިހާބު މިއަހަރުގެ ރައްޔިތުންގެ މަޖިލީހުގެ އިންތިހާބު ރޯދައިގެ 10 ދުވަސް ފަހުން ބާއްވައިފިނަމަ, ވޯޓު ގުނުމަށްފަހު ދާއިމީ ނަތީޖާ އިއުލާނުކޮށް, އިންތިހާބުގެ ހުރިހާ ކަމެއް ނިންމަން ލިބޭ މުއްދަތު ވަރަށް ކުރުވާ ކަމަށެވެ.
އޭނާ ވިދާޅުވީ އޭޕްރީލް 28 ވަނަ ދުވަހާ ހަމައަށް އިންތިހާބުގެ ހުރިހާ ކަމެއް ނިމި, އަންގަންޖެހޭ މުއައްސަސާތަކަށް އަންގާފައި އޮންނަންޖެހޭ ކަމަށެވެ. އެހެންކަމުން އޭޕްރީލް 21ގައި އިންތިހާބު ބާއްވައިފިނަމަ ވޯޓު ގުނުމަށް ލިބެނީ ހަ ދުވަހުގެ މުއްދަތު ކަމަށެވެ.
ހަބީބް މިހެން ވިދާޅުވީ, ރައްޔިތުންގެ މަޖިލީހުގެ ދައުރު ހަމަވުމުގެ 30 ދުވަސް ކުރިން އާ މަޖިލީހުގެ މެންބަރުން އިންތިހާބުކޮށް ނިންމަން ޖެހޭ ކަމަށް ގާނޫނުއަސާސީގައި ބުނާ މާއްދާއަށް ރިއާޔަތްކޮށެވެ.
titledesc
ހަބީބް ވިދާޅުވި ގޮތުގައި އިންތިހާބު ފަސް ކުރާ ކަމަށް ވަނަމަ, އިންތިހާބަށްފަހު ކަމެއް ހިނގައިފި ހާލަތެއްގައި އެކަން ހައްލު ކުރުމަށް ނުވަތަ ރިއާޔަތް ކުރުމަށް ކޮންމެވެސް ވަރެއްގެ މުއްދަތެއް އޮތުމަކީ ބޭނުންތެރި ކަމެކެވެ.
"ގާނޫނުއަސާސީގައި ވަކި ގޮތަކަށް އިންތިހާބުގެ ކަންކަން ނިންމާ އެހެނިހެން ނިމިފައޭ އޮންނަންވާނީ ބުނާ މާއްދާއަކީ ވަރަށް މުހިންމު މާއްދާއެއް. އަޅުގަނޑަކަށް ހިއެއް ނުވޭ ގާނޫނުއަސާސީއަށް އެހާ ފަސޭހައިން ބަދަލު ގެނެވޭނެ ކަމަށް" ހަބީބް ވިދާޅުވި އެވެ.
އޭނާ ވިދާޅުވީ މަޖިލީހުން ގާނޫނަށް ބަދަލު ގެނަޔަސް, ގާނޫނުއަސާސީގައި ބުނާ މާއްދާތަކަށް އިހްތިރާމް ކުރަންޖެހޭނެ ކަމަށެވެ.
"އަޅުގަނޑު ހިތަށް އަރަނީ އޭގަ[ބިލުގައި] އެބުނާ 10 ދުވަސް, ފަސް ވަރަކަށް ދުވަހަށް ބަދަލުކޮށްލައިފިއްޔާ އަޅުގަނޑުމެން އަތުގައި އޮންނާނެ އަނެއްކާވެސް [އިންތިހާބަށްފަހު] ފަސް ވަރަކަށް ދުވަސް, މިސާލަކަށް އެއްވަރު ވިޔަސް, ކޯޓުގެ ހުކުމަކުން އިތުރަށް ބާއްވަން ޖެހުނަސް އެ ފުރުސަތު ލިބިގެންދާނެ" ހަބީބް ވިދާޅުވި އެވެ.
ރައްޔިތުންގެ މަޖިލީހުގެ އިންތިހާބު ބާއްވަން މިހާރު ނިންމާފައި ވަނީ މާޗް 17، ގަ އެވެ. އެއީ ރޯދަ މަހުގެ ހަތް ވަނަ ދުވަހެވެ. އިންތިހާބު ރޯދަ މަސް ތެރޭގައި ބެއްވުމުން, ވޯޓުލާން ނިކުންނަ މީހުންގެ އަދަދު ދަށްވާނެތީ, ޕާޓިތަކުން ދަނީ އެކަމާ ދެކޮޅަށް އަޑުއުފުލަމުންނެވެ.
