ގެދޮރުވެރިޔާ ފްލެޓަށް ޝަރުތުހަމަވެ. ފްލެޓު ލިބޭނެ ކަމަށް ކުރީ ސަރުކާރުގެ ހައުސިން މިނިސްޓްރީން ކަނޑައެޅި މީހުންގެ ތެރެއިން 60 ޕަސެންޓު މީހުންގެ ޝަރުތުހަމަނުވާ ކަމަށް އެންޓި ކޮރަޕްޝަން ކޮމިޝަން (އޭސީސީ)އިން މިއަދު ހާމަކޮށްފި އެވެ.
އޭސީސީން މި މައްސަލައިގެ މައުލޫމާތު ދޭން ބޭއްވި ނޫސްވެރިންގެ ބައްދަލުވުމެއްގައި ބުނި ގޮތުގައި ފްލެޓުތަކުގެ ދާއިމީ ލިސްޓުގައި ޝަރުތު ފުރިހަމަވެ، އެއްވެސް މައްސަލައެއް ފާހަގަކުރެވިފައި ނުވާ ފޯމުތަކުގެ ނިސްބަތަކީ 20.7 ޕަސެންޓެވެ. އަދި ޝަރުތު ފުރިހަމަވީީ ނަމަވެސް މައްސަލަ ހުރި ފޯމުތަކުގެ ނިސްބަތަކީ 19.7 ޕަސެންޓެވެ.
ޝަރުތު ފުރިހަމަވީ ނަމަވެސް މައްސަލަ ހުރި ފޯމުތަކުގެ ތެރޭގައި ގިނައީ ދީފައިވާ މައުލޫމާތުގައި ފުށުއެރުން ހުރި ފޯމުތަކެވެ. އެއީ ޖުމްލަ ފޯމުތަކުގެ 70 ޕަސެންޓެވެ. އޭގެ އިތުރުން ޕޮއިންޓު ދިނުމުގައި މައްސަލަ ހުރި ފޯމުތަކާއި ހާއްސަ އެހީއަށް ބޭނުންވާ ފަރާތްތަކުގެ ބަޔަށް އުސޫލާ ހިލާފަށް ޕޮއިންޓް ދީފައިވާ ބައެއް ފޯމު ވެސް ހިމެނެ އެވެ.
އޭސީސީގެ ތަހުގީގަށް ފާހަގަކުރެވުނު މައިގަނޑު ކަންކަން
- 4000 ފްލެޓު ލިބޭ މީހުންގެ ތެރޭގައި ޝަރުތު ފުރިހަމަނުވާ ގިނަ މީހުން ހިމަނާފައިވުން
- ޕޮއިންޓު ދިނުމުގެ އިތުރަށް ޕޮއިންޓު ދީފައިވުން
- ގިނަ މީހުން ހުށަހަޅާފައިވާ ފޯމުތަކުގައި ދީފައިވާ މައުލޫމާތު ފުށުއެރުން
- ޝަރުތު ފުރިހަމަވާ ކަނޑައެޅުމުގައި އާއި ޕޮއިންޓު ދިނުމުގައި އަމަލުކޮށްފައި ވަނީ އެއް ހަމައަކުން ނޫންކަން
- ގިނަ މީހުންގެ ހައްގު ގެއްލުމުގެ އިހުތިމާލު އޮތްކަން
ޝަރުތު ހަމަނުވާ ފޯމުތަކުގެ ތެރޭގައި ގިނައީ އުސޫލުގެ ތިން ވަނަ ނަމްބަރުގެ (ނ)، އެއީ މާލޭގައި ދިރިއުޅެފައިވާ ފަރާތެއްކަން ސާބިތުކުރުމަށް ހަމައެކެނި ގޭގެ ލިޔުމެއް ނުވަތަ ރަށްރަށުގެ ކައުންސިލުގެ އިދާރާތަކުން ދޫކޮށްފައިވާ ލިޔުން ހުށަހަޅާފައިވާ ހާލަތުގައި އެ ލިޔުމަށް ބުރަދަންދީ ޝަރުތު ފުރިހަމަވާ ކަމަށް ކަނޑައަޅާފައިވާ ފޯމުތަކެވެ.
މީގެ މިސާލެއް ދެމުން އޭސީސީގެ އޮފިޝަލް ބުނީ މާލޭގައި ދިރިއުޅޭ ކަމަށް ބުނެ ލިޔުން ހުށަހަޅާފައިވާ އެކަކަކީ ރަށު ކައުންސިލުގެ ވަޒީފާގައި ގިނަ އަހަރުތަކެއް ވަންދެން ވަޒީފާއަދާކޮށްފައިވާ މީހެއް ކަމަށް ޕެންޝަން އޮފީހުގެ މައުލޫމާތުން ކަށަވަރުވާ ކަމަށެވެ. ނަމަވެސް މި މީހާއަށް ވެސް މާލޭގައި ދިރިއުޅުމުގެ ޝަރުތު ހަމަވެ ފްލެޓު ލިބިފައިވެ އެވެ.
މިގޮތަށް ހުރި އެހެން ފޯމުތަކުގައި ކުންފުނި ރަޖިސްޓްރީކޮށްފައިވާ ތާރީހަށް ވުރެ ކުރީގެ ތާރީހެއްގައި ކުންފުނިތަކުގައި ވަޒީފާ އަދާކޮށްފައިވާ ކަމަށް ބުނެ ލިބިފައިވާ ލިޔުންތަކަށް ބުރަދަންދީ ޝަރުތު ފުރިހަމަވާ ކަމަށް ވެސް ކަނޑައަޅާފައިވެ އެވެ. އަދި މައި އެޕްލިކަންޓަކީ 2013 ގެ ފަހުން މާލޭގެ ދަފްތަރުގައި ނުވަތަ މާލޭގެ ގެއެއްގައިވާ ހާލަތުގައި އެ މީހަކީ 15 އަހަރު މާލޭގައި އުޅެފައިވާ މީހެއްކަން ކަށަވަރު ކުރުމެއް ނެތި ވެސް ޝަރުތު ފުރިހަމަވާ ކަމަށް ކަނޑައަޅާފައިވެ އެވެ.
އޭގެ އިތުރުން ސަރުކާރުން ކުރިން ފްލެޓު ލިބިފައިވާ ބައެއް މީހުންނަށް ވެސް ފްލެޓަށް ޝަރުތު ފުރިހަމަވާ ކަމަށް ބަލައިފައިވެ އެވެ. އަދި 60،000ރ. އަށް ވުރެ ބޮޑު އާމްދަނީއެއް ލިބޭ މީހުން ވެސް ޝަރުތު ފުރިހަމަވާ ކަމަށް ކަނޑައަޅާފައިވެ އެވެ.
ޕޮއިންޓު ދިނުމުގައި ހުރި މައްސަލަތައް ފާހަގަކުރަމުން އޭސީސީން ބުނީ ހާއްސަ އެހީއަށް ބޭނުންވާ ފަރާތެއް ބަލަމުންދާ ފަރާތެއް ކަމަށް ފޯމުގައި ނެތަށް އެ ބަޔަށް ޕޮއިންޓު ދިނުމާއި ބައެއް ފޯމުތަކުގައި އެ ބަޔަށް ޕޮއިންޓު ދިނުމުގައި ޕޮއިންޓު ދިން އަސާސެއް އެނގެން ނެތް ކަމަށެވެ. އަދި ފޯމުގައި ހުރި މައުލޫމާތުގައި ފުށުއެރުން ހުރި ފޯމުތަކަށް ވެސް އެކަންކަމަށް ރިއާޔަތްކުރުމެއް ނެތި ޕޮއިންޓު ދީފައިވާ މައްސަލަ ވެސް އެ ކޮމިޝަނުން ފާހަގަކުރި އެވެ.
ޝަކުވާ ހުށެހެޅުމުގައި ހުރި މައްސަލަތައް ފާހަގަކުރަމުން އޭސީސީން ބުނީ ޝަކުވާއާއެކީ ހުށަހަޅާފައިވާ ބައެއް ލިޔެކިޔުންތަކަށާއި އަސާސެއް ނެތް ޝަކުވާތަކަށް ވެސް ބުރަދަންދީފައިވާ ފޯމުތައް ފާހަގަކުރެވިފައިވާ ކަމަށެވެ. ހަމައެހެންމެ ފަސޭހައިން ކަށަވަރުކުރެވެން ހުރި މައުލޫމާތު ބޭނުންނުކޮށް ޕޮއިންޓު ދީފައިވާ ކަމަށް ވެސް އޭސީސީން ބުންޏެވެ. އަދި ދަރިން ނެތް ބައެއް މީހުންނަށް ދަރިން ހުރި ކަމަށް ބަލައި ޕޮއިންޓު ދީފައިވާ ކަން އޭސީސީގެ ތަހުގީގުން ފާހަގަކުރެވުނެވެ.
