މި އަހަރު ފެށުނު ފަހުން ރާއްޖޭގެ ޓޫރިޒަމްގެ އެއް ނަމްބަރު މާކެޓުގެ ގޮތުގައި އޮތް ރަޝިއާ ފަހަތަށް ޖައްސާލުމަށް ފަހު އެންމެ ގިނަ ޓޫރިސްޓުން އަންނަ ގައުމަކަށް ޗައިނާ ވެފައިވާ ކަމަށް ޓޫރިސްޓް އެރައިވަލް ތަފާސްހިސާބުތަކުން ދައްކައިފި އެވެ.
ޓޫރިޒަމް މިނިސްޓްރީން އާންމު ކުރި އެންމެ ފަހުގެ އެރައިވަލް ރިޕޯޓުގައިވާ ގޮތުގައި މި އަހަރުގެ މިހާތަނަށް 214،470 ޓޫރިސްޓުން ރާއްޖެ އައިސްފި އެވެ. އެގޮތުން އެއްވަނަ މާކެޓުގެ ގޮތުގައި އޮތް ޗައިނާއިން 23،972 ފަތުރުވެރިން ވަނީ ރާއްޖެ އައިސްފަ އެވެ. މިއީ ކޮވިޑް-19އަށް ފަހު އެ ގައުމުގެ ބޯޑަރުތައް ހުޅުވާލިފަހުން ރާއްޖޭގެ ޓޮޕް މާކެޓުގެ އެއްވަނައަށް ޗައިނާ އެރި ފުރަތަމަ ފަހަރެވެ.
އެންމެ ގިނައިން ޓޫރިސްޓުން އައި ގައުމުތައް
- ޗައިނާ - 23،972
- ރަޝިއާ - 21،898
- އިޓަލީ - 21،321
- ޔޫކޭ - 18،078
- އިންޑިއާ - 16،536
- ޖަރުމަނު - 12،842
- ފްރާންސް - 7،624
- އެމެރިކާ - 7،452
- ޕޮލޭންޑް - 6،063
- ސްވިޓްޒަލޭންޑް - 4،211
ޗައިނާއަކީ ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރާ ގައުމަށް ހަދައިދިނުމަށް ރައީސުލްޖުމުހޫރިއްޔާ ޑރ. މުހައްމަދު މުއިއްޒު ވަނީ އެމަނިކުފާނު ޗައިނާއަށް ކުރި ދަތުރުފުޅުގައި އެދިވަޑައިގަނެފަ އެވެ.
"ޗައިނާގެ މި މަގާމު އަލުން ހޯދުމަށް އަޅުގަނޑުމެން ގަދައަޅައި މަސައްކަތް ކުރުމަކީ އަޅުގަނޑު އެދޭ އެދުމެއް،" ރައީސް މުއިއްޒު ވިދާޅުވި އެވެ.
ކޮވިޑުގެ ކުރިން 2017 އަދި 2018 ވަނަ އަހަރު ރާއްޖެއަށް އެންމެ ގިނައިން ފަތުރުވެރިން ޒިޔާރަތް ކުރި ގައުމަކީ ޗައިނާ އެވެ. ޖެހިގެން އައި 2019 ވަނަ އަހަރު 280،000 އަށްވުރެ ގިނަ ޗައިނާ ފަތުރުވެރިން ވަނީ ރާއްޖެ އައިސްފަ އެވެ.
ކޮވިޑަށް ފަހު ރާއްޖޭގެ ބޯޑަރުތައް އަލުން ހުޅުވާލުމާއެކު އެންމެ ގިނައިން ފަތުރުވެރިން އައިސްފައި ވަނީ އަވައްޓެރި އިންޑިއާއިންނެވެ. ނަމަވެސް މިހާރު އިންޑިއާ އޮތީ މި ލިސްޓުގެ ފަސް ވަނައިގަ އެވެ.
ތިން އަހަރު ވަންދެން ގައުމު ބަންދުކޮށްފައި އޮތް އޮތުން ނިމުމަކަށް ގެނެސް ޗައިނާއިން އެ ގައުމުގެ ބޯޑަރު ހުޅުވާލީ މިދިޔަ އަހަރުގެ ޖެނުއަރީ އަށެއްގަ އެވެ. މިދިޔަ އަހަރު ޖުމުލަ 187،118 ޗައިނާ ފަތުރުވެރިން ވަނީ ރާއްޖެ އައިސްފަ އެވެ.
ޗައިނާ ރާއްޖޭގެ އެެއް ނަމްބަރު މާކެޓަށް ހެދުމަށް ރައީސް އިލްތިމާސްކުރެއްވި އިރު، އިންޑިއާގެ ގިނަ ބަޔަކު ދަނީ ރާއްޖެ ބޯއިކޮޓްކޮށް، ރާއްޖޭގެ ބަދަލުގައި އެ ގައުމުގެ ލަކްޝަދީޕަށް ޒިޔާރަތްކުރަން ގޮވާލަމުންނެވެ.
ރާއްޖޭގައި މިހާރު 1،142 ޓޫރިސްޓް ޕްރޮޕަޓީ ހިންގަމުންދެ އެވެ. އެއީ 175 ރިސޯޓާއި 812 ގެސްޓްހައުސް އާއި 140 ސަފާރީގެ އިތުރުން 15 ހޮޓަލެވެ. މި ތަންތަނުގައި ޓޫރިސްޓުން ބޭނުންކުރަން ހުރި އެނދުގެ އަދަދަކީ 61،518 އެވެ.
