ދިވެހިރާއްޖޭގެ ހާއްސަ އިގްތިސާދީ ސަރަހައްދަށް ހުއްދަނެތި ބޭރުގެ އެއްވެސް ގައުމަކަށް ވަދެވިގެން ނުވާނެ ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ ބުދަ ދުވަހު ރާއްޖޭގެ ކަނޑުގެ ސަރަހައްދަށް ވަދެ ދިވެހި މަސް ދޯނިތަކަކަށް އިންޑިއާ ސިފައިން ހަތިޔާރާއެކު އެރި މައްސަލައާ ގުޅިގެން ނޫސްވެރިޔަކު ކުރި ސުވާލަކަށް ޖަވާބު ދެއްވަމުންނެވެ.
"އެނގިވަޑައިގަންނަވާނެ އެއީ ބައިނަލްއަގުވާމީ ގާނޫނުތަކާވެސް ހިލާފު ކަމެއް، އެހެންވީމަ ވީހާވެސް އަވަހަކަށް އެކަން ތަހުގީގުކޮށް، އެކަން ހިނގާފަ އޮތް ގޮތް ބަލައި [އެ މައުލޫމާތު] އާންމުކުރުމަކީ މިކަމާ ހަވާލުވެ ތިއްބެވި ބޭފުޅުން ކުރަންޖެހޭ ކަމެއް" ސޯލިހު ވިދާޅުވި އެވެ.
މިވަގުތު އިދިކޮޅު އެމްޑީޕީގެ ވަގުތީ ރައީސްގެ މަގާމުގައިވެސް ހުންނެވި ސޯލިހު އިތުރަށް ވިދާޅުވީ، މި މައްސަލާގައި އިންޑިއާއަށް ޝަކުވާ ހުށަހަޅާ ދެވަނަ ފަހަރަށް މިފަދަ މައްސަލައެއް ދިމާވިޔަނުދިނުމަށް ކުރަން ޖެހޭ ހުރިހާ ކަމެއް ސަރުކާރުން ކުރަން ޖެހޭނެ ކަމަށެވެ.
ރާއްޖޭގެ ތިން މަސް ދޯންޏަކަށް އެރީ އިންޑިއާގެ ކޯސްޓް ގާޑް ޝިޕް 246 އާއި ކޯސްޓް ގާޑް ޝިޕް 253 އަށް ނިސްބަތްވާ ބޯޑިން ޓީމުތަކުން ކަމަށް ޑިފެންސް މިނިސްޓްރީން ވަނީ ބުނެފަ އެވެ. އަދި އެކަން ހިނގި ސަބަބު ލިޔުމުން ހޯދުމަށް ދިވެހި ސަރުކާރުން ވަނީ އިންޑިއާއަށް ސިޓީއެއްވެސް ފޮނުވާފަ އެވެ.
ރާއްޖޭގެ ހާއްސަ އިގްތިސާދީ ސަރަހައްދަށް ވަދެ ބުދަ ދުވަހު އިންޑިއާގެ ސިފައިން އެރީ އަސުރުމާ-3، ނިރު-7 އަދި މާހޯރަ-3 ދޯންޏަށެވެ. އެ ދޯނިތަކަށް އެރުމަށްފަހު ބަލައި ފާސްކޮށް، މަސްވެރިންނަށް ވަކި ގޮތަކަށް އަމަލު ކުރުމަށް ސިފައިން ވަނީ އަމުރުކޮށްފަ އެވެ.
އެއަށްފަހު ބުރާސްފަތި ދުވަހުގެ ރޭވެސް އިންޑިއާ ސިފައިން "މާހޯރަ3" އަށް އަނެއްކާވެސް އަރާ ފާސްކުރި ކަމަށް މަސްވެރިންގެ ޔުނިއަނުން މިއަދު ބުނެފައިވެ އެވެ.
ދޯނިތައް އިންޑިއާ ސިފައިން އެރި މަންޒަރުގެ ވީޑިއޯތަކެއް އެ ޔުނިއަނުން އިއްޔެ އާންމުކޮށްފައިވާއިރު، ވީޑިއޯތަކުން ފެންނަނީ އިންޑިއާގެ ކޯސްޓް ގާޑުގެ ސިފައިން ބަޑިއާއެކު ހަރަކާތްތެރިވާ މަންޒަރެވެ. އިންޑިއާ ކޯސްޓް ގާޑުގެ އުޅަނދެއް ވެސް ވީޑިއޯތަކުން ސާފުކޮށް ފެނެ އެވެ.
އެ މައްސަލަ ދޯނިތަކުން ރިޕޯޓު ކުރުމުން ދިވެހި ކޯސްޓް ގާޑުން އެ ސަރަހައްދަށް ދިޔައިރު، އިންޑިއާ ސިފައިން ފެންނަން ނެތް ކަމަށް އެމްއެންޑީއެފް އިން ބުނެ އެވެ. ނަމަވެސް ރާއްޖޭގެ ހާއްސަ އިގްތިސާދީ ސަރަހައްދު މިހާރު ބަލަމުންދާ ކަމަށްވެސް ސިފައިން ބުނެފައިވެ އެވެ.
އަސުރުމާ-3 ދޯނީގެ ފަރާތުން ބުދަ ދުވަހު މި ނޫހާ ވާހަކަ ދައްކަމުން ބުނީ ގާތްގަނޑަކަށް ދެ ގަޑިއިރެއްހާއިރު އިންޑިއާ ސިފައިން އެ ދޯނީގައި ހަރަކާތްތެރިވި ކަމަށެވެ.
