ރާއްޖޭގެ ހާއްސަ އިގުތިސޯދީ ސަރަހައްދުގެ ތެރޭގައި ބޮޑުކަންނެލި މަސްވެރިކަން ކުރަން އުޅުނު އދ. މަހިބަދޫ އަސުރުމާ-3 އަކަށް އިންޑިއާ ސިފައިން އެރިކަމަށް ބުނާ މައްސަލަ ސީރިއަސް މައްސަލައެއްގެ ގޮތުގައި ބަލަން އިދިކޮޅު އެމްޑީޕީން ސަރުކާރަށް ގޮވާލައިފި އެވެ.
އެމްޑީޕީން ދާދި ދެންމެއަކު ނެރުނު ނޫސްބަޔާނެއްގައި ބުނީ އަސުރުމާ-3 ދޯންޏަށް ބޭރު ގައުމެއްގެ ސިފައިން އަރާގައި އެ ދޯނީގެ ފަޅުވެރިންނާ ސުވާލުކޮށްފައިވާ ކަމަށް މީޑިއާތަކުގައި ކޮށްފައިވާ ރިޕޯޓުތަކާ ގުޅިގެން އެ ޕާޓީން ނުހަނު ކަންބޮޑުވާ ކަމަށެވެ.
"މި މައްސަލައަކީ ދިވެހި ދައުލަތުގެ އެންމެ މަތީ މަސްލަހަތު ހިމެނޭ ސީރިއަސް މައްސަލައެއްގެ ގޮތުގައި ސަރުކާރުން ބެލުމަށް އެމްޑީޕީން ގޮވާލަމެވެ." އެމްޑީޕީގެ ބަޔާނުގައި ބުނެފައިވެ އެވެ.
އޭގެ އިތުރުން އަވަށްޓެރި އިންޑިއާ އާއި ސްރީލަންކާގެ ސަރުކާރާ މި މައުލޫމާތު ވީ އެންމެ އަވަހަކަށް ހިއްސާކޮށް އެއިން ގައުމެއްގެ އަސްކަރިއްޔާ މިކަމުގައި ޝާމިލުވޭތޯ ބެލުމަކީ ދިވެހި ދައުލަތުގެ މައްޗަށް ލާޒިމު ކަމެއް ކަމަށް ވެސް އެމްޑީޕީން ބުނެފައިވެ އެވެ.
ފިޝަރީޒް މިނިސްޓަރު އަހުމަދު ޝިޔާމް ވިދާޅުވެފައިވާ ގޮތުގައި އ.ދ މަހިބަދޫ އަސުރުމާ-3 ދޯނީގެ ޖީޕީއެސް ލޮކޭޝަނުން ދައްކާ ގޮތުގައި އެ ދޯނި އޮތީ ރާއްޖޭގެ ކަނޑުގެ ސަރަހައްދުގެ ތެރޭގަ އެވެ. އެ ދޯނީގެ އޮޑިވެރިޔާ ވެސް "އަދަދު"އަށް ބުނީ އޭރު ދޯނި އޮތީ ހދ. ކުޅުދުއްފުއްޓާ ދިމާލުން ބޭރުގައި ރާއްޖޭގެ ސަރަހައްދުގެ ތެރޭގައި ކަމަށެވެ.
އޭނާ ބުނީ އިންޑިއާގެ ދެ މަނަވަރަކުން އެ ސަރަހައްދުގައި ހަރަކާތްތެރިވަމުން ދިޔަ ކަމަށެވެ. އެފަހުން ބޮޑު ކަންނެލި މަސްވެރިންގެ ޔޫނިއަނުން ވަނީ އެހެން ދެ ދޯންޏަކަށް ވެސް ހަތިޔާރުއެޅި އިންޑިއާ ސިފައިން އަރައި އެ ދޯނިތަކުގެ ފަޅުވެރިންނާ ސުވާލުކޮށްފައިވާ ކަމަށް އެކްސްގައި ޕޯސްޓުކޮށްފަ އެވެ. ޔޫނިއަނުން ބުނީ ދެން އެރި ދޯނިތަކަކީ ނިރު-7 އާއި މާހޯރަ-3 ކަމަށެވެ.
މިއިން އެއްވެސް މައުލޫމާތެއް އަދި ރަސްމީ މަސްދަރަކުން ކަށަވަރެއް ނުކޮށްދެ އެވެ.
މިކަމާ ގުޅިގެން އެމްއެންޑީއެފްއިން މިހާތަނަށް މާ ގިނަ މައުލޫމާތެއް ހާމަނުކުރެ އެވެ. އެންމެ ފަހުން ބުނީ އިންޑިއާ ސިފައިން އެރިކަމުގެ މައުލޫމާތު ލިބުމާ ގުޅިގެން ކޯސްޓުގާޑު އުޅަނދެއް އެ ސަރަހައްދަށް ދަތުރު ކުރަމުންދާ ކަމަށެވެ. އެފަހުން އިތުރު މައުލޫމާތެއް ސިފައިން ހާމަނުކުރެ އެވެ.
އެމްޑީޕީގެ ބަޔާނުގައި ވަނީ ރާއްޖޭގެ ހާއްސަ ސަރަހައްދު ބެލެހެއްޓުމުގެ ޒިންމާއަކީ އެމްއެންޑީއެފްއަށް މަތިކޮށްފައިވާ ޒިންމާއެއްކަން ފާހަގަކޮށް ރާއްޖޭގެ ކަނޑުގެ ސަރަހައްދަކީ ދިވެހި މަސްވެރިންނާއި ދަތުރުވެރިންނަށް ސަލާމަތާއި ރައްކާތެރިކަން ކަށަވަރުވެފައިވާ ތަނަކަށް ހެދުމަށް ގޮވާލައިފަ އެވެ.
