އިސްލާމިކް މިނިސްޓަރު ކަމަށް ޑރ. މުހައްމަދު ޝަހީމް އަލީ ސައީދު އަލުން އައްޔަންކުރުމުން އޭނާއަށް މަރުހަބާ ކިޔަން އިސްލާމިކް މިނިސްޓްރީން މިއަދު ހަފުލާއެއް ބާއްވައިފި އެވެ.
އިސްލާމިކް މިނިސްޓްރީން އާއްމުކޮށް އަމަލުކުރާ ގޮތާ ތަފާތުކޮށް، މީޑިއާތަކަށް ކުރިން އެންގުމަކާ ނުލައި ކުއްލި ގޮތަކަށް ބޭއްވި ޖަލްސާގައި ޝަހީމް ވިދާޅުވީ އެ ހަފުލާއަކީ މިނިސްޓްރީގެ މުވައްޒަފުން އަމިއްލަ ގޮތުން އިންތިޒާމްކުރި ހަފުލާއެއް ކަމަށެވެ. މި ޖަލްސާގައި އެ މިނިސްޓްރީގެ ސްޓޭޓް މިނިސްޓަރުންނާއި ޑެޕިއުޓީ މިނިސްޓަރުން ބައިވެރިވެވަޑައިގެންނެވި އެވެ. އިސްލާމީ މަރުކަޒުގެ އިމާމު ޝައިހު މުހައްމަދު ދީދީ ވެސް އެ ހަފުލާގައި ބައިވެރިވެވަޑައިގެންނެވި އެވެ.
އެ ހަފުލާގައި ޝަހީމަށް މަރުހަބާ ވިދާޅުވެ ވާހަކަ ދައްކަވަމުން އިސްލާމިކް މިނިސްޓްރީގެ ޑިރެކްޓާ ޖެނެރަލް އަބްދުލް އަޒީރު އިސްމާއީލް ވިދާޅުވީ އިއްޔެއަކީ އިސްލާމިކް މިނިސްޓްރީގެ މުވައްޒަފުންނަށް ހިތާމައިގެ ދުވަހެއް ކަމަށެވެ. އަޒީޒު ވިދާޅުވީ އިއްޔެ އަކީ "ބޮޑު ކާރިސާއެއްގެ ދުވަހެއް" ކަމަށެވެ. އޭނާ އެ އިޝާރާތްކުރެއްވީ ޝަހީމް އިސްލާމިކް މިނިސްޓަރުގެ މަގާމުގައި ހުންނަވަން ރައްޔިތުންގެ މަޖިލީހުން ރުހުން ނުދިން ނުދިނުމަށެވެ.
"އިއްޔެއަކީ މިނިސްޓްރީގައި އަޅުގަނޑުމެންގެ ހަޔާތުގައި ކުރިމަތިވި ބޮޑު ކާރިސާއެއްގެ ދުވަހެކޭ އަޅުގަނޑު ދަންނަވާނީ. އެހެން ނަމަވެސް ހަމަ އެޔާ އެކީގައި އުފާ ހާސިލުވެގެން ވެސް ދިޔަ ދުވަހެއް،" އޭނާ ވިދާޅުވި އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވެރިކަމުގެ ދައުރު ފެށިގެން އައި އިރު ފާހަގަ ކުރެވުނީ އެހެން ވުޒާރާތަކާއި މުއައްސަސާތަކަށް ނަމޫނާއަކަށް ވާ މަސައްކަތްތަކެއް އިސްލާމިކް މިނިސްޓްރީން ކޮށްފައިވާކަން ކަމަށް ވެސް އޭނާ ވިދާޅުވި އެެވެ. މިނިސްޓަރަކަށް ޝަހީމް ހުންނަަވައިގެން އެ މިނިސްޓްރީން ދެ މަސް ދުވަހުގެ ތެރޭގައި ކުރި މަސައްކަތްތަކަކީ އަހަރު ތަކުން ކުރެވޭ ވަރުގެ މަސައްކަތްތަކެއް ކަމަށް ވެސް އޭނާ ސިފަކުރެއްވި އެެވެ.
"އެހެންވީމާ އެހާ ބޮޑުކުރިއެރުމެއް ހާސިލުވެގެން ދިއުމަކީ އަޅުގަނޑުމެންގެ ބައެއް ފަރާތްތަކަށް އެހާ ފަސޭހަކަމަކަަށް ނުވޭ. އަޅުގަނޑުމެންގެ ގައުމަށް ދީނީ ގޮތުން ރަނގަޅު ކުރިއެރުންތަކެއް، ރަނގަޅު ކާމިޔާބީތަކެއް ލިބިގެން ދިއުމަކީ ދުނިޔޭގެ އެކި ހިސާބުތަކާއި އަދި އަޅުގަނޑުމެންގެ ވެސް ބައެއް ފަރާތްތަކަށް އެހާ ފަސޭހަކަމަކަށް ނުވޭ،" އަޒީޒް ވިދާޅުވި އެެވެ.
އިއްޔެ "ދިމާވި ހާދިސާތަކުން" އެކަން ހާމަވެގެން ދިޔަ ކަމަށް ވެސް އޭނާ ވިދާޅުވި އެވެ. އަދި މިނިސްޓަރު ޝަހީމަށާއި ރައީސް މުއިއްޒަށް ތައުރީފުކުރައްވައި އޭނާ ވަރަށް ދިގުކޮށް ވާހަކަ ދެއްކެވި އެެވެ.
ޝަހީމަށް މަޖިލީހުން ރުހުން ނުދިނުމުން އަލުން އެ މަގާމަށް އައްޔަން ކުރުން އަޒީރު ސިފަކުރެއްވީ ގައުމު އުފާކުރަން ޖެހޭ ކަމެއްގެ ގޮތުގަ އެވެ.
"މިއީކީ ކޮންމެ ކޮންމެ ތާކު [ކޮންމެ ކޮންމެ ގައުމެއްގައި] ވެގެންދާނެ ގޮތެއް ނޫން. ވަޒީރަަކަށް ހުންނަވާ ބޭފުޅެއް[ގެ] އިތުބާރު ނެތް ކަމަށް ފާސްވެގެން ދިއުމަށް ފަހުގައި އަނެއްކާ ވެސް ހަަމަ އެބޭފުޅަކު އައްޔަން ކުރެއްވުން،" އޭނާ ވިދާޅުވި އެވެ.
އޭނާ ސިފަކުރެއްވި ގޮތުގައި އެކަމުން އެނގި ސާބިތުވީ ރައީސް މުއިއްޒު ރާއްޖޭގެ ދީނީ ކަންކަމަށް ދެއްވާ އަހަންމިއްޔަތެވެ.
