ޒަކާތާ ބެހޭގޮތުން ލިޔެފައިވާ ހުރިހާ ލިޔުމެއް އެއްތަނަކަށް ޖަމާކޮށް, އޮންލައިން ލައިބްރަރީއެއް ގާއިމުކުރުމުގެ މަސައްކަތް ކުރަމުންދާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
އަލަށް އުފެއްދި ޒަކާތް ހައުސްގެ ވެބްސައިޓް ލޯންޗު ކުރުމަށް އިއްޔެ ބޭއްވި ރަސްމިއްޔާތުގައި ޝަހީމް ވިދާޅުވީ, ވެބްސައިޓު އިފްތިތާހު ކުރިއަސް, ވެބްސައިޓަށް އަޅަން ޖެހޭ އިތުރު މައުލޫމާތު ކުރިއަށް އޮތްތަނުގައި ވެސް އަޅަމުން ގެންދާނެ ކަމަށެވެ.
"އަމާޒަކީ ޒަކާތުގެ ދާއިރާއިން ކުރެވިފައިވާ ތާރީހީ މަސައްކަތްތައް އެއް ތަނަކުން ފެންނަން ހުންނާނެ ގޮތް ހެދުން. އެހެންމަ އިސްލާމިކް މިނިސްޓްރީން ވެސް މީގެ ކުރިން ޒަކާތާ ބެހޭގޮތުން ކުރެވިފައިވާ ހުރިހާ މަސައްކަތްތަކެއް އަޅުގަނޑުމެން ޖަމާ ކުރާނަން," މިނިސްޓަރު ވިދާޅުވި އެވެ.
މިނިސްޓަރު ޝަހީމް ވިދާޅުވީ 1984 ވަނަ އަހަރުން ފެށިގެން ދިވެހި ރާއްޖޭގައި ޒަކާތަށް ހާއްސަ އިދާރާއެއް ހުރެ, ޒަކާތުގެ ވަރަށް ހާއްސަ މަސައްކަތްތަކެއް ކުރަމުން ގެންދިޔަ ކަމަށާއި, އެކަންކަމާ ގުޅޭ މައުލޫމާތު އެއްތަން ކުރުމުގެ މަސައްކަތް ކުރަމުން ގެންދާނެ ކަމަށެވެ. އަދި އެއީ ރާއްޖޭގެ އިލްމުވެރިންނާއި ސަރުކާރުތަކުން ކޮށްފައިވާ ތަރުތީބު, ހެޔޮ މަސައްކަތެއްކަން އޭނާ ފާހަގަކުރެއްވި އެވެ.
"އަޅުގަނޑު އެދެނީ ޒަކާތާ ބެހޭ ދާއިރާއިން ފޮތްތައް ލިޔުއްވާފައި, ދިރާސާތައް ޝާއިއު ކުރައްވާފައިވާ ހުރިހާ ބޭފުޅުންގެ ތެރެއިން އެ ބޭފުޅުންގެ ދިރާސާތަކާއި ފޮތްތައް, ވެބްސައިޓުގައި ޕަބްލިޝް ކުރުމަށް ޝައުގުވެރިވާ ބޭފުޅުން އެ ފޮތްތަކާއި ދިރާސާތައް މިނިސްޓްރީ އޮފް އިސްލާމިކް އެފެއާޒްއަށް ނުވަތަ ޒަކާތު ހައުސްއަށް ހަދިޔާ ކުރެއްވުމަށް" ޝަހީމް ވިދާޅުވި އެވެ.
ޝަހީމް ވިދާޅުވީ އިފްތިތާހުކުރި ޒަކާތު ހައުސް ވެބްސައިޓު މެދުވެރިކޮށް, ޒަކާތުގެ ނިޒާމަށް ގެނެވޭ ބަދަލުތައް ފެންނަން ހުންނާނެ ކަމަށެވެ. އެ ވެބްސައިޓު ވެގެންދާނީ އިދާރީ ހިދުމަތްތަކާއި ދީނީ ހިދުމަތްތައް ލިބޭ އަދި ދިރާސާ ކުރާ ދަރިވަރުންނަށް ވަރަށް ރަނގަޅު ރިފަރެންސަކަށް ކަމަށް އޭނާ ވިދާޅުވި އެވެ.
