ކުރިއަށް އޮތް ރޯދަމަހުގެ ތެރޭ ބާއްވަން ނިންމާފައިވާ ރައްޔިތުންގެ މަޖިލީހުގެ އިންތިހާބު, ރޯދައިގެ ފަހަށް ބަދަލުކުރުމާ މެދު އިލެކްޝަންސް ކޮމިޝަނުން އަދި މަޝްވަރާ ނުކުރާ ކަމަށް އެ ކޮމިޝަނުގެ ނައިބު ރައީސް އިސްމާއިލް ހަބީބް ވިދާޅުވެއްޖެ އެވެ.
ރައްޔިތުންގެ މަޖިލީހުގެ އިންތިހާބު ބާއްވަން މިހާރު ނިންމާފައި ވަނީ މާޗް 17، ގަ އެވެ. އެއީ ރޯދަ މަހުގެ ހަތް ވަނަ ދުވަހެވެ. އިންތިހާބު ރޯދަ މަސް ތެރޭގައި ބެއްވުމުން, ވޯޓުލާން ނިކުންނަ މީހުންގެ އަދަދު ދަށްވާނެތީ, ޕާޓިތަކުން ދަނީ އެކަމާ ދެކޮޅަށް އަޑުއުފުލަމުންނެވެ.
އޭގެ އިތުރުން އެއްވެސް އިންތިހާބެއް ރޯދަ މަހު ނުބޭއްވޭ ގޮތަށް އެކަން މަނާކުރަން މާއްދާއެއް ހިމަނައި އިންތިހާބުތަކާ ބެހޭ އާންމު ގާނޫނު އިސްލާހުކުރަން ރައްޔިތުންގެ މަޖިލީހަށް ހުށަހަޅާފައި ވެއެވެ.
މިކަމާ ގުޅޭގޮތުން ސުވާލު ކުރުމުން ހަބީބް މިއަދު 'އަދަދު' އަށް ވިދާޅުވީ އިންތިހާބު ބާއްވާ ތާރީހަށް ބަދަލު ގެނައުމުގެ މަޝްވަރާއެއް ކޮމިޝަނުގައި ނުކުރެވޭ ކަމަށެވެ. ނަމަވެސް, ގާނޫނަށް ބަދަލުގެނެސް, ތާރީހު ބަދަލުކުރަން ލާޒިމުވާ ހާލަތުގައި އެކަން ކުރާނެ ކަމަށް ވެސް އޭނާ ވިދާޅުވި އެވެ.
ރޯދަމަހު އިންތިހާބުތައް ނުބޭއްވޭ ގޮތަށް ގާނޫނު ބަދަލުކުރަން މަޖިލީހަށް އިސްލާހު ހުށަހެޅުއްވީ އިހަވަންދޫ ދާއިރާގެ މެމްބަރު މުހައްމަދު ޝިފާއު އެވެ. އޭނާ އިންތިހާބުތަކާ ބެހޭ އާންމު ގާނޫނަށް، ރޯދަ މަހު އިންތިހާބުތައް ބޭއްވުން މަނާކުރާ މާއްދާ ހިމެނޭހެން 20 މާއްދާ އިސްލާހުކުރަން ހުށަހަޅާފަ އެވެ.
އެގޮތުން, ވޯޓު ނަގާ ދުވަހާއި ވަގުތާ ގުޅޭ މާއްދާއަށް ހުށަހަޅާފައިވާ އިސްލާހުގައި ވަނީ ރޯދަ މަހުގެ އެއްވެސް ދުވަހެއްގައި އެއްވެސް އިންތިހާބެއް ބާއްވައިގެން ނުވާނެ ކަމަށެވެ. މެމްބަރު ޝިފާއު މި މާއްދާ އިސްލާހުކުރަން ހުށަހެޅި ގޮތަކީ އިންތިހާބު ބާއްވަން ޖެހޭ ތާރީހު ރޯދަ މަހުގެ ދުވަހަކާ ދިމާވާނަމަ އެ އިންތިހާބެއް ބާއްވަން ޖެހޭނީ ރޯދަ މަސް ނިމުމުގެ 10 ދުވަސް ފަހުންނެވެ.
