ހޮނިހިރު ދުވަހު ބޭއްވި މާލެ ސިޓީ ކައުންސިލުގެ ބައި-އިލެކްޝަނާ ގުޅިގެން އެ ކޮމިޝަނަށް ލިބުނީ ހަތް ޝަކުވާ ކަމަށް އިލެކްޝަން ކޮމިޝަނުން ބުނެފި އެވެ.
އިލެކްޝަން ކޮމިޝަނުގެ ނައިބު ރައީސް އިސްމާއީލް ހަބީބް މިއަދު "އަދަދު"އަށް ވިދާޅުވީ، މާލެ ސިޓީ ކައުންސިލުގެ ބައި އިލެކްޝަނާ ގުޅިގެން މިހާތަނަށް އައީ ރަޖިސްޓްރީއާ ގުޅޭ ހަތަރު މައްސަލައަކާއި، އެންޓިކެމްޕޭނުކުރުމާ ގުޅޭ ތިން މައްސަލައެއް ކަމަށެވެ.
"މާ ސީރިއަސް ޝަކުވާއެއް ނެތް، އިންތިހާބުގެ ނަތީޖާއަށް އަސަރު ފޯރަފާނެކަހަލަ މައްސަލައެއް ނާދޭ" ހަބީބް ވިދާޅުވި އެވެ.
ހޮނިހިރު ދުވަހުގެ އިންތިހާބުގައި މާލޭ މޭޔަރުކަމަށް މީހަކު އިންތިހާބުކުރުމަށާއި މާފަންނު ދެކުނު ދާއިރާ އާއި ހެންވޭރު ދެކުނު ދާއިރާ އާއި މެދުހެންވޭރު ދާއިރާއަށް ކައުންސިލަރުން ހޮވުމަށް ވޯޓުލުން ކުރިއަށް ގެންދިޔަ އެވެ.
މޭޔަރުކަމަށް އިންތިހާބުކުރީ އެމްޑީޕީގެ ކެންޑިޑޭޓު އާދަމް އާޒިމެވެ. ހެންވޭރު ދެކުނާއި މާފަންނު ދެކުނު ދާއިރާ ކާމިޔާބުކުރީ ވެރިކަން ކުރާ ޕާޓީ ޕީއެންސީއިންނެވެ. އިދިކޮޅު އެމްޑީޕީން ކާމިޔާބުކުރީ މެދު ހެންވޭރު ދާއިރާ އެވެ.
މާލެ ސިޓީ ކައުންސިލުގެ ބައި އިލެކްޝަނުގައި ވޯޓު ދިނީ 17،442 މީހުންނެވެ. އެއީ ވޯޓުލުމުގެ ހައްގު ލިބޭ މީހުންގެ 31.8 އިންސައްތަ އެވެ. މި އިންތިހާބުގައި ވޯޓުލުމުގެ ހައްގު 54،680 މީހުންނަށް ލިބުނެވެ. މިއީ މިފަހުގެ ތާރީހެއްގައި މާލެ ސިޓީން އެންމެ މަދު އަދަދަކަށް ވޯޓާ ލާން މީހުން ނިކުތް އިންތިހާބެވެ.
