މާލެ ސިޓީ ކައުންސިލުން ހުސްވެފައިވާ މެންބަރުންގެ ގޮނޑިތަކަށް މީހުން އައްުޔަންކުރުމަށް ބޭއްވި އިންތިހާބުގައި ވެރިކަން ކުރާ ކޯލިޝަނުގައި ހިމެނޭ ކޮންގްރެސް ޕާޓީން ދެ ގޮނޑި އަދި އެމްޑީޕީއިން އެއް ގޮނޑި ކާމިޔާބުކޮށްފި އެވެ.
މިއަދުގެ އިންތިހާބުގައި މާފަންނު ދެކުނު ދާއިރާ އާއި ހެންވޭރު ދެކުނު ދާއިރާ އާއި މެދުހެންވޭރު ދާއިރާއަށް ކައުންސިލަރުން ހޮވުމަށް ވޯޓުލުން ކުރިއަށް ގެންދިޔަ އެވެ. މީގެ ތެރެއިން ކޮންގްރެސް ޕާޓީ (ޕީއެންސީ)އަށް ކާމިޔާބު ކުރެވުނީ ހެންވޭރު ދެކުނާއި މާފަންނު ދެކުނެވެ. އެމްޑީޕީން ކާމިޔާބުކުރީ މެދު ހެެންވޭރެވެ.
މާލެ ސިޓީ ކައުންސިލުގެ ބައި-އިލެކްޝަނުގެ ނަތީޖާ
- ހެންވޭރު ދެކުނު ދާއިރާ - އައިމިނަތު އަހުމަދު ރިޝްފާ (ޕީއެންސީ)
- މެދު ހެންވޭރު ދާއިރާ - އަހުމަދު ރިލުވާން ރަޝީދު (އެމްޑީޕީ)
- މާފަންނު ދެކުނު ދާއިރާ - ހަސަން ނިޒާމު (ޕީއެންސީ)
މި ގޮނޑިތައް ޕީއެންސީން ކާމިޔާބުކުރުމާ ގުޅިގެން މާލެ ސިޓީ ކައުންސިލުގެ ބޮޑު އަގުލަބިއްޔަތެއް އޮތީ އެ ޕާޓީއަށެވެ. މިހެން ނަމަވެސް މިއަދު ކުރިއަށް ދިޔަ މާލެ މޭޔަރުގެ އިންތިހާބު އެމްޑީޕީގެ ކެނޑިޑޭޓު އާދަމް އާޒިމް ކާމިޔާބުކުރެއްވުމާ ގުޅިގެން ޕީއެންސީގެ ސުޕަ މެޖޯރިޓީ އޮތް ކައުންސިލުން މަސައްކަތް ކުރަން ޖެހޭނީ އިދިކޮޅު ފިކުރުގެ މޭޔަރެއްގެ ދަށުންނެވެ.
އާޒިމް އިންތިހާބު ކާމިޔާބުކުރެއްވީ އެންމެ ގާތުން ވާދަކުރެއްވި ޕީއެންސީގެ ކެނޑިޑޭޓު އާޒިމާ ޝަކޫރުގެ މައްޗަށް 2595 ވޯޓުން ކުރި ހޯއްދަވައިގެންނެވެ.
