އަންނަ ރައްޔިތުންގެ މަޖިލީހުގެ އިންތިހާބަކީ ރާއްޖޭގައި އަލަށް ރޯދަ މަހެއްގައި ބާއްވަންޖެހޭ އިންތިހާބަށް ވުމާއެކު ކިޔޫ ދިގުނުވެ ވޯޓުލުން އަވަސް ކުރުމަށްޓަކައި 700 ވަރަކަށް ވޯޓު ފޮށި ބަހައްޓާނެ ކަމަށް އިލެކްޝަންސް ކޮމިޝަންސްގެ ނައިބު ރައީސް އިސްމާއީލް ހަބީބު ވިދާޅުވެއްޖެ އެވެ.
ވިހި ވަނަ ރައްޔިތުންގެ މަޖިލީހުގެ އިންތިހާބު ބާއްވަން ތާވަލްކޮށްފައި ވަނީ މާޗު 17، ގަ އެވެ. އެއީ ރޯދަ މަހުގެ ފުރަތަމަ ދިހައިގެ ތެރެ އެވެ. މީގެ ކުރިން ރާއްޖޭގައި ގައުމީ ފެންވަރެއްގެ އެއްވެސް އިންތިހާބެއް ރޯދަ މަހާ ދިމާވެފައެއް ނެތެވެ. މި އަހަރުގެ ރޯދަ މަސް ފެށޭނީ މާޗު 11، ގަ އެވެ.
ހަބީބު "އަދަދު" ނޫހަށް ވިދާޅުވީ ރިޔާސީ އިންތިހާބުގެ ތަޖުރިބާއަށް ބަލާއިރު، ވޯޓު ފޮށި ގިނަކޮށް، ފޮއްޓަކަށް ވޯޓުލާ މީހުންގެ އަދަދު މަދުކުރުމުން ފަސޭހަ ކަމާއެކު، ހަލުވިމިނެއްގައި ވޯޓުލުން ކުރިއަށްދާ ކަމަށެވެ. ރިޔާސީ އިންތިހާބަށް ވުރެ މަޖިލީހުގެ އިންތިހާބަށް ވޯޓު ފޮށީގެ އަދަދު އިތުރުކުރަން ނިންމީ ރޯދަ މަހު ވޯޓުލުން އަވަހަށް ބާރަށް ކުރިޔަށް ގެންގޮސް ނިންމުމަށް ކަމަށާއި މީހުންނަށް އިތުރަށް ފަސޭހަ ކުރުމަށް ކަމަށް ހަބީބު ވިދާޅުވި އެވެ.
"އެވްރެޖްކޮށް ފޮއްޓަކަށް ރެޖިސްޓްރީ ކުރާނީ 500 މީހުން. އެންމެ ގިނަ ވެގެން ވެސް ބައެއް ފޮށިތަކަށް 600 މީހުން،" ހަބީބު ވިދާޅުވި އެވެ.
އިންތިހާބުގައި ބަހައްޓާ ވޯޓު ފޮށީގެ ޖުމުލަ އަދަދު ފައިނަލް ވާނީ ރީ-ރެޖިސްޓްރޭޝަނަށް ފަހު ކަމަށް އޭނާ ވިދާޅުވި އެވެ.
ރިސޯޓުތަކާއި ރާއްޖޭން ބޭރުގައި ވޯޓު ފޮށި ބެހެއްޓުން
މަޖިލީހުގެ އިންތިހާބުގައި ރާއްޖޭން ބޭރު ގައުމުތަކުގައި ވޯޓު ފޮށި ބަހައްޓާނީ ދިވެހި އެމްބަސީއެއް ނުވަތަ ކޮންސިއުލޭޓު އޮފީހެއް ހުންނަ، އަދި މަދުވެގެން 150 މީހުން ރެޖިސްޓްރީކުރާ ގައުމުތަކުގައި ކަމަށް ހަބީބު ވިދާޅުވި އެވެ. އަދި މަދުވެގެން 30 މީހުން ރެޖިސްޓްރީކުރާ ރިސޯޓުތަކާއި ސިނާއީ ރަށްތަކާއި ހަދަމުންދާ ރަށްތަކުގައި ވެސް ވޯޓު ފޮށި ބަހައްޓާނެ ކަމަށް ހަބީބު ވިދާޅުވި އެވެ.
މިހާރު ހިނގަމުންދާ 19 ވަނަ ރައްޔިތުންގެ މަޖިލީހުގައި 87 މެމްބަރުން ތިއްބެވިއިރު، އާ މަޖިލީހުގައި 93 މެމްބަރުން ތިއްބަވާނެ އެވެ.
އިލެކްޝަން ކޮމިޝަނުން މިހާރު ތައްޔާރުކޮށްފައިވާ ވޯޓާސް ލިސްޓުގައި މާޗު 17، ވަނަ ދުވަހާ ހަމައަށް އުމުރުން 18 އަހަރު ފުރޭ މީހުންނާއެކު ވޯޓުލުމުގެ ހައްގު ލިބިގެންވާ މީހުންގެ ޖުމުލަ އަދަދަކީ 284،327 އެވެ. އެއީ 139،165 އަންހެނުން އަދި، 145،162 ފިރިހެނުން ނެވެ.
