މާލެ ސިޓީ ކައުންސިލުގެ ހުސްވެފައިވާ މަގާމުތަކަށް މީހުން އިންތިހާބުކުރުމަށް މިއަދު ބާއްވާ އިންތިހާބުގައި މިހާތަނަށް ވޯޓުދިނީ، ވޯޓުލުމުގެ ހައްގު ލިބޭ މީހުންގެ ދެ ޕަސެންޓުކަމަށް އިލެކްޝަން ކޮމިޝަން (އީސީ)އިން ބުނެފި އެވެ.
މިއަދު 9:00 އާ ހަމައަށް ވޯޓުލީ މީހުންގެ ޖުމްލަ އަދަދަކީ 1204 މީހުން ކަމަށް އިލެކްޝަން ކޮމިޝަނުން ބުނެ އެވެ. މި އިންތިހާބުގައި ވޯޓު ލުމުގެ ހައްގު ލިބޭ މީހުންގެ އަދަދަކީ 56002 މީހުންނެވެ.
މީގެ ކުރިން ބޭއްވި އިންތިހާބުތަކުގައި، ވޯޓުލުން ފަށައި ފުރަތަމަ ދެ ގަޑިއިރެއްހާއިރަކީ އެންމެ ގިނަ ބަޔަކު ވޯޓުލާން ނިކުންނަ އެއް ވަގުތެވެ. ރިޔާސީ އިންތިހާބުގައި ވެސް ފުރަތަމަ ދެ ގަޑިއިރު ތެރޭގައި 12 ޕަސެންޓު މީހުން ނިކުމެ ވޯޓު ދިނެވެ.
މާލޭގެ މޭޔަރާއި ސިޓީ ކައުންސިލުން ހުސްވެފައިވާ ކައުންސިލަރުންގެ މަގާމުތަކަށް މީހުން ހޮވުމަށް މިއަދު ކުރިއަށް ގެންދާ އިންތިހާބުގައި ވޯޓު ދިނުމަށް މާލެ، ހުޅުމާލެ އަދި ވިލިމާލޭގެ އެކި ވޯޓުލާ މަރުކަޒުތަކުގައި ޖުމްލަ 58 ވޯޓު ފޮށި ބަހައްޓާފައި ވެއެވެ. މިހާތަނަށް ވޯޓުލާ މަރުކަޒުތައް ފެންނަމުން ދަނީ މީހުން މަދުކޮށެވެ.
މިއަދު ބާއްވާ މާލެ ސިޓީ ކައުންސިލުގެ ހުސްވެފައިވާ މަގާމުތަކަށް މީހުން ހޮވުމުގެ އިންތިހާބުގެ ވޯޓުލުން ފެށީ ހެނދުނު 8:00 ޖެހި އިރެވެ. ވޯޓުލުން ނިމޭނީ މިއަދު ހަވީރު 5:00 ޖަހާއިރެވެ.
މިއަދުގެ އިންތިހާބުގައި މޭޔަރު ކަމަށް ވާދަ ކުރަނީ ފަސް ކެންޑިޑޭޓުންނެވެ. އެއީ:
- ޝުއައިބު އަލީ (އަމިއްލަ ގޮތުން)
- ހުސެއިން ވަހީދު (އަމިއްލަ ގޮތުން ނަމަވެސް ކުރީގެ ރައީސް ޔާމީންގެ ތާއިދާއެކު)
- އާއިޝަތު އާޒިމާ ޝަކޫރު (ޕީއެންސީ)
- އާދަމް އާޒިމް (އެމްޑީޕީ)
- މުހައްމަދު ސައިފް ފާތިހު (ދަ ޑިމޮކްރެޓްސް)
މޭޔަރުގެ އިތުރުން މާފަންނު ދެކުނު ދާއިރާ އާއި ހެންވޭރު ދެކުނު ދާއިރާ އާއި މެދުހެންވޭރު ދާއިރާއަށް ކައުންސިލަރުން ހޮވުމަށް ވޯޓުލުން މިއަދު ކުރިއަށް ދާނެ އެވެ.
ވޭތުވެތިދަ 24 ގަޑިއިރު މާލެއަށް ވިއްސާރަވެ ގަދަޔަށް ވާރޭ ވެހުނެވެ. އެހެންކަމުން މޫސުން ގޯސްވެދާނެ ކަމަށް ކުރިން ލަފާ ކުރެވިފައި އޮތުމުން، ވޯޓުލުން ނިންމާ ގަޑި ވަނީ ހަވީރު 5:00 އަށް އިތުރުކޮށްފައި ވެއެވެ. ނަމަވެސް މިއަދުގެ މިހާތަނަށް މާލޭގެ މޫސުން ފެންނަނީ ރަނގަޅުކޮށެވެ.
