މާލޭގެ ގެއެއްގެ ތެރެއިން މަސްތުވާތަކެތި ހުރި ކަމަށް ބެލެވޭ ވޭޕް ކާޓްރިޖްތަކަކާއި އަދި ގިނަ އަދަދެއްގެ ދިވެހި ފައިސާ އަތުލައިގަނެފި އެވެ.
މި މައްސަލައިގައި މިދިޔަ އަންގާރަ ދުވަހުގެ ރޭ ހައްޔަރުކޮށްފައިވަނީ 25 އަހަރުގެ ދިވެހި ފިރިހެނަކާއި 32 އަހަރުގެ ދިވެހި އަންހެނެކެވެ.
އެ ދެ މީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް އިއްޔެ ހާޒިރު ކުރުމުން 25 އަހަރުގެ މީހާގެ ބަންދަށް 15 ދުވަސް ދީފައިވާއިރު، 32 އަހަރުގެ މީހާ ވަނީ ޝަރުތުކުރުމަށް ފަހު ދޫކޮށްލާފަ އެވެ.
މި މައްސަލައާ ގުޅިގެން ފުލުހުން ބުނީ ކޯޓު އަމުރެއްގެ ދަށުން މާލޭގެ ގެއެއް ބަލައިފާސްކުރިއިރު، މަސްތުވާތަކެތި ކަމަށް ޝައްކުކުރެވޭ އެއްޗެއް ހުރި 11 ވޭޕް ކާޓްރިޖް އަދި ގިނަ އަދަދެއްގެ ދިވެހި ފައިސާ ފެނިފައިވާކަމަށެވެ. އަދި މި މައްސަލާގައި ހައްޔަރުކޮށްފައިވާ އެކަކު ދުއްވާ ސައިކަލުގެ މަޑިދަށުން މަސްތުވާތަކެތި ހުރި ކަމަށް ބެލެވޭ 17 ވޭޕް ކާޓްރިޖް ފެނިފައި ވާކަމަށް ފުލުހުން މައުލޫމާތު ދެ އެވެ.
ފުލުހުންގެ ޑްރަގް އެންފޯސްޓްމަންޓުން ދަނީ މި މައްސަލަ އިތުރަށް ތަހުގީގު ކުރަމުންނެވެ.
