އާ ކޮމިޝަނާ އޮފް ޕޮލިސް އަލީ ޝުޖާއުއާ، ޕްރޮސެކިއުޓާ ޖެނެރަލް ހުސައިން ޝަމީމް ބައްދަލުކުރައްވައި ނުހައްގު މުއްސަނދިކަން ހުއްޓުވުމާ ގުޅޭ ގޮތުންނާއި ދެ މުއައްސަސާ ގުޅިގެން ކުރެވިދާނެ އެކި މަސައްކަތްތަކާ ގުޅޭ ގޮތުން މަޝްވަރާ ކުރައްވައިފި އެވެ.
ޕީޖީ އޮފީހުން ބުނި ގޮތުގައި މި ބައްދަލުވުމުގައި ޑެޕިއުޓީ ޕްރޮސިކިއުޓާ ޖެނެރަލް މަހުމޫދު ސަލީމާއި ޑެޕިއުޓީ ޕްރޮސިކިއުޓާ ޖެނެރަލް އަލީ ސަމީރާއި، ދެ އިދާރާގެ އިސްވެރިން ބައިވެރިވެވަޑައިގެންނެވި އެވެ.
ބައްދަލުވުމުގައި ކުރެއްވި އެއް މަޝްވަރާއަކީ ކުށް ކުރާ މީހުން، ކުށްކޮށްގެން ހޯދާ މުދަލާއި ފައިސާއާއި ހައްގު ނޫން މުއްސަނދިކަން ހުއްޓުވުމަށް އަޅާނެ ފިޔަވަޅުތަކާ ގުޅޭ ގޮތުންނެވެ. އަދި ކުށުގެ ޝިކާރައަށްވާ މީހުންނަށް ފޯރުކޮށްދެވިދާނެ އެހީތެރިކަމާ ގުޅޭ ގޮތުން ވެސް ވާހަކަ ދެއްކެވި އެވެ.
ކޮމިޝަނާ އޮފް ޕޮލިސް ޝުޖާއުގެ ފަރާތްޕުޅުން މަސްތުވާތަކެތި ބޭނުންކުރާ މީހުނާއި، އެ ތަކެތީގެ ވިޔަފާރި ކުރާ މީހުންގެ އިތުރަށް ގޭންގުތަކުން ހިންގާ ކުށުގެ އަމަލުތައް ހުއްޓުވަން ފުލުހުންގެ މުއައްސަސާއިން ހިންގަން ރާވާފައިވާ ޕްރޮގްރާމްތަކުގެ މައުލޫމާތުތައް ޕީޖީ އޮފީހަށް ހިއްސާ ކުރެއްވި ކަމަށް ބުންޏެވެ.
މީގެ އިތުރުން، މުވައްޒަފުން ތާޒާކުރުމަށް ޕްރޮގްރާމްތަކާއި އިންޓާންޝިޕް ޕްރޮގްރާމްތައް ހިންގުމާ ބެހޭ ގޮތުން ފުޅާ ދާއިރާއެއްގައި މަޝްވަރާކޮށް، ކުރިއަށް ދާނެ ގޮތްތަކެއް ކަނޑައެޅުނު ކަމަށް ވެސް ޕީޖީ އޮފީހުން ބުންޏެވެ.
