ރާއްޖެއާ ދެކޮޅަށް އިންޑިއާއިން އެންޓި ކެމްޕޭނު ކުރަމުންދިޔަ ނަމަވެސް ފާއިތުވި 24 ގަޑިއިރުތެރޭގައި މުޅި ދުނިޔޭގެ ގޫގުލް ސާޗް ޓްރެންޑުގައި އިންޑިއާގެ ލަކްޝަދީޕުގެ މައްޗަށް ރާއްޖެ ކުރި ހޯދައިފި އެވެ.
ގޫގުލް ޓްރެންޑްސްއިން ދައްކާ ގޮތުގައި ރާއްޖެ ބޮއިކޮޓު ކުރުމަށް ގޮވާލައި ކެމްޕޭނެއް ކުރަމުންދާ އިންޑިއާގެ ގޫގުލް ސާޗް ޓްރެންޑުގައި ވެސް ރާއްޖެ އުޅެނީ ކުރީގަ އެވެ. ފާއިތުވި 24 ގަޑިއިރުގެ އިންޑިއާގެ ސާޗް ޓްރެންޑުގައި ރާއްޖެ އާއި ލަކްޝަދީޕް އަޅައިކިޔާލުމުން ރާއްޖެއަށް ލިބެނީ 54 ޕަސެންޓެވެ. ލަކްޝަދީޕަށް ލިބެނީ 46 ޕަސެންޓެވެ.
ފާއިތުވި 24 ގަޑިއިރު ދުނިޔޭގެ ގޫގުލް ޓްރެންޑްސްގައި ރާއްޖެއާއި ލަކްޝަދީޕް އަޅާ ކިޔާލުމުން ފެންނަ ނަތީޖާ. ރާއްޖެ (ނޫކުލައިން) ލަކްޝަދީޕް (ރަތް ކުލައިން)
ފާއިތުވި ހަތް ދުވަހުގެ ޑޭޓާއަށް ބަލާއިރު ވެސް މުޅި ދުނިޔެއިން ރާއްޖެއަށްވުރެ ގިނައިން ލަކްޝަދީޕް ސާޗް ކޮށްފައި ވަނީ ހަމައެކަނި އިންޑިއާއިންނެވެ. އިންޑިއާގެ ސާޗް ޓްރެންޑުގައި ރާއްޖެ އާއި ލަކްޝަދީޕް އަޅައިކިޔާލުމުން ލަކްޝަދީޕަށް 51 ޕަސެންޓު ލިބޭއިރު، ރާއްޖެއަށް 49 ޕަސެންޓު ލިބެ އެވެ.
ފާއިތުވި ހަތް ދުވަހުގެ ދުނިޔޭގެ ގޫގުލް ޓްރެންޑްސްގައި ރާއްޖެއާއި ލަކްޝަދީޕް އަޅާ ކިޔާލުމުން ފެންނަ ނަތީޖާ، ރާއްޖެ (ނޫކުލައިން) ލަކްޝަދީޕް (ރަތްކުލައިން)
އިންޑިއާ ފިޔަވައި އެހެން ހުރިހާ ގައުމެއްގެ ސާޗް ޓްރެންޑުގައި ރާއްޖެއާ ލަކްޝަދީޕް އަޅާ ކިޔާއިރު، ފާއިތުވި ހަތް ދުވަހުގެ ތެރޭގައި 40 ޕަސެންޓަށްވުރެ މަތި ލަކްޝަދީޕަށް ހޯދިފައެއް ނުވެ އެވެ.
އެއާ ހިލާފަށް އިޓަލީ އާއި ރަޝިޔާއާއި ސްޕެއިންގެ އިތުރުން ޖަރުމަނާއި ފްރާންސް ފަދަ ރާއްޖެއަށް އެންމެ ގިނަ ފަތުރުވެރިން އަންނަ ވިލާތު ގައުމުތަކުގެ ގޫގުލް ސާޗް ޓްރެންޑުގައި ރާއްޖެ އުޅެނީ 98 ޕަސެންޓަށް ވުރެ މަތީގަ އެވެ.
ކޮވިޑުގެ ކުރިން ރާއްޖެއަށް އެންމެ ގިނަ ފަތުރުވެރިން އަންނަ ޗައިނާގެ ގޫގުލް ސާޗް ޓްރެންޑުގައި ރާއްޖެ އުޅެނީ 91 ޕަސެންޓުގަ އެވެ.
ގޫގުލް ޓްރެންޑްސް ތައާރަފުވީންސުރެއް މިއަދާ ހަމައަށް ވެސް ލަކްޝަދީޕްއަށް ރާއްޖޭގެ މައްޗަށް އެއްވެސް އިރެއްގައި ކުރި ހޯދިފައެއް ނުވެ އެވެ.
އިންޑިއާއާއި ރާއްޖެއާ ދެމެދު މައްސަލަ އުފެދި ހޫނުވެގެން ދިޔައީ، އިންޑިއާގެ ޖަޒީރާ އަތޮޅެއްގެ ގޮތުގައި އޮންނަ ލަކްޝަދީޕް އަށް މޯދީ ކުރެއްވި ޒިޔާރަތުގެ ވީޑިއޯއަކާއެކު އިންޑިއާ މީހަކު ޖެނުއަރީ 4، ގައި އެކްސްގައި ކުރި ޕޯސްޓަކަށް، ރާއްޖޭގެ ތިން ޑެޕިއުޓީ މިނިސްޓަރުން ކޮށްފައިވާ ރިޕްލައިތަކަކާ ގުޅިގެންނެވެ.
"މިސްޓަ ސިންހާ" ގެ ނަމުގައި އުފައްދާފައިވާ އެކްސްގެ އެކައުންޓުން ކޮށްފައިވާ ޕޯސްޓުގައި ބުނެފައި ވަނީ މޯދީ ލަކްޝަދީބު ޕްރޮމޯޓު ކުރުމަކީ އެޅުއްވި މުހިއްމު ފިޔަވަޅެއް ކަމަށެވެ. އަދި ރާއްޖޭގައި މިހާރު އޮތީ ޗައިނާގެ ޕަޕެޓު ސަރުކާރެއް ކަމަށް އެ ޕޯސްޓުގައި ބުނެފައިވެ އެވެ.
އެ ޕޯސްޓަށް ރައްދެއްގެ ގޮތުގައި ޔޫތު މިނިސްޓަރީގެ ޑެޕިއުޓީ މިނިސްޓަރެއްގެ މަގާމުގައި ހުންނެވި، ޝިއުނާ ކުރެއްވި ޕޯސްޓުގައި މޯދީ އަކީ "ކްލައުނެއް" ކަމާއި އިޒްރޭލުގެ "ޕަޕެޓެއް" ކަމަށް ވިދާޅުވެފައިވެ އެވެ. އެ ޕޯސްޓާ ގުޅިގެން ޝިއުނާ އަށް އޮއްސައިލި ފާޑުކިޔުމާ ގުޅިގެން ފަހުން ޕޯސްޓް ވެސް ޑިލީޓުކުރެއްވި އެވެ. ހަމަ އެ މިނިސްޓަރީގެ ޑެޕިއުޓީ މިނިސްޓަރެއްގެ މަގާމުގައި ހުންނެވި މަލްޝާ ވެސް އިންޑިއާއާ ގުޅޭގޮތުން ކުރެއްވި ޕޯސްޓުޓުތައް ވެސް ފާޑުކިޔުން އަމާޒުވުމުން ފަހުން ޑިލީޑް ކުރެއްވީ އެވެ.
ފާއިތުވި ހަތް ދުވަހުގެ ތެރޭގައި ދުނިޔޭގެ އެކި ކަންކޮޅުން ރާއްޖެއާއި ލަކްޝަދީޕް ސާޗް ކޮށްފައި ހުރި މިންވަރު ދައްކުވައިދޭ ޗާޓެއް، ރާއްޖެ (ނޫކުލައިން) ލަކްޝަދީޕް (ރަތް ކުލައިން)
މި މައްސަލައިގައި އެކްސްގައި އުފެދުނު "ހަނގުރާމަ" ގޯސްވެގެން ދިޔައީ ބޮއިކޮޓްމޯލްޑިވްސް ކެމްޕޭނުގައި އިންޑިއާގެ ފިލްމީ ތަރިންނާއި ކުޅިވަރު ޝަހުސިއްޔަތުން ބައިވެރިވާން ފެށި ހިސާބުންނެވެ.
ބޮލީވުޑްގެ ތަރިންގެ މެދުގައި އެންމެ މަގުބޫލު މަންޒިލަކީ ރާއްޖެކަމަށް ވިޔަސް، މަޝްހޫރު ފިލްމީތަރިންތަކެއް އިއްޔެ ގޮވާލީ، ރާއްޖެއަށް ޒިޔާރަތް ކުރުމުގެ ބަދަލުގައި ލަކްޝަދީޕް ހިޔާރު ކުރުމަށެވެ. އެ ކެމްޕޭނުގައި އަކްޝޭ ކުމާރާއި ސަލްމާން ހާން އާއި ޝްރައްދަ ކަޕޫރާއި ޖޯން އަބްރަހަމާއި ޓައިގާ ޝްރޮފް އެކްސްގައި ޕޯސްޓު ކުރި އެވެ. އަދި މުޅި ދުނިޔެއަށް ވެސް މަޝްހޫރު ކްރިކެޓު ތަރި ސަޗިން ޓެންޑުލްކާ ވެސް ވަނީ އެފަދަ ބައިވެރިވެފަ އެވެ.
އެ ކެމްޕޭނާއެކު ރާއްޖޭގެ ޓޫރިޒަމް އިންޑަސްޓްރީން ވަނީ ކަންބޮޑުވުން ވެސް ފާޅުކޮށްފަ އެވެ.
މައްސަލަ ހޫނުވެފައި ވަނިކޮށް އިންޑިއާގައި ހުންނަވާ ރާއްޖޭގެ އެމްބަސެޑަރު ވަނީ އިންޑިއާގެ އެކްސްޓާނަލް އޮފީހަށް އިއްޔެ ހެނދުނު ހާޒިރުކޮށްފަ އެވެ. އަދި ރާއްޖޭގައި ހުންނަވާ އިންޑިއާގެ އެމްބަސެޑަރު ވެސް ވަނީ ރާއްޖޭގެ ފޮރިން މިނިސްޓަރީއަށް އިއްޔެ މެންދުރު ހާޒިރުކޮށްފަ އެވެ. ނަމަވެސް އެ ދެ ބައްދަލުވުމުގެ ތަފުސީލެއް މިހައިތަނަށް އެއްވެސް ފަރާތަކުން ރަސްމީކޮށް ހާމަކޮށްފައެއް ނުވެ އެވެ.
