ދިވެހި ފުލުހުންގެ ހިދުމަތުގެ އެންމެ އިސްވެރިޔާ ކަމަށްވާ, ކޮމިޝަނާ އޮފް ޕޮލިސްގެ މަގާމުގައި ހުންނެވި އަލީ ޝުޖާއު ފުލުހުން އުފެދިގެން އެންމެ ފުރަތަމަ ކޮމިޝަނަރުގެ މަގާމަށް ވަޑައިގެންނެވި އާދަމް ޒާހިރުއާ ބައްދަލުކުރައްވައިފި އެވެ.
އެކްސްގައި ކުރެއްވި ޕޯސްޓެއްގައި ޝުޖާއު ވަނީ އާދަމް ޒާހިރުއާ ސަލާމް ކުރައްވައި ވާހަކަ ދައްކަވާ ފޮޓޯތައް ހިއްސާކުރައްވާފަ އެވެ. އަދި, އެއީ ލިބިވަޑައިގެންނެވި ބޮޑު އުފަލެއް ކަމަށް ވިދާޅުވި އެވެ.
"އާދަމް ޒާހިރަކީ ފުލުހުންގެ ހިދުމަތް ފަށައި ފުލުހުންގެ ތެރެއިން ފާހަގަކުރެވޭ ޝަހުސިއްޔަތެއް. އަޅުގަނޑު ފުލުހުންގެ ހިދުމަތާ ގުޅުމަށް އާދަމް ޒާހިރުގެ ފަރާތުން ހިތްވަރުލިބުނު," ޝުޖާއު ވިދާޅުވެފައިވެ އެވެ.
އާދަމް ޒާހިރަކީ އެންމެ ފުރަތަމަ ސިފައިންގޭގައި ހިދުމަތް ކުރެއްވި ބޭފުޅެކެވެ. އޭނާ ސިފައިންގެ ހިދުމަތާ ގުޅިވަޑައިގެންނެވީ ނޮވެމްބަރު 12, 1978 ގަ އެވެ. ފުލުހުންގެ ހިދުމަތް ސިފައިންގޭގެ ތެރޭގައި އޮއްވައި އޭނާ ކޮމިޝަނަރަކަށް ރަސްމީކޮށް ހަމަޖެއްސީ ޖެނުއަރީ 6, 1996 ގަ އެވެ.
ސިފައިންނާއި ފުލުހުންނަކީ ވަކި ދެ މުއައްސަސާއެއް ކަމުގައި ހަމަޖެއްސުމާ އެކު ސެޕްޓެމްބަރު 1, 2004 ގައި ސިފައިންގެއިން އޭނާ ރިޓަޔާ ކުރެއްވި އެވެ. އެއަށްފަހު ނޮވެމްބަރު 18, 2008 ގައި ރިޓަޔާ ކުރައްވަން ދެން އޭނާ ހުންނެވީ ޕޮލިސް ކޮމިޝަނަރުގެ މަގާމުގަ އެވެ.
ކަސްޓޯޑިއަލް ޖަލުތަކުގައި މީހުންނަށް އަނިޔާ ކުރުމުގެ ސަގާފަތެއް ފުލުހުންގެ ތެރޭގައި އާލާވެގެންދިޔައީ އޭނާގެ ކޮމިޝަނަރަކަށް ހުންނެވިއިރު އެވެ. އެކަމާ ގުޅިގެން ގިނަ އަދަދެއްގެ ރައްޔިތުންގެ ނުރުހުމާއި ފާޑުކިޔުންތައް ވެސް އޭރުގެ ސަރުކާރަަށާއި އާދަމް ޒާހިރަށް އަމާޒުވި އެވެ.
އޭރު ވެރިކަން ބަދަލުވުމާ އެކު ކުރީގެ ރައީސް މުހައްމަދު ނަޝީދުގެ ސަރުކާރުން އުފެއްދި ރިޔާސީ ކޮމިޝަނަށް ވެސް އާދަމް ޒާހިރުގެ ކޮރަޕްޝަން މައްސަލަތަކެއްގައި ހާޒިރުކުރި އެވެ. އޭނާއަކީ 30 އަހަރުގެ ދިގު ވެރިކަމެއް ރާއްޖޭގައި ކުރެއްވި ކުރީގެ ރައީސް މައުމޫން އަބްދުލްގައްޔޫމްގެ އަރިސް ބޭފުޅެކެވެ.
އެގޮތުން, 2006 ގައި "އައްޑުވަސް" މަޖައްލާއިން ފަޅައިއަރުވާލި ކޮރަޕްޝަންގެ މައްސަލައެއްގައި ވެސް އޭނާގެ ނަން ހިމެނުނެވެ. އެއީ މައުމޫންގެ އަރިސް ބަޔަކަށް އެމަނިކުފާނު ދިން ޖުމުލަ 8.7 މިލިއަން ރުފިޔާގެ ލޯނުތަކާ ގުޅޭ މައްސަލައެކެވެ.
އާދަމް ޒާހިރުގެ މައްޗަށް އެޕްްރީލް 2013 ގައި ދައުވާ ކޮށްދިނުމަށް އެންޓި ކޮރަޕްޝަން ކޮމިޝަން (އޭސީސީ) އިން އޭރުގެ ޕްރޮސެކިއުޓާ ޖެނެރަލްގެ އޮފީހުގައި ވެސް އެދުނެވެ. އެއީ ފުލުހުންގެ ބަޖެޓުން 65,817ރ. އޭނާގެ އަމިއްލަ ބޭނުމަށް ހަރަދުކުރި ކަމުގެ ތުހުމަތުގަ އެވެ.
ކުރީގެ ރަައީސް އަބްދުالله ޔާމީންގެ ވެރިކަމުގައި 2017 ވަނަ އަހަރު އާދަމް ޒާހިރަށް ވަނީ ނިޝާން އަސްކަރީގެ ވެރިކަމުގެ އިއްޒަތް އަރުވާފަ އެވެ.
