ރާއްޖޭގެ ހަމައެކަނި "ޓްރޫ ފޮރެސްޓް"، ނުވަތަ ފޮރެސްޓެއްގައި ހުންނަ ހުރިހާ ޝަރުތުތަކެއް ފުރިހަމަވާ ހަމައެކަނި ސަރަހައްދު އޮންނަ ރަށް ކަމުގައިވާ ހދ. ކޭލަކުނުގައި އިކޯ ޓޫރިޒަމް ތަރައްގީކުރުމުގެ ޕްރޮޖެކްޓެއް ހިންގާތީ ތިމާވެށި ރައްކާތެރިކުރުމަށް ވަކާލާތުކުރާ ޖަމިއްޔާއެއް ކަމަށްވާ އީކޯކެއާ މޯލްޑިވްސްއިން ކަންބޮޑުވުން ފާޅުކޮށްފި އެވެ.
އިކޯކެއާ އިން އެކްސްގައި ކުރި ޕޯސްޓެއްގައި ބުނީ، ކޭލަކުނަކީ ގައުމީ ތަރިކައެއް ގޮތުގައި ހިމާޔަތް ކޮށްފައި އޮންނަން ޖެހޭ ރަށެއް ކަމަށެވެ. 'ބަޔޮސްފެއާ ރިޒާވް" ގެ ގޮތުގައި އެ ރަށް ކަނޑައަޅައި، ވީހާވެސް ބޮޑަކަށް މީހުން އެ ތަނަށް ވަދެ ނުކުމެ ބޭނުުން ކުރުން މަދުކުރުމަށް ވެސް އެ ޖަމިއްޔާއިން ބާރު އަޅަ އެވެ.
ރައީސް އޮފީހުގައި ރޭ ބޭއްވި ނޫސްވެރިންގެ ބައްދަލުވުމެއްގައި މިކަމުގެ މައުލޫމާތު ދެއްވަމުން ޕްރިންސިޕަލް އަންޑަ ސެކެޓްރީ ޓު ދަ ޕްރެޒިޑެންޓް އަބްދުﷲ ނާޒިމް އިބްރާހިމް ވިދާޅުވީ ރަށުގެ ގުދުރަތީ ވެއްޓަށް ގެއްލުން ކުޑަކުރުމުގެ ގޮތުން ސަރުކާރުން ވިސްނަނިީ ފަޅުތެރޭގައި ފްލޯޓިން ވިލާތައް އަޅަން ކަމަށެވެ.
"މި ރަށުގެ ފަރުތަކާއި މުރަކަތަކަށް އެއްވެސް ގެއްލުމެއް ނުވާނޭ ގޮތަށް މި ރަށަށް ޒިޔާރަތްކުރާ ފަރާތްތަަކަށް ހާއްސަކޮށްގެން ފްލޯޓިން ރޫމްސްތަކެއް އެޅޭނެ ގޮތެއް އޮއްތޯ ބަލައި، އެކަން ކުރެވޭނެ ގޮތެއް އޮއްތޯ ބަލައި ދިރާސާކުރަން ވިޒިޓާ އިކޮނޮމިކް ކައުންސިލުގެ މަޝްވަރާގައި ވަނީ ނިންމާފަ،" އޭނާ ވިދާޅުވި އެވެ.
ތިމާވެއްޓާ ރައްޓެހި ވިޒިޓާ ސެންޓަރެއް ގާއިމުކުރުމާއި އަދި ރަށުގެ ތާރީހާއި ރަށުގައި ހުރި ތާރީހީ ތަންތަނުގެ މައުލޫމާތު ދެވޭނެ އިންތިޒާމުތައް ހަމަޖެއްސުމަށް ސަރުކާރުން ވިސްނާފައިވެ އެވެ.
މީގެ ކުރިން، ކުރީގެ ރައީސް އަބްދުﷲ ޔާމީނުގެ ވެރިކަމުގައި ވެސް ކޭލަކުނު ޓޫރިޒަމަށް ހުޅުވާލުމުން އީކޯ ކެއާ އިން ކަންބޮޑުވުން ފާޅުކޮށްފައިވެ އެވެ. ކަނޑޫފަލާއި ޗަކަ ބިމުގެ ވަސީލަތްތަކުން ވެސް މުއްސަނދި އެ ރަށް ހިމާޔަތް ކުރުމަށް އެ ފަހަރު ތިމާވެށި ހިމާޔަތް ކުރުމަށް މަސައްކަތް ކުރާ ޖަމިއްޔާތަކުން ގޮވާލައިފައިވެ އެވެ.
ކޭލަކުނު އީކޯ ޓުއަރިޒަމަށް ތަރައްގީ ކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ. އުތުރުގެ ސަރަހައްދަކީ ޓުއަރިޒަމްގެ ވިޔަފާރި އެންމެ ދަށް އެއް ސަރަހައްދެވެ. ހއ. އަތޮޅުގައި ދެ ރިސޯޓެއް އޮޕަރޭޓް ކުރާއިރު ހދ. އަތޮޅުގައި ރިސޯޓެއް ނެތެވެ. އެ ސަރަހައްދުގައި ޓުއަރިޒަމް ފުޅާކުރުމަށް ހދ. ހަނިމާދޫ އިންޓަނޭޝަލް އެއާޕޯޓް ތަރައްގީ ކުރުމަށް މަޝްރޫއެއް މިދިޔަ ސަރުކާރުން ފެށި އެވެ.
