މިއަހަރުގެ ޅެންވެރިންގެ ދުވަސް މަޝްހޫރު ޅެންވެރިޔާ، މަރުހޫމް މުހައްމަދު ނަސީރުގެ ހަނދާނަށް ހާއްސަކޮށްގެން އޭނާގެ އުފަން ރަށުގައި ފާހަގަ ކުރުމަށް ލިޔުންތެރިންގެ ގުޅުމުން ނިންމައިފި އެވެ.
ކޮންމެ އަހަރަކުވެސް ލިޔުންތެރިންގެ ގުޅުމުން އިސްނަގައިގެން ފާހަގަކުރާ ޅެންވެރިންގެ ދުވަހުގެ މިއަހަރުގެ ހަރަކާތްތައް ކުރިއަށް ގެންދަނީ އއ. މާޅޮހު ކައުންސިލާއި އެރަށު ސްކޫލުގެ އިތުރުން ބައެއް މުއައްސަސާތައް ގުޅިގެންނެވެ.
މިމަހު 15 ގައި ފާހަގަ ކުރާ މިއަހަރުގެ ޅެންވެރިންގެ ދުވަހުގެ މުނާސަބަތުގައި އއ. އަތޮޅުގެ ސްކޫލްތަަށާއި އާންމުންނަށް ހުޅުވާލައިގެން ޅެންވެރިކަމާ ގުޅުންހުރި ބައެއް މުބާރާތްތައް ވެސް ބޭއްވުމަށް ހަމަޖެހިފައި ވާކަމަށް އެ ޖަމިއްޔާއިން މައުލޫމާތު ދެ އެވެ.
މުހައްމަދު ނަސީރުއަކީ ޅެންވެރިކަމުގެ ރޮނގުން ގިނަ ކާމިޔާބީތަކެއް ހޯއްދަވާފައިވާ މޮޅު ޅެންވެރިއެކެވެ. ޅެންވެރިކަމުގައި ނަސީރު އެންމެ ބޮޑަށް ފާހަގަ ކުރެވެނީ މަދަހަ އާއި ސަނާ އާއި ދުއާގެ ރޮނގުންނެވެ. އޭގެއިތުރުން, ތަފާތު އެހެން ދައިރާތަކުން ވެސް އޭނާ ވަނީ މޮޅު ޅެންތަކެއް ހައްދަވައިފަ އެވެ.
ނަސީރު ވަނީ ޅެން މުބާރާތްތަކުން ރަންވަނަތަކެއް ތަކުރާރުކޮށް ހޯއްދަވައިފަ އެވެ.
މިއަހަރުގެ ޅެންވެރިންގެ ދުވަސް ފާހަގަ ކުރުމަށް ބާއްވާ ހާއްސަ ރަސްމިއްޔާތުގައި ލިޔުންތެރިންގެ ގުޅުމުން ހުޅުވައިލި "ޅެންވެރިޔާ 2024" މުބާރާތުގެ ނަތީޖާ ފާޅު ކުރުމާއި ލިޔުންތެރިންގެ ގުޅުމުން ޝާއިއު ކުރާ "ޅެންވެރިޔާ: ގެ އަށްވަނަ އަދަދު ނެރުން އޮންނާނެ އެވެ.
އޭގެއިތުރުން އެ ރަސްމިއްޔާތުގައި މަރުހޫމް ނަސީރުގެ މަދަހަ ފޮތެއް ވެސް ނެރުމަށް ހަމަޖެހިފައި ވާކަމަށް ލިޔުންތެރިންގެ ގުޅުމުން ބުނެ އެވެ.
