ސަރުކާރުގެ ހަރަދުތައް ހަމަޖެއްސުމަށް 2.9 ބިލިއަން ރުފިޔާގެ ޓީ ބިލު ވިއްކަން އިއުލާނުކޮށްފި އެވެ.
ޓީބިލަކީ އިންޓަރެސްޓާ އެކު އަނބުރައި ދައްކާ ގޮތަށް ސަރުކާރުން ނަގާ ފައިސާ އެވެ. ސަރުކާރުގެ ކޭޝް ފްލޯ ހަމަޖެއްސުމަށް ބޭނުންވާ ފައިސާ ހޯދަން މޯލްޑިވްސް މަނިޓަރީ އޮތޯރިޓީ (އެމްއެމްއޭ) މެދުވެރިކޮށް ސަރުކާރުން ޓީ ބިލް ވިއްކުމަށް ކޮންމެ ހަފުތާއަކު އެއްފަހަރު ހުޅުވައިލަ އެވެ.
އާންމު ގޮތެއްގައި ޓީ ބިލް ވިއްކަނީ ޕެންޝަން ފަންޑާއި ބައެއް ބޭންކްތަކާއި ސަރުކާރު ހިއްސާވާ ބައެއް ކުންފުނިތަކާއި އަމިއްލަ ކުންފުނިތަކަށެވެ.
ފިނޭންސް މިނިސްޓްރީން އިއްޔެ ކުރި އިއުލާނުގައިވާ ގޮތުން އަންނަ އާދީއްތަ ދުވަހު ހަތަރު ޓީބިލެއް ވިއްކުމަށް ވަނީ ހަމަޖެހިފަ އެވެ. އެ ޓީބިލްތަކުގެ ޖުމުލަ އަގަކީ 2.9 ބިލިއަން ރުފިޔާ އެވެ.
މި އަހަރަށް ފާސްކޮށްފައިވާ ސަޕްލިމެންޓަރީ ބަޖެޓުގެ ހަރަދުތައް ހަމަޖައްސަން ބޭނުންވާ ފައިސާގެ ތެރެއިން އެތެރޭގެ ބާޒާރުން ތިން ބިލިއަން ރުފިޔާ ހޯދާނެ ކަމަށް ފިނޭންސް މިނިސްޓަރު ޑރ. މުހައްމަދު ޝަފީގުވެސް ވަނީ ވިދާޅުވެފަ އެވެ. އޭނާ ވިދާޅުވި ގޮތުގައި ބަޖެޓަށް ބޭނުންވާ ބާކީ ހަމަޖައްސާނީ އިގުތިސޯދު ކުރުމާއި ހަރަދުތައް ފަސްކުރުމުގެ ތެރެއިންނެވެ.
އާދީއްތަ ދުވަހު ވިއްކަން ނިންމާފައިވާ ޓީބިލްތަކުގެ ތަފުސީލު:
- 1.1 ބިލިއަން ރުފިޔާގެ ޓީބިލް: %3.5 އިންޓަރެސްޓުގައި 28 ދުވަސް ތެރޭ އަނބުރާ ދައްކަންޖެހޭ
- 263.4 މިލިއަން ރުފިޔާގެ ޓީބިލް: %3.8 އިންޓަރެސްޓްގައި 98 ދުވަހުން ތެރޭ އަނބުރާ ދައްކަންޖެހޭ
- 79 މިލިއަން ރުފިޔާގެ ޓީބިލް: %4.23 އިންޓަރެސްޓްގައި 182 ދުވަސް ތެރޭ އަނބުރާ ދައްކަންޖެހޭ
- 995.5 މިލިއަން ރުފިޔާގެ ޓީބިލް: %4.6 އިންޓަރެސްޓްގައި 364 ދުވަސް ތެރޭ އަނބުރާ ދައްކަންޖެހޭ
ކޭޝް ފްލޯ ހަމަޖެއްސުމަށް ބޭނުންވާ ފައިސާ ހޯދުމަށް ސަރުކާރަށް އަހަރެއްގެ މައްޗަށް ވިއްކޭނެ ޓީބިލުގެ އަދަދު ބަޖެޓާއެކީ އޮންނަނީ ފާސްކޮށްފަ އެވެ. ޓީބިލުތައް ވިއްކައިގެން ގިނަފަހަރު ހަމަޖައްސަނީ ކުރިން ވިއްކާފައި ހުންނަ ޓީބިލުތަކަށް ދައްކަންޖެހޭ ފައިސާ އެވެ.
ފިނޭންސްގެ ތަފާސްހިސާބުތަކުން އެނގޭގޮތުގައި މިދިޔަ ނޮވެމްބަރު މަހުގެ ހަ ވަނަ ދުވަހުގެ ނިޔަލަށް ސަރުކާރުން ވިއްކައި އަދި ފައިސާ ދައްކާފައި ނުވާ ސެކިއުރިޓީޒްގެ ޖުމުލަ 76.7 ބިލިއަން ރުފިޔާއަށް ވުރެ އިތުރެވެ. އޭގެ ތެރޭގައި ފައިސާ ނުދައްކާ 39.6 ބިލިއަން ރުފިޔާގެ ޓީބިލް ވެސް ހިމެނެ އެވެ.
