ރާއްޖެއަށް ލިބޭ ހުރިހާ ހައްޖު ކޯޓާއެއް، ހައްޖު ކޯޕަރޭޝަނަށް ލިބޭ ގޮތަށް އިސްލާމިކް މިނިސްޓްރީން އެއްބަސްވުމުގައި ސޮއިކޮށްފި އެވެ.
ހައްޖު ކޯޕަރޭޝަން އިތުރަށް ހަރުދަނާކޮށް ހައްޖަށް ދިއުމަށް ރައްޔިތުންގެ އަތުން ހޭދަވާ އަގު ކުޑަކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވައުދެކެވެ. ރާއްޖެއަށް ލިބޭ ހުރިހާ ހައްޖު ކޯޓާއެއް ހައްޖު ކޯޕަރޭޝަނަށް ދޭން ނިންމީ އެ މަސައްކަތުގެ ތެރެއިންނެވެ.
މިއަދު އިސްލާމިކް މިނިސްޓްރީއާއި ހައްޖު ކޯޕަރޭޝަނާ ދެމެދު ވަނީ އެކަމާ ގުޅޭ އެއްބަސްވުމުގައި ސޮއިކޮށްފަ އެވެ. މި އެއްބަސްވުމުގައި އިސްލާމިކް މިނިސްޓްރީގެ ފަރާތުން ސޮއިކުރެއްވީ މިނިސްޓަރު ޑރ. މުހައްމަދު ޝަހީމް އަހުމަދެވެ. އަދި ހައްޖު ކޯޕަރޭޝަނުގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު މުހައްމަދު ޝަކީލެވެ.
މި ރަސްމިއްޔާތުގައި މިނިސްޓަރު ޝަހީމް ވިދާޅުވީ، މި އެއްބަސްވުމާ އެކު ރައްޔިތުނަށް އެތައް ފަސޭހަތަކެއް ލިބި ހައްޖަށް ދިއުމަށް ހޭދަކުރަން ޖެހޭ އަގު ކުޑަވާނެ ކަމަށެވެ. އެ މަސައްްކަތް މިހާރު ވެސް ފެށިފައި ވާކަމަށް މިނިސްޓަރު ވިދާޅުވި އެވެ.
މިއީ ހައްޖަށް މީހުން ގެންދާ ގުރޫޕުތަކަށް އުނދަގޫކުރުމަށް ކުރިކަމެއް ނޫން ކަމަށާއި، މަގުސަދަކީ ހައްޖު ކޯޓާ ނުއަގުގައި ވިއްކުން ހުއްޓުވުމާއި، އޭގެ ސަބަބުން އާންމުންނަށް ލިބޭ ގެއްލުން ހުއްޓުވުން ކަމަށް މިނިސްޓަރު ވިދާޅުވި އެވެ.
ހައްޖަށްދާ މީހުންގެ އަތުން ހޭދަވާ އަގު ކުޑަކުރުމުގެ އިތުރުން، ވެރިކަމުގެ ދައުރުގެ ތެރޭގައި 1000 ފަގީރުން، ސަރުކާރު ހަރަދުގައި ހައްޖަށް ފޮނުވުމަކީ ވެސް ރައީސްގެ ވައުދެކެވެ. އިސްލާމިކް މިނިސްޓްރީން ވަނީ ފެށޭ އަހަރުގެ ތެރޭގައި ސަރުކާރު ހަރަދުގައި ހައްޖަށް ފޮނުވާ ފުރަތަމަ ބެޗު ފޮނުވާނެކަން އިއުލާނުކޮށްފަ އެވެ.
