ފުލުހުންނަށް ޕްރޮމޯޝަން ދިނުން ހުއްޓުވި މައްސަލަ ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ ނުވަތަ 241 ކޮމިޓީން ބަލަން ފަށައިފި އެވެ.
ފުލުހުންނަށް ޕްރޮމޯޝަން ދިނުން ހުއްޓުވުމަށް އެންޓި ކޮރަޕްޝަން ކޮމިޝަނުން ވަނީ ސިވިލް ކޯޓުގައި އެދިފަ އެވެ. އެއީ ވެރިކަން ބަދަލުވުމުގެ މަރުހަލާގެ ތެރޭގައި ކުއްލިއަކަށް މަތީ ރޭންކުތަކުގެ އޮފިސަރުންނަށް ޕްރޮމޯޝަން ދެމުންދާ ކަމަށް ބުނެ ހުށަހެޅި މައްސަލައަކާ ގުޅިގެންނެވެ.
މި މައްސަލަ ވަނީ މާދަމާ މެންދުރު 2:00 އަށް ތާވަލުކޮށްފައިވާ މަޖިލީހުގެ 241 ކޮމިޓީގައި އެޖެންޑާ ކޮށްފަ އެވެ.
"ދިވެހި ފުލުހުންގެ ހިދުމަތުގެ މުވައްޒަފުންނަށް ޕްރޮމޯޝަން ދިނުމުގެ މަސައްކަތް ހުއްޓުވަން މަސައްކަތް ކޮށްފައިވާ ކަމަށް ބުނެ ހުށަހަޅާފައިވާ މައްސަލަ ދިރާސާ ކުރުން" އެޖެންޑާގެ ފުރަތަމަ އައިޓަމެއްގެ ގޮތުގައި ނޯޓުކޮށްފައި ވެއެވެ.
އެ މައްސަލައިގެ އިތުރުން ސިފައިންގެ މަތީ މަގާމުތަކުގައި ތިއްބެވި ޖެނެރަލުން ރިޓަޔާ ކުރައްވަމުން ދަނީ މަޖުބޫރުން ކަމަށް ފާހަގަ ކުރެވޭތީ, އެކަން ބަލައި ދިނުމަށް އެދި ހުށަހަޅާފައިވާ މައްސަލަ ދިރާސާ ކުރަން ވެސް ކޮމިޓީގައި އެޖެންޑާ ކޮށްފައިވެ އެވެ.
ކޮމިޓީން މި މައްސަލަ ބަލާއިރު, ސަރުކާރު ބަދަލުވި ފަހުން މޭޖާ ޖެނެރަލް ހާމިދު ޝަފީގު އާއި, މޭޖާ ޖެނެރަލް ވައިސް ވަހީދު އަދި ރައީސް އިބްރާހިމް މުހައްމަދު ސޯލިހުގެ ވެރިކަމުގައި ޗީފް އޮފް ޑިފެންސް ފޯސްގެ މަގާމުގައި ހުންނެވި ލެފްޓިނަންޓް ޖެނެރަލް އަބްދުﷲ ޝަމާލް ވެސް ވަނީ ރިޓަޔާ ކުރައްވާފަ އެވެ. ނަމަވެސް މޭޖާ ޖެނެރަލް ހާމިދު ވަނީ ރައީސް މުއިއްޒުގެ އެޑްވައިޒަރަކަށް އައްޔަނުކޮށްފަ އެވެ.
ތިން ވަނަ ކަމަކަށް ކޮމިޓީގައި އެޖެންޑާ ކޮށްފައި ވަނީ ނިމިދިޔަ ވެރިކަމުގެ ސިޔާސަތުތަކުގެ ސަބަބުން ގައުމީ ސަލާމަތަށް އަސަރު ކޮށްފައިވާ ކަމަށް ބުނަމުންދާތީ އެކަމުގެ ހަގީގަތް ދެނެގަތުމަށް ޕަބްލިކް އެންކުއަރީއެއް ހިންގުމަށް ހުށަހަޅާފައިވާ ގަރާރާމެދު މަޝްވަރާ ކުރުމެވެ.
