ހދ. ކުޅުދުއްފުށިން ފައިލޭރިއާ އަށް ޕޮޒިޓިވް ވާ މީހުންނަށް ދޭންވާ ފަރުވާގެ ކަންކަން އިންތިޒާމު ކުރަމުންދާ ކަމަށް އެޗްޕީއޭ އިން ބުނެފި އެވެ.
ދުނިޔޭގެ އެއިޑްސް ދުވަހާ ގުޅިގެން އެޗްޕީއޭ އިން އިންތިޒާމުކޮށްގެން ކުޅުދުއްފުށީގައި މިމަހު ކުރިއަށްގެންދިޔަ ހެލްތް ސްކްރީނިން ޕްރޮގްރާމުގެ ތެރެއިން 17 ބިދޭސީއަކު ވަނީ ފައިލޭރިއާ އަށް ޕޮޒިޓިވް ވެފަ އެވެ.
އެކަމާއި ގުޅިގެން އެޗްޕީއޭއިން ނެރުނު ބަޔާނުގައި ބުނީ ފައިލޭރިއާ ބަލި ފެނުނު ބިދޭސީންނަކީ އެ ބަލި މިހާރުވެސް ފެންނަމުންދާ ނުވަތަ "އެންޑަމިކް" ސަރަހައްދުތަކުން އައިސްފައިވާ މީހުން ކަމަށެވެ.
އަދި މިހާތަނަށް ކުރެވުނު ޓެސްޓުތަކުން 17 މީހުން ބައްޔަށް ޕޮޒިޓިވް ވެފައިވާ ކަމަށާއި އެމީހުން ގައިގައި ބަލި ހުރިތޯ ޔަގީންކުރުމަށް އިތުރު ޓެސްޓުތައް ހަދަމުންދާ ކަމަށް ބުންޏެވެ.
އެޗްޕީއޭ އިން ބުނީ ރާއްޖޭން ފައިލޭރިއާ ފެނުމާއި ގުޅިގެން އިތުރަށް ބަލަންޖެހޭ ކަންކަން ބެލުމަށް ދުނިޔޭގެ ސިއްހަތު ޖަމިއްޔާ އާއިވެސް މިހާރު މަޝްވަރާ ކުރަމުންދާ ކަމަށެވެ.
ފައިލޭރިއާ ބައްޔަކީ މަދިރީގެ ޒަރިއްޔާއިން ފެތުރޭ، ގައިންގަޔަށް އަރާ ބައްޔެކެވެ.
ރާއްޖޭން އެންމެ ފަހުން ފައިލޭރިއާ ކޭސްއެއް ރިޕޯޓުކޮށްފައިވަނީ 2004 ވަނަ އަހަރު ލ. ފޮނަދޫއިންނެވެ. އެ ކޭސްއާއި ގުޅިގެން އެ ރަށުގެ ރައްޔިތުންނަށް ފަސް އަހަރު ވަންދެން ބޭސް ދެވުނުވެ. އޭގެ ފަހުން 2008 ވަނަ އަހަރުން ފެށިގެން ކުރި ސާވޭގައި ފައިލޭރިއާ ޖެހިފައިވާ މީހަކު ފެނިފައިނުވެ އެވެ.
