ތިން އަަހރު ތެރޭ ރާއްޖޭގެ ކޮންމެ އަތޮޅެއްގައި ވަގުޕް ޕްރޮޕަޓީއެއް ގާއިމްކުރައްވާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެ އެވެ.
އިސްލާމިކް މިނިސްޓްރީން ބާއްވާ އިސްލާމިކް ސޯޝަލް އިކޮނޮމީ ފޯރަމް ފެށުމުގެ ރަސްމިއްޔާތުގައި މިނިސްޓަރު ވިދާޅުވީ ރާއްޖޭގައި ވަގުފް ގާއިމު ކުރަން ބޭންކުތަކުން އެހީ ހޯދަން މަޝްވަރާ ކުރަމުންދާ ކަމަށެވެ. އެގޮތުން މޯލްޑިވްސް އިސްލާމިކް ބޭންކާއި ބީއެމްއެލް އިސްލާމިކްއާއެކު އެކަމުގެ މަޝްވަރާތައް ކުރަމުންދާ ކަމަށް ފާހަގަކުރެއްވި އެވެ.
މިނިސްޓަރު ވިދާޅުވި ގޮތުގައި އަމާޒަކީ ކުރިއަށް އޮތް ތިން އަހަރު ދުވަހުގެ ތެރޭގައި ކޮންމެ އަތޮޅެއްގައި ވަގުފް ޕްރޮޕަޓީއެއް ގާއިމްކުރުމެވެ.
"އަޅުގަނޑުމެން ބޭނުންވަނީ ކުރިއަށް އޮތް ތިން އަހަރު ދުވަހުގެ ތެރޭގައި މުޅި ރާއްޖޭގެ ކޮންމެ އަތޮޅެއްގައި ވަގުފް ޕްރޮޕަޓީއެއް ގާއިމުކުރަން. އިރާދަކުރެއްވިއްޔާ އެކަން އަޅުގަނޑުމެން ކުރާނަން،" މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ އަތޮޅުތަކުގައި އިސްލާމީ ކަންތައްތަކާއި އިޖުތިމާއީ އިސްލާމީ އެހީތެރިކަން ގާއިމުކުރުމަށްޓަކައި ފައިސާ ނެތް ކަމަށެވެ. ވަގުފް ޕްރޮޕަޓީއެއް ގާއިމްކުރުމުގެ މަސައްކަތް ކުރަމުންދަނީ އެކަންކަމަށް ބޭނުންވާ ފައިސާ ހޯދުމަށް ކަމަށް އޭނާ ވިދާޅުވި އެވެ.
ގާތްގަނޑަކަށް 200 މިލިއަން ރުފިޔާގެ އެންމެ ބޮޑު ވަގުފް އިންވެސްޓްމަންޓް ޕްރޮޖެކްޓް ހުޅުމާލޭގައި އަންނަ ޖެނުއަރީ މަހު ފަށަން ހަމަޖެހިފައިވާކަން ފާހަގަކުރައްވާ މިނިސްޓަރު ވިދާޅުވީ އެ މަޝްރޫއު ކާމިޔާބު ކަމާއެކު ނިމި, ދެ އަހަރެއް ތެރޭ އޭގެ ފައިދާ ލިބިގެންދާނެ ކަމަށެވެ. އޭރުން ރާއްޖޭގައި ތިބި ފަގީރުންނާއި މިސްކީނުންނަށް ދާއިމީ ގޮތެއްގައި ހައްޖަށް ދިއުމުގެ މަގު ފަހިވެގެންދާނެ ކަމަށް ވެސް މިނިސްޓަރު ވިދާޅުވި އެވެ.
