މެންޗެސްޓާ (ޑިސެމްބަރު 13) - އަމިއްލަ ދަނޑުގައި ރޭ ބަޔާން މިއުނިކް އަތުން 1-0 އިން ބަލިވެ، މެންޗެސްޓާ ޔުނައިޓެޑް، ޗެމްޕިއަންސް ލީގުގެ ގްރޫޕް ސްޓޭޖުގެ އިތުރުން މި ސީޒަނުގައި، ޔުއެފާ އިން ބާއްވާ ޔޫރަޕްގެ ހުރިހާ މުބާރާތަކުން ކަޓައިފި އެވެ.
ޔުނައިޓެޑް ދިޔައީ ގްރޫޕް އޭގެ ފުލަށެވެ. މިއާ އެކު، އެ ޓީމަށް ސީޒަނުގެ ބާކީ ހަ މަސް އޮއްވައި، ޔޫރަޕްގެ މުބާރާތްތައް ނިމުނީ އެވެ.
ގްރޫޕް އޭގެ އެއް ވަނަ ދިޔައީ، 16 ޕޮއިންޓް ހޯދި ބަޔާން އެވެ. ދެ ވަނަ އަށް ދިޔައީ ރޭ ގަލަސަތަރާއި 1-0 އިން ބަލިކުރި ކޯޕެންހާގެން އެވެ. ކޯޕެންހާގެން އަށް ވަނީ އަށް ޕޮއިންޓް ލިބިފަ އެވެ. ގްރޫޕްގެ ތިން ވަނަ ހޯދައިގެން ޔޫރޮޕާ ލީގުގެ ފުރުސަތު ހޯދީ ގަލަސަތަރާއި އެވެ. އެ ޓީމަށް ފަސް ޕޮއިންޓް ލިބުނެވެ. އެންމެ މޮޅެއް ލިބުނު ޔުނައިޓެޑް ނިންމާލީ ހަތަރު ޕޮއިންޓާ އެކު އެވެ.
އޯލްޑް ޓްރެފޯޑްގައި ރޭ ކުޅުނު މެޗުގެ ހަމައެކަނި ގޯލު ޖެހީ މެޗުގެ ދެ ވަނަ ހާފުގައި ބަޔާން މިއުނިކްގެ ކިންގްސްލީ ކޯމަން އެވެ. މިއީ ހެރީ ކޭން ދިން ބޯޅައަކުން ކޯމަން ޖެހި ގޯލެކެވެ. ބަޔާނަށް އިތުރު ގޯލެއް ޖަހަން މި މެޗުގައި އެންމެ ގިނަ ހުސް ފުރުސަތުތަކެއް ލިބުނީ ލެރޯއި ސާނޭ އަށެވެ.
އަނިޔާގެ ސަބަބުން ޔުނައިޓެޑްގެ ހެރީ މެގުއާ މި މެޗުގައި ބަދަލުކުރަން ޖެހުނުއިރު، އެ ޓީމުގެ މާކަސް ރަޝްފޯޑާއި އެންތަނީ މާޝިއަލް ރޭގެ މެޗު ސްކޮޑުގައި ނެތީ ބަލި ހާލަތުގެ ގޮތުންނެވެ.
ޔުނައިޓެޑް ކޮޅަށް މި ފަހަރުގެ ޗެމްޕިއަންސް ލީގުގައި 15 ގޯލު ވަދެފައިވެ އެވެ. މިއީ ޗެމްޕިއަންސް ލީގުގެ ގްރޫޕް ސްޓޭޖެއްގައި އިނގިރޭސި ޓީމެއް ކޮޅަށް އެންމެ ގިނަ ގޯލު ވަން ފަހަރެވެ. ރޭގެ މެޗަށް ފަހު ޔުނައިޓެޑްގެ ކޯޗު އެރިކް ޓެން ހާގް ބުނީ މެޗު ދިޔަ ގޮތަށް ބަލާއިރު، އެ ޓީމު ބަލިވުން ހައްގެއް ނޫން ކަމަށެވެ.
ގްރޫޕް ބީގައި ރޭ ޕީއެސްވީ އައިންދޯވަންއާ ދެކޮޅަށް ކުޅުނު މެޗުން އާސެނަލް ވަނީ 1-1 އިން އެއްވަރުވެފަ އެވެ. ޕީއެސްވީ ދަނޑުގައި އާސެނަލުން ލީޑުނެގީ އެޑީ އެންކެޓިއޭ ޖެހި ލަނޑުންނެވެ. މި އަހަރު އަމިއްލަ ދަނޑުގައި ބަލިނުވެ، ރެކޯޑް ދަމަހައްޓަމުން އަންނަ ޕީއެސްވީ އަށް އެއްވަރުކޮށްދިނީ ޔޯބޭ ވާޓެސެން އެވެ.
އާސެނަލުން މި ގްރޫޕްގެ އެއް ވަނަ ހޯދީ 13 ޕޮއިންޓާ އެކު އެވެ. ދެ ވަނަ އަށް ދިޔައީ ނުވަ ޕޮއިންޓް ހޯދި ޕީއެސްވީ އެވެ. ތިން ވަނަ އަށް ދިޔަ ލޯންސް އަށް އަށް ޕޮއިންޓް ލިބުނުއިރު، ފުލުގައި ނިންމާލި ސެވިއްޔާ އަށް ލިބުނީ ދެ ޕޮއިންޓެވެ.
