ރާއްޖޭގެ ކުރީގެ ރައީސުލްޖުމްހޫރިއްޔާ އަދި ރައްޔިތުންގެ މަޖިލީހުގެ ރައީސްކަމުން ދާދި ފަހުން އިސްތިއުފާ ދެއްވި މުހައްމަދު ނަޝީދު ސިޔާސީ ކަންކަމުން މިވަގުތަށް ދުރަށް ޖެހިވަޑައިގަތުމަށް ނިންމަވައި އެކަން އިއުލާންކުރައްވައިފި އެވެ.

ރާއްޖޭގެ އެންމެ މަގުބޫލު އެއް ސިޔާސީ ލީޑަރު މިގޮތަށް މި ނިންމެވީ އެމަނިކުފާނުގެ ވިދުވަރު ފަހަކަށް އައިސް ފަނޑުވެފައި ވަނިކޮށެވެ. މި އަހަރު ބޭއްވި އެމްޑީޕީގެ ރިޔާސީ ޕްރައިމަރީން ނާކާމިޔާބުވެވަޑައިގެންނެވުމުން، ނަޝީދު ވަނީ އެ ޕާޓީން ވަކިވެވަޑައިގެންފަ އެވެ.

އަލަށް އުފެއްދެވި ޑިމޮކްރެޓްސްގެ ފަރާތުން ރިޔާސީ އިންތިހާބަށް ކެންޑިޑޭޓަކު ނެރުއްވައި ކުރެއްވި ކެމްޕެއިނުން ލިބިވަޑައިގަތީ ތިން ވަނަ އެވެ. އަދި ރާއްޖޭގެ ވެރިކަން ބަރުލަމާނީ ނިޒާމަށް ބަދަލުކުރަން ކުރެއްވި މަސައްކަތް ވެސް ނާކާމިޔާބުވެވަޑައިގަތީ އެވެ.

އަދި މަޖިލީހުގެ ރައީސްކަމުގައި ހުންނަވަނިކޮށް އިތުބާރު ނެތް ކަމުގެ މައްސަލަ ހުށަހެޅުމުން، އެކަމާ ކުރިމަތިނުލައްވައި އެތައް ދުވަހެއް ހޭދަކުރެއްވުމަށް ފަހު، އެންމެ ފަހުން އިސްތިއުފާ ދެއްވީ އެވެ. ނަމަވެސް އަދިވެސް އެމަނިކުފާނަކީ މަޖިލީހުގެ މައްޗަންގޮޅީ މެދު ދާއިރާގެ މެމްބަރެވެ. ދައުރު ހަމަވާނީ އަންނަ އަހަރުގެ މޭ މަހު އެވެ.

ނަޝީދު މިރޭ އާއްމު ކުރެއްވި ބަޔާނެއްގައި ވިދާޅުވީ އެމަނިކުފާނު އަންނަ ޖެނުއަރީން ފެށިގެން މަސައްކަތް ކުރައްވާނީ ތިމާވެށްޓާ ބެހޭ ބައިނަލްއަގްވާމީ ޖަމިއްޔާއެއް ކަމަށްވާ ކްލައިމެޓް ވަލްނަރަބަލް ފޯރަމްގެ ސެކްރެޓަރީގެ ޖެނެރަލްގެ މަގާމުގައި ކަމަށެވެ. ނަޝީދުގެ ރައީސްކަމުގައި ރާއްޖެ އިސްކޮށް އޮވެ އުފެއްދި އެ ޖަމާއަތަށް މިހާރު 68 ގައުމު އިތުރުވެ މިހާރު އެއީ އިންޓަ ގަވަމަންޓަލް ޖަމާއަތެކެވެ.

"އަޅުގަނޑު ދެކޭ ގޮތުގައި މި ޖަމާއަތުގެ ވަޒީފާގައި ހުރެ، އަޅުގަނޑަށް ރާއްޖެ އަށް ހިދުމަތްކޮށްދެވޭ މިންވަރު އިންތިހާ އަށް ތަނަވަސްވާނެ އެވެ،" ބަޔާނުގައިވެ އެވެ.

ނަޝީދު ވިދާޅުވި ގޮތުގައި ސިޔާސީ މަސައްކަތުގައި އެންމެ ބޮޑަށް މަސައްކަތްކުރީ ގިނަ ޕާޓީ އެކުލެވޭ ވެރިކަމުގެ ނިޒާމެއް ފައްކާ ކުރުމަށް ކަމަށެވެ. އަދި ރާއްޖެ އަކީ އިސްލާމީ މަތިވެރި އުސޫލުތައް ހިފަހައްޓައި، އިންސާނީ ހައްގުތަކަށް އިހުތިރާމުކޮށް އަދި ރައްޔިތުންނަށް ދުލާއި، ގަލަމުގެ މިނިވަންކަން ކަށަވަރުކުރެވިފައިވާ ތަނަކަށް ހެދުމަށް ވެސް މަސައްކަތްކުރި ކަމަށް ވިދާޅުވި އެވެ.

"އަޅުގަނޑުގެ މި ސިޔާސީ މަސައްކަތުގައި އަޅުގަނޑަށް ވަނީ ނުހަނު އަނިޔާ އާއި ހިތާމަވެރިކަމާއި، އެކަނިވެރިކަން ލިބިފަ އެވެ. ޖަލުގެ އަނިޔާ އާއި އެތައް ފަހަރެއްގެ ބަންދު ތަހައްމަލު ކުރާން ޖެހުނެވެ. އަޅުގަނޑުގެ އާއިލާ އާއި ދުރުގައި އުޅެން ޖެހި، މުޅި ޒާތީ ހަޔާތް ބަރުބާދުވެފަ އެވެ. ބޮމުގެ ހަމަލާއިން މަރުގެ ތުންފަތް މައްޗަށް ހުށަހެޅިފަ އެވެ،"

ނަމަވެސް ނަޝީދު ވިދާޅުވީ މި މަސައްކަތުގައި އެމަނިކުފާނަށް ނުހަނު އުފާވެރިކަމާއި، ހިތްހަމަޖެހުން ވެސް ލިބިފައިވާ ކަމަށާއި، ބޮލުގައި އެޅިދިޔަ ކޮންމެ މަޅިއެއް މާފައްޗަކަށް ބަދަލުވި ކަމަށެވެ.

"މިކަމަށްޓަކައި އަޅުގަނޑު މާތް ރަސްކަލާނގެ އަށް އިންތިހާ އަށް ކުށްތަންވަމެވެ. ޝުކުރު ދަންނަވަމެވެ،"

ނަޝީދު ރިޔތާސީ އިންތިހާބުގެ ވޯޓު މަރުކަޒެއްގައި.

ނަޝީދު ވިދާޅުވީ ރައީސްކަމާއި ރައްޔިތުންގެ މަޖިލީހުގެ ރައީސްކަމުގެ މަގާމު އަދާކުރުމުގައި ވީ މިންވަރަކުން ރައްޔިތުންނަށް ހިދުމަތްކޮށްދިނިން ކަމަށާއި، އެންމެ ބޮޑަށް މަސައްކަތްކުރީ ރައްޔިތުންގެ އިޖުތިމާއީ ރައްކާތެރިކަން ހޯދައިދިނުމަށް ނިޒާމެއް ގާއިމްކުރުމަށާއި، ޓެކްސް ނިޒާމެއް ގާއިމްކުރަން ކަމަށެވެ.

"އަޅުގަނޑު ދެކޭ ގޮތުގައި މި ދެ ކަންތައް ވެސް ވަނީ ކޮންމެވެސް މިންވަރަކަށް ފުރިހަމަވެފަ އެވެ،"

ނަމަވެސް ނަޝީދު ވިދާޅުވީ ދައުލަތުގެ ހަރަދަށް ޒިންމާވުމާއި، ވެރިންގެ ހިޔާނާތްތެރިކަމުން ރާއްޖެ މިންޖުކުރުމަށް ކުރި އުއްމީދު ހަގީގަތަކަށް އަދި ބަދަލުނުވުމަކީ ހިތާމައެއް ކަމަށެވެ.

"އަޅުގަނޑުގެ އުއްމީދަކީ ދިވެހި ސަރުކާރާއި، ވެރިން ޖަވާބުދާރީ ކުރުމުގެ މަސައްކަތް އަންނާން އޮތް ޖީލުތަކުގެ މީސްތަކުން ކުރުމެވެ،"

ނަޝީދުގެ ސިޔާސީ ހަޔާތް

ތޮށިގަނޑު ފަޅާލާފައި ނުކުންނަން 1980ގެ އަހަރުތަކުގެ ފަހުކޮޅު ރައީސް މައުމޫން އަބްދުލްގައްޔޫމް ދިވެހި ނޫސްވެރިންނަށް ގޮވާލެއްވުމުން އެކަމަށް އެންމެ ފުރިހަމަ އިޖާބައެއް ދެއްވި އެކަކަކީ އޭރުގެ ޒުވާން ލިޔުންތެރިޔާ ނަޝީދެވެ. އިނގިރޭސި ވިލާތުން މެރިޓައިމް ދާއިރާ އިން ކިޔަވާވިދާޅުވެގެން ސަރުކާރުގައި ވެސް ދުވަސްކޮޅަކު މަސައްކަތްކުރެއްވި ނަޝީދު 1990 ވަނަ އަހަރު، ސަރުކާރަށް ފާޑުކިޔައި ނެރުނު "ސަންގު" އަދި "ހުކުރު" ގައި ގިނަ ލިޔުންތަކެއް ލިޔުއްވި އެވެ.

ނަޝީދާއި، އެހެން ވަރަށް ގިނަ ލިޔުންތެރިންގެ ލިޔުންތަކުގެ ޕްރެޝަރު ބޮޑުވެ ސަރުކާރުން އެ ދެ ނޫސް މަނާކުރި އެވެ. ސަންގުގެ ފަސް ވަނަ އަދަދަށް ފަހު 1992 ގައި ސަރުކާރުން އެ މަޖައްލާ ހުއްޓުވާ ނަޝީދާއި ޓީމު ހައްޔަރުކުރި އެވެ.

އޭގެ ތެރެއިން ވަރަށް ގިނަ ލިޔުންތެރިން އެހިސާބުން ގެއްލުނެވެ. ނަމަވެސް ނަޝީދުގެ މަގުސަދަކީ އޭރު ވެސް ސިޔާސީ އިސްލާހީ މަސައްކަތް ކަމުން އޭނާ ދިޔައީ ކުރިއަށެވެ. އެގޮތުން އެ އަދަބުން 1993 ގައި ސަލާމަތްވެވަޑައިގެން 1994 އިން ފެށިގެން ސްރީ ލަންކާގެ ނޫހަކަށް ލިޔުއްވި އެވެ. ނަތީޖާއަކަށްވީ "އަންނި" ގެ ނަމުން ނަޝީދު މުޅި ރާއްޖެ އަށް ސިޔާސީ އިސްލާހީ ހަރަކާތްތެރިއެއްގެ ގޮތުގައި މަޝްހޫރުވުމެވެ.

އޭނާ ހުއްޓުވަން ސަރުކާރުން މަސައްކަތްކުރީ ޖަލަށް ލައިގެންނެވެ. އެކަމަކު، ގާމާދޫ ޖަލުގެ ޓިނު ގޮޅިއަކަށް ވެސް ނަޝީދު އޮބަހެއްޓޭ ގޮތެއް ނުވި އެވެ. ދެން އޭނާ ނުކުންނެވީ 1999 ވަނަ އަހަރު ރައްޔިތުންގެ މަޖިލީހަށެވެ. މާލޭ ރައްޔިތުން އޭނާ އަށް ފުރިހަމަ ތާއީދެއް ދިނެވެ.

މަޖިލީހުގައި އޭނާ މަސައްކަތްކުރެއްވީ، އިސްލާހީ ފިކުރުގަ އެވެ. ސިޔާސީ ޕާޓީ އުފައްދަން ބިލެއް ހުށަހެޅުއްވި އެވެ. އެފަދަ ކަންކަމާ ހެދި މައުމޫން ސަރުކާރު އޮތީ ނަޝީދުގެ ގޮނޑި ގެއްލުވާލެވޭނެ ގޮތެއް ވޭތޯ ބަލަބަލަ އެވެ. އެހެން އޮއްވާ ވެލާނާގެއިން އުކާލަން ބަހައްޓާފައި ހުރި ކުނި ތަކެއް، ނަޝީދު ތާރީހީ ބޭނުމަކަށްޓަކައި ނެންގެވުން އެއީ ވައްކަންކަމަށް ބަލައި ސަރުކާރުން އޭނާ އަރުވާލި އެވެ. މަޖިލީހުގައި އޭނާގެ ދައުރު ފުރިހަމަ ކުރެވޭ ގޮތް ނުވީ އެވެ.

ނަޝީދު (ކ) ކުރީގެ ރައީސް ސޯލިހުއާ އެކު.

ނަމަވެސް އެ ފަހަރު މަޖިލީހުގެ ދައުރު ނިންމާނުލެވުނަސް އެއީ ނަޝީދުގެ ސިޔާސީ ހަޔާތުގެ އާ ދައުރެއްގެ ފެށުމެވެ. ބަންދުން ސަލާމަތްވެވަޑައިގެން އޭނާ ސީދާ ހަރަކާތަށް ނުކުންނެވި އެވެ. އެގޮތުން 2003 ގެ ސެޕްޓެމްބަރުގައި މާލޭގައި ހިނގި ހަމަނުޖެހުންތަކަށް ފަހު، ލަންކާއަށް ވަޑައިގެން، އަމިއްލައަށް އަރުވާލެވިގެން ހުންނަވާ އެމްޑީޕީގެ ހަރަކާތްތައް، އެހެން ވަރަށް ގިނަ ބޭފުޅުންނާ އެކު ފެށްޓެވި އެވެ.

އޭރު ރާއްޖޭގައި ސިޔާސީ ހަރަކާތް ހިންގުން ހުއްދައެއް ނޫނެވެ. ނަޝީދާއި އިސްލާހީ އެހެން ހަރަކާތްތެރިން ސަރުކާރަށް ކުރި ފިއްތުންތަކާއެކު އެ ހުއްދަ ލިބި އެމްޑީޕީ ރާއްޖޭގައި ރަޖިސްޓާ ކުރީ އޭޕްރިލް 30، 2005 ގަ އެވެ.

އެގޮތުން ހޯދުނު ކުރިއެރުންތަކާ އެކު ގިނަ ޕާޓީ ބައިވެރިވާ އިންތިހާބެއް 2008 ގައި ރާއްޖޭގައި ބޭއްވުމުގެ ފުރުސަތު ލިބުނެވެ. ނަޝީދު ވެގެންދިޔައީ އެ އިންތިހާބު ކާމިޔާބުކުރައްވައި، ރާއްޖޭގެ ޑިމޮކްރެޓިކް ފުރަތަމަ ރައީސަށެވެ.

ބޮޑު ތާއީދަކާއެކު ވެރިކަން ހޯއްދެވި ނަމަވެސް، ނަޝީދަށް ވެރިކަން ވެގެންދިޔައީ ބުރަ އިމްތިހާނަކަށެވެ. ދީނީ ޖަޒުބާތާއި، ސިޔާސީ ފޯރީގައި، 2012 ވަނަ އަހަރުގެ ޖެނުއަރީ މަހު ފެށި ސިލްސިލާ މުޒާހަރާތަކުގައ ނަތީޖާއަކީ ވެރިކަން ފުރޮޅާލުމެވެ. ފެބްރުއަރީ ހަތެއްގައި ނަޝީދު އިސްތިއުފާދެއްވި އެވެ. "ވެރިކަމުގައި ހުރެއްޖެނަމަ ރާއްޖެއަށާއި ރައްޔިތުންނަށް ނުހަނު ގެއްލުން ވެދާނެ ކަމަށް" ދެކިވަޑައިގަންނަވާތީ ކަމަށް ވިދާޅުވި އެވެ.

ޖެހިގެން އައި ދުވަހުން ފެށިގެން، ކުރީ ދުވަހު ހިނގީ ބަގާވާތެއް ކަމަށް ވިދާޅުވެ ވެރިކަމާ ދެކޮޅަށް ނުކުންނެވި އެވެ. އަދި ދެން އޮތް އަހަރު ބޭއްވި ރިޔާސީ އިންތިހާބުގައިވެސް އެމްޑީޕީގެ ޓިކެޓުގައި ވާދަކުރެއްވި އެވެ. ނަޝީދު ރެކޯޑް އަދަދަކަށް ވޯޓު ހޯއްދެއްވި ނަމަވެސް، ސުޕްރީމް ކޯޓުން ބާތިލްކުރި ފުރަތަމަ ބުރަށް ފަހު، ދެ ވަނަ ބުރުގައި ނާކާމިޔާބުވެވަޑައިގަތީ އެވެ،

ވެރިކަމުން އިސްތިއުފާދެއްވިތާ އަހަރެއްވީ މަހު، ރައީސް އަބްދުﷲ ޔާމީނުގެ ސަރުކާރުން ނަޝީދު އަނެއްކާވެސް ހައްޔަރުކުރި އެވެ. ޓެރަރިޒަމުގެ ކުށް ސާބިތުވާ ކަމަށް ނިންމާ 13 އަހަރުގެ ޖަލު ހުކުމެއް އެމަނިކުފާނަށް އިއްވި އެވެ. ނަމަވެސް، ޖެހިގެން އައި އަހަރުގެ މެއި މަހު މައިބަދައިގެ އޮޕަރޭޝަނަކަށް ނަޝީދު އިނގިރޭސި ވިލާތައް ވަޑައިގެން، އެ ގައުމުން ސިޔާސީ ހިމާޔަތް ހޯދި އެވެ. ނަމަވެސް، ހުކުމް ދެމި އޮތުމާއެކު 2018 ގެ އިންތިހާބުގައި ނަޝީދަށް ވާދައެއް ނުކުރެވުނެވެ. ޓިކެޓު ދޫކޮށްލެއްވީ ހަޔާތުގެ މިތުރު، ރައީސް އިބްރާހިމް މުހައްމަދު ސޯލިހަށެވެ.

އެނބުރި ގައުމަށް ވަޑައިގަތީ އެމްޑީޕީއިން އިންތިހާބު ކާމިޔާބުކޮށް، އެމަނިކުފާނަށް ކޮށްފައި އޮތް ހުކުމް ސުޕްރީމް ކޯޓުން ބާތިލުކުރުމާއެކު އޮކްޓޯބަރު 30، 2018 ގަ އެވެ.

ޖެހިގެން އައި އަހަރު އޮތް ރައްޔިތުންގެ މަޖިލީހުގެ އިންތިހާބުގައި މައްޗަންގޮޅި މެދު ދާއިރާއަށް ވާދަކުރައްވާ ކާމިޔާބު ކުރެއްވި އެވެ. އެމްޑީޕީއިން ސުޕަ މެޖޯރިޓީ ހޯދި 19 ވަނަ މަޖިލީހުގެ ރައީސް ކަމަށް ވެސް އިންތިހާބުވެވަޑައިގެންނެވި އެވެ.

ރައީސް ސޯލިހާއި ރައީސް ނަޝީދު އެކުގައި ފެށި މި ދައުރުގެ މެދުތެރެއިން، މެއި 6، 2021 ގައި ނަޝީދު އަވަހާރަކޮށްލަން ދިން ޓެރަރިސް ހަމަލާއާ އެކު، ދެ ރައީސުންގެ ގުޅުން ހީނަރުވާންފެށި އެވެ. ގިނަ އޮޕަރޭޝަންތަކާއި ފަރުވާއަށްފަހު އެނބުރި ވަޑައިގެން، ރައީސް ސޯލިހަށް ގޮންޖައްސަވާ ރިޔާސީ ޕްރައިމަރީގައި ވާދަކުރައްވާނެކަން 2022 ގެ މެދު ތެރޭ އިއުލާންކުރެއްވި އެވެ.

މި އަހަރު ޖެނުއަރީ 28 ގައި ބޭއްވި އެ ޕްރައިމަރީގައި، ނަޝީދަށް ލިބިވަޑައިގަތީ 39 އިންސައްތަ އެވެ. ރައީސް ސޯލިހު، އެމްޑީޕީގެ ޓިކެޓު ކާމިޔާބު ކުރެއްވީ 61 އިންސައްތަ ވޯޓުންނެވެ. ނާކާމިޔާބީގައި ނަޝީދު، އެމްޑީޕީގެ ތެރެއިން ސަރުކާރާއި ރައީސް ސޯލިހަށް ދެކޮޅަށް ފެއްޓެވި ހަރަކާތުގައި ގޮފި ފަޅާ، އާ ޕާޓީއެއްގެ ގޮތުގައި ރަޖިސްޓްރީވެގެންދިޔަ އެވެ. ދަ ޑިމޮކްރެޓްސް އުފެއްދުމުގެ މަސައްކަތްތައް ކުރެއްވިއިރު ނަޝީދު ހުންނެވީ އެމްޑީޕީގަ އެވެ. ޕާޓީގެ ރައީސްގެ މަގާމުގަ އެވެ.

ނަޝީދު އެމްޑީޕީ ދޫކުރެއްވީ، ޖޫން 6، 2023 ގައި އެމްޑީޕީއިން 54 މެންބަރުންގެ ސޮޔާއެކު އެމަނިކުފާނު މަޖިލީހުގެ ރައީސްގެ މަގާމުން ވަކިކުރަން ހުށަހެޅި މައްސަލައާ ގުޅިގެންނެވެ. އެ މަހު 21 ގައި ނަޝީދު ލިޔުއްވި ސިޓީގައި ވިދާޅުވީ، އެމްޑީޕީ އާއި ޕާޓީގެ ރައީސްކަމުން އިސްތިއުފާ ދެއްވީ "ރާއްޖޭގައި މިވަގުތު ކަންކަން ހިނގަމުންދާ ކަންކަމަށް ބަލާ އަޅުގަނޑު ތިޔަ ޕާޓީގައި ހުރުން އެއީ އެންމެ ރަނގަޅު ގޮތް ކަމަށް ނުދެކޭ ކަމުން،" ކަމަށެވެ.

ދައުރު ހަމަނުކުރައްވާ، ޕާޓީގެ ރައީސްކަން ދޫކުރައްވާ ވަޑައިގެން ޑިމޮކްރެޓްސް ޕާޓީއަށް ސޮއިކުރެއްވީ ޖުލައި 13، 2023 ގަ އެވެ. މި އަހަރުގެ ރިޔާސީ އިންތިހާބުގައި ވާދަކުރައްވަން ލިބުނު ފުރުސަތުގައި އެމަނިކުފާނު ފިޔަވަޅު އެޅުއްވީ ފަހަތަށެވެ.

މަޖިލީހުގެ ރިޔާސަތުގައި އިންނަވާ ނަޝީދު ވަނީ އެކި އުކުޅުތައް ކުޅުއްވާ، މަޖިލީހުގެ ދައުރު ނިމެންދެން އެ މައްސަލަ ހުއްޓުވާފަ އެވެ. މަޖިލީހުގައި މަރުތަޅު އެޅުއްވި އެވެ. ރިޔާސީ އިންތިހާބާ ހަމައަށް މައްސަލަ ދަންމަވާލި އެވެ.

ރިޔާސީ އިންތިހާބުގެ ފުރަތަމަ ބުރުގައި ތިން ވަނަ ޑިމޮކްރެޓުން ހޯދުމާއެކު، ދެ ވަނަ ބުރުގައި ނަޝީދާއި ޕާޓީގެ ތާއީދު ހޯދުމުގެ ބޭނުމުގައި ކުރިން ދެންނެވުނު މައްސަލަ އެމްޑީޕީއިން އަނބުރާ ގެންދިޔަ އެވެ. ނަމަވެސް، ނަޝީދާއި ޕާޓީން ރަސްމީކޮށް ވަކި ކޮޅަކަށް ނޭރި ނަމަވެސް، ރައީސް ސޯލިހަށް އެންޓި ކެމްޕޭން ކުރުމާއި އިދިކޮޅަށް ވާގިވެރިވުމުގައި ދެމި ތިއްބެވި އެވެ.

އިންތިހާބުން އެމްޑީޕީ ބަލިވެ، ނަޝީދުގެ މައްސަލަ އަލުން ވެއްދުމާއެކުވެސް ކުރިން ކުޅުނު ކުޅިބައި ރާވާލެއްވި އެވެ. ނަމަވެސް، އެމްޑީޕީއިން ދޫނުދީ، ނަޝީދުގެ މައްސަލަ ލަސްވަމުންދިޔުމާއެކު ސުޕްރީމް ކޯޓަށް ދުސްތޫރީ މައްސަލައެއް ވައްދާ ކާމިޔާބުކުރި އެވެ.

މަޖިލީހުގެ ކޮމިޓީތަކާއި، އަމީން އާއްމު އަދި ބަންޑާރަނައިބުގެ ލަފާގެ މަތިން، ނަޝީދުގެ މައްސަލަ އެޖެންޑާކޮށް ބޭއްވި ޖަލްސާ ފެށުމާއެކު ނަޝީދު ވަނީ އިސްތިއުފާދެއްވާފަ އެވެ. ސިޓީގައިވަނީ "އަޅުގަނޑަށް ފެންނަ ފެނުމުގައި، މަޖިލީހުގެ ރައީސް ކަމުގައި އަޅުގަނޑު އިތުރަށް ހުރެއްޖެނަމަ މަޖިލީހުގެ މެޖޯރިޓީ ޕާޓީން މަޖިލީހަށް ދޭ ގެއްލުން ދާނީ ބޮޑުވަމުން" ކަމަށެވެ.