މާލެ ސިޓީ ކައުންސިލުގެ މޭޔަރު ކަމަށް ކުރިން އެމްޑީޕީގައި އިސްކޮށް ހަރަކާތްތެރިވި ޝުއައިބު އަލީ (ފުރަހަނި ޝުއައިބު) ވާދަކުރައްވައިފި އެވެ.
ސިޓީ ކައުންސިލުގެ މޭޔަރު ކަމަށް ކުރިމަތިލެއްވުމަށް ޝުއައިބު ފޯމު ހުށަހެޅުއްވީ މިދިޔަ ބުރާސްފަތި ދުވަހު އެވެ. އިލެކްޝަންސް ކޮމިޝަނުން ވަނީ އޭނާގެ ކެންޑިޑެސީ ބަލައިގަތް ކަމުގެ ލިޔުން ވެސް ހަވާލުކޮށްފަ އެވެ.
އެމްޑީޕީ އުފެދުނީއްސުރެ އެ ޕާޓީގައި ހުރުމަށްފަހު ޝުއައިބު އެ ޕާޓީން ވަކިވީ, ޕާޓީގެ އެތެރޭގެ ހަމަނުޖެހުންތަކާ ހެދި އެވެ. އެއަށްފަހު އޭނާ ގުޅުނީ އެމްޑީއޭއާ އެވެ. އެހެން ނަމަވެސް, ނިމިދިޔަ ނޮވެމްބަރު މަސް ތެރޭގައި ޝުއައިބު ވަނީ އެ ޕާޓީން ވެސް ވަކިވެފަ އެވެ. މާލެ ސިޓީ ކައުންސިލުގެ މޭޔަރު ކަމަށް އޭނާ ކުރިމަތިލައްވަނީ އަމިއްލަ ގޮތުންނެވެ.
މާލެ ސިޓީގެ ރައްޔިތުންނަށް ފޮނުއްވި ސިޓީގައި ޝުއައިބު ވިދާޅުވީ, މޭޔަރު ކަމަށް ކުރިމަތިލެއްވީ މާލެ ސަރަހައްދަށް ދިމާވެފައިވާ ހުރިހާ މައްސަލަތައް ހައްލު ކުރުމުގެ އަމަލީ މަސައްކަތުގެ ބިންގާ އަޅައި ދިނުމަށް ކަމަށެވެ. އެ ސިޓީގައި އޭނާ ފާހަގަކުރެއްވި މައިގަނޑު ކަމަކީ މާލެ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލައާއި ތޮއްޖެހުމުގެ މައްސަލައަށް ހައްލު ހޯދައި ދިނުމަށް މަސައްކަތް ކުރައްވާނެ ކަމެވެ.
"އަޅުގަނޑަކީ މާލޭގައި ދިރިއުޅޭ އެންމެ އާދައިގެ ރައްޔިތުމިހާގެ ދިރިއުޅުމުގެ ހާލަތު އަބަދުމެ ދެކޭ މީހެކެވެ. އެ ރައްޔިތު މީހާގެ އަޑު އަބަދު އަހާ މީހެކެވެ. މާލެއަށް ދިމާވެފައިވާ ތޮއްޖެހުމާ ގޮއްޖެހުން އިޖުތިމާއީ އިގްތިސޯދީ މައްސަލަތައް ހޯދާބަލާ ދިރާސާކޮށް، އެ މައްސަލަ ތަކަށް ދާއިމީ ހައްލު ގެނެސް ދިނުމުގެ ޕްލޭންތަކާއެކު ވަކާލާތުކޮށްދީ މަސައްކަތްކޮށްދޭ މީހެކެވެ." ޝުއައިބުގެ ސިޓީގައި ވެއެވެ.
އޭނާ ވިދާޅުވި ގޮތުގައި, "މާލެ ރައްޔިތުންގެ ގޯތި ހަރަކާތް" އުފެއްދި އިސް މީހެއްގެ ހައިސިއްޔަތުން, ކޮންމެ ސަރުކާރެއް އޮތަސް މާލޭގެ ގެދޮރުވެރިޔަކުގެ މައްސަލަ ހައްލު ކުރުމަށް ސަރުކާރުތަކަށް ހުށަހަޅުއްވި ކަމަށެވެ. އަދި މާލެ ސަރަހައްދުގެ ތޮއްޖެހުމާއި, ގޮންޖެހުން ހައްލު ކުރުމަށް ވޭތުވެދިޔަ 40 އަހަރު ސަރުކާރުތަކާއި ސިޔާސީ ޕާޓީތަކުގެ ވެރިންނާއެކު މަސައްކަތް ކުރި ކަމަށް ވެސް އޭނާ ވިދާޅުވި އެވެ.
ޝުއައިބު ވިދާޅުވި ގޮތުގައި ގެދޮރުވެރިކަމާއި މާލޭގެ ތޮއްޖެހުމުގެ މައްސަލަތަކުގެ ހައްލަށް ވަކާލާތު ކުރުމުގެ ތަޖުރިބާއާއެކު އޭނާ މޭޔަރު ކަމަށް ކުރިމަތިލަނީ އެ ހައްލުތަކުގެ އަމަލީ މަސައްކަތުގެ ބިންގާ އެޅުމަށެވެ.
މާލެ ސިޓީ ކައުންސިލުގެ ބައި-އިލެކްޝަން އޮންނާނީ އަންނަ އަހަރުގެ ޖެނުއަރީ މަހުގެ 13 ވަނަ ދުވަހު އެވެ.
