އައްޑޫގައި ކުރިއަށްދާ ސިލްސިލާ މާރާމާރީތަކާ ގުޅިގެން އެންމެ ފަހުން ހައްޔަރުކުރި މީހާ ޝަރީއަތް ނިމެންދެން ބަންދު ކުރުމަށް ކޯޓުން އަމުރު ދިނުމާއެކު, އެ މައްސަލައިގައި ބަންދުކުރި މީހުންގެ ޖުމުލަ އަދަދު 11 އަށް އަރައިފި އެވެ.
މާރާމާރީތަކާ ގުޅިގެން ބުރާސްފަތި ދުވަހު ހައްޔަރުކުރީ އުމުރުން 29 އަހަރުގެ ދިވެހި ފިރިހެނެކެވެ. ޝަރީއަތް ނިމެންދެން އޭނާ ބަންދު ކުރުމަށް ހިތަދޫ މެޖިސްޓްރޭޓް ކޯޓުން އަމުރުކުރީ އިއްޔެ ކޯޓަށް ހާޒިރު ކުރުމުންނެވެ.
ދުވަސްތަކަކަށް ފަހު އައްޑޫގައި ގޭންގު މާރާމާރީ އިތުރުވެފައިވާއިރު، މިދިޔަ އާދީއްތަ ދުވަހުން ފެށިގެން ފުލުހުން ކުރިއަށް ގެންދާ އޮޕަރޭޝަނުގައި ހައްޔަރުކުރީ ޖުމްލަ 12 މީހުންނެވެ. އޭގެ ތެރެއިން އެކަކު ބަންދުން ދޫކޮށްލާފައި ވާއިރު, ދެން ތިބި 11 މީހުން ވަނީ ޝަރީއަތް ނިމެންދެން ބަންދުކޮށްފަ އެވެ.
ބަންދުކޮށްފައި ތިބި މީހުންގެ ތެރޭގައި ހިމެނެނީ 18 އަހަރުގެ މީހަކާއި، 19 އަހަރުގެ ދެ މީހުންނާއި، 20 އަހަރުގެ ތިން މީހުންނާއި، 21 އަހަރުގެ މީހަކާއި 23 އަހަރުގެ ތިން މީހުންނެވެ. އަދި މިއަދު ބަންދުކުރި 19 އަހަރުގެ މީހާ އެވެ.
މިދިޔަ ހަފުތާގެ ތެރޭގައި އެ އަތޮޅުގައި ވަނީ މާރާމާރީ ހިންގައި ދެ މީހަކު ވަރަށް ބޮޑަށް ޒަހަމު ކޮށްލައިފަ އެވެ. އޭގެތެރެއިން މިދިޔަ އާދީއްތަ ދުވަހު ޒަހަމުކޮށްލި 20 އަހަރުގެ ޒުވާނާގެ ހާލު ސީރިއަސްވެ، އަންނަނީ މާލެއަށް ގެނެސް އައިޖީއެމްއެޗް ހޮސްޕިޓަލުގައި ފަރުވާ ދެމުންނެވެ.
އައްޑޫގެ ގޭންގު މާރާމާރީތަކާ ގުޅިގެން އެ އަތޮޅުގައި ފުލުހުން ހިންގަމުންދާ އޮޕަރޭޝަންތަކުގެ ތެރެއިން އައްޑޫ ސިޓީ ޕޮލިސް ސްޓޭޝަންތަކާއި ސައުތު ޕޮލިސްގެ ސީރިއަސް ކްރައިމް ސެލް އަދި ސްޕެޝަލިސްޓް އޮޕަރޭޝަންސްގެ ފުލުހުން ގުޅިގެން އަންނަނީ ހާއްސަ އޮޕަރޭޝަނެއް ހިންގަމުންނެވެ.
