ފުލުހުންނަށް ޕްރޮމޯޝަން ދިނުން ހުއްޓުވައި ދިނުމުގެ ވަގުތީ އަމުރަކަށް އެންޓި ކޮރަޕްޝަން ކޮމިޝަން (އޭސީސީ) އިން ސިވިލް ކޯޓުގައި އެދިފައިވާކަން "އަދަދު" އަށް އެނގިއްޖެ އެވެ.
މި ނޫހަށް ލިބިފައިވާ ލިޔެކިޔުންތަކުން އެނގޭ ގޮތުގައި ޕްރޮމޯޝަން ދިނުން މަޑުޖައްސާލަން އޭސީސީން ސިވިލް ކޯޓުގައި އެދުނީ އޮކްޓޯބަރު 22, 2023 ގައި އެކޮމިޝަނުގެ މެމްބަރު ޝަޒްނާ ހާޝިމް ސޮއިކުރައްވައި ފޮނުވި ސިޓީއެއްގެ ޒަރިއްޔާއިންނެވެ. އެއީ ވެރިކަން ބަދަލުވުމުގެ މަރުހަލާގެ ތެރޭގައި ކުއްލިއަކަށް މަތީ ރޭންކުތަކުގެ އޮފިސަރުންނަށް ޕްރޮމޯޝަން ދެމުންދާ ކަމަށް ބުނެ ހުށަހެޅި މައްސަލައަކާ ގުޅިގެންނެވެ.
ޕްރޮމޯޝަން ދިނުމާ ގުޅޭގޮތުން ކޮށްފައިވާ މަސައްކަތްތަކާ ގުޅޭ އެންމެހާ ލިޔެކިޔުންތަކާއި އެކަމުގެ އަމަލުކުރާ އުސޫލު ހޯދުމުގެ އަމުރަކަށް ވެސް އޭސީސީން އެދިފައިވެ އެވެ.
މި މައްސަލައާ ގުޅިގެން އޭސީސީން އެދުނު ގޮތަށް އަމަލުކޮށްފައި ނުވާތީ ފުލުހުންނާ ދެކޮޅަށް ވަގުތީ އަމުރެއް ނެރުމަށް ކޯޓަށް ދިޔުމަށް އޭސީސީން ނިންމީ ނޮވެމްބަރު 23, 2023 ގައި ބޭއްވި އެ ކޮމިޝަނުގެ މަޝްވަރާ ބައްދަލުވުމެއްގަ އެވެ. އެ ބައްދަލުވުމުގެ ރިޔާސަތުގައި އިންނެވީ އެ ކޮމިޝަނުގެ ރައީސް އާދަމް ޝާމިލް އެވެ.
އެ މައްސަލާގައި ފުލުހުން އަމަލުކުރާނެ ގޮތުގެ ލަފަޔަކަށް ޕްރޮސެކިއުޓާ ޖެނެރަލްގެ އަރިހުން ފުލުހުން އެދުމާ ގުޅިގެން ނޮވެމްބަރު 13, ގައި ހުސައިން ޝަމީމް ވަނީ އޭސީސީން ގާނޫނީ އަސާސެއް އެ އެންގުމުގައި ބަޔާންކޮށްފައި ނުވާ ކަމަށް ވިދާޅުވެފަ އެވެ. އަދި, އެކަމަށް ރިއާޔަތްކޮށް އެ އެންގުމަށް ތަބާވުން ލާޒިމު ނޫން ކަމަށް ވެސް ޝަމީމް ލަފާ ދެއްވާފައިވެ އެވެ.
އިންތިހާބާ ދިމާކޮށް ފުލުހުންނަށް ޕްރޮމޯޝަން ދިނުމަށް ނިންމައި އެކަން ހުއްޓުވައިދޭން އޭސީސީން އެދުނު ނަމަވެސް މި ނިމެމުންދާ 2023 ވަނަ އަހަރު ފުލުހުންނަށް ޕްރޮމޯޝަން ދިނުމަށް އެކި ފަހަރު މަތިން ފިނޭންސްގެ ހުއްދައަށް އެދިފައިވާކަން އެނގެ އެވެ. އެކަމާ ގުޅޭގޮތުން ހުރި ހުރިޔާ ލިޔެކިޔުމެއް ވެސް އޭސީސީއަށް ދީފައިވެ އެވެ.
ފިނޭންސްގެ ހުއްދައާއެކު އެކި ފަހަރު މަތިން 920 ފުލުހުންގެ ގްރޭޑް މަތިކޮށް 539 ފުލުހުންގެ ރޭންކް މަތިކޮށް އެ ހިދުމަތުގައި މަސައްކަތްކުރާ 168 އާންމު މުވައްޒަފެއްގެ މަގާމު މިއަހަރުގެ ތެރޭގައި މަތިކޮށްފައިވާކަން ލިޔެކިޔުންތަކުން ސާފުވެ އެވެ.
އޭގެ އިތުރުން, ފުލުހުންނަށް ޕްރޮމޯޝަން ދިނުމަށް އެކުލަވާލާފައިވާ އުސޫލުގެ ދަށުން ކުރިއެރުން ދިނުމަށް ހުށަހެޅުމުގެ ފުރުސަތު އެ ހިދުމަތުގެ އެތެރޭގެ ދެންނެވުމަކުން ތިން ފަހަރެއްގެ މަތިން އާންމުކޮށް ހުޅުވާލި އެވެ. އެންމެފަހުން އެފަދަ ފުރުސަތަކަށް ހުޅުވާލީ އިންތިހާބުގެ ދެ ބުރުގެ ދޭތެރެއިން, ސެޕްޓްމެބަރު 26، ވަނަ ދުވަހު އެވެ.
ކުރިއެރުން ހޯދުމަށް ހުޅުވާލި ފުރުސަތުގައި އެކަމަށް އެދުނު ފުލުހުންނާއި އާންމު މުވައްޒަފުންނަށް ވެސް ކުރިއެރުން ދިނުމަށް ފިނޭންސްގެ ހުއްދަ ލިބުމާ އެކު ނޮވެމްބަރު 14, ގައި 220 ފުލުހުންނަށް ރޭންކުގެ ކުރިއެރުން ދީފައިވެ އެވެ.
އޭސީސީން ސިވިލް ކޯޓުގައި އެދިފައިވާ އަމުރު މިހާތަނަށް ނެރެދީފައިނުވާއިރު އެ ދައުވާއަށް ދައުލަތުގެ ފަރާތުން ލިޔެކިޔުމުން ޖަވާބުދާރީވުމުގެ ފުރުސަތު އިއްޔެއަށް އޮތީ ހަމަވެފަ އެވެ. ޖަވާބުދާރީވުމަށް ބޭނުންވާ ލިޔެކިޔުންތައް ބަންޑާރަ ނައިބުގެ އޮފީހުން ހޯދަން އެދުނީ ޑިސެމްބަރު 5, ގަ އެވެ.
