ޕޮލިސް ކޮލެޖުގެ ވެރިޔަކަށް ހުންނެވި ޗީފް ސްޕްރިންޓެންޑެންޓް އޮފް ޕޮލިސް އަހްމަދު ޝިފާން، ހެޑް އޮފް އޮފީސް އޮފް ކޮމިޝަނަރުގެ މަގާމަށް އައްޔަންކޮށް، އެ މަގާމުގައި ކުރިން ހުންނެވި އެސިސްޓެންޓު ޕޮލިސް ކޮމިޝަނަރު، ޔޫނުސް ސޮބާހް ޕޮލިސް ކޮލެޖުގެ ވެރިޔަކަށް އައްޔަންކޮށްފި އެވެ.
ފުލުހުންގެ އިދާރާއިން ވަނީ މިކަން "އަދަދު" އަށް ކަށަވަރުކޮށްދީފަ އެވެ.
ހެޑް އޮފް އޮފީސް އޮފް ކޮމިޝަނަރު މަގާމުގައި ހުންނަ ބޭފުޅެއްގެ ޒިންމާއަކީ ފުލުހުންގެ ސްޓްރެޓެޖިކް ޕޮލިސީތައް އެކުލަވާލައި ތަންފީޒުކުރުމާއި، ސްޓްރެޓެޖިކް ކޮމިއުނިކޭޝަންގެ ޒިންމާ އަދާކުރުމުގެ އިތުރުން ފުލުހުންގެ އިދާރީ ކަންކަން ވެސް ހިންގުމުގެ އެންމެ އިސް ދައުރެއް އަދާކުރުމެވެ.
އެ މަގާމަށް އަލަށް އައްޔަން ކުރި ޝިފާނަކީ އޮސްޓްރޭލިޔާއިން ތައުލީމު ހާސިލު ކުރެއްވުމުގެ އިތުރުން ދުނިޔޭގެ އެހެން ބައެއް ގައުމުތަކުގެ ޕޮލިސް ކޮލެޖުތަކުން ތަމްރީނުވެފައިވާ ބޭފުޅެކެވެ.
ރައީސް ޔާމީންގެ ވެރިކަމުގައި ޝިފާނު ހުންނެވީ ޑްރަގް އެންފޯސްމެންޓް ޑިޕާޓްމެންޓުގެ ވެރިޔަކަށެވެ. އަދި ފުލުހުންގެ ތަރުޖަމާނުގެ މަގާމުގަ އެވެ.
އައްޑޫ ސިޓީގައި ހުންނަ ޕޮލިސް އެކަޑަމީއަށް ބަދަލުކުރި ޔޫނުސް ސޮޕާހަކީ ޖިނާއީ ކުށުގެ އިލުމުގެ ދާއިރާއިން ކިޔަވައި ވިދާޅުވެފައިވާ ބޭފުޅެކެވެ، އޭނާ 2013 ވަނަ އަހަރު ފުލުހުންގެ ހިދުމަތުން އިސްތިއުފާ ދެއްވުމަށް ފަހުން އަލުން އެ ހިދުމަތާ ގުޅިވަޑައިގަތީ ނިމިގެން ދިޔަ ވެރިކަމުގަ އެވެ.
ސޮބާހު 1996 ވަނަ އަހަރު ގުޅިވަޑައިގަތީ ނެޝަނަލް ސެކިއުރިޓީ ސާވިސް (އެންއެސްއެސް) އާ އެވެ.
