އދ. ދިގުރަށުގައި މަރާލުމަށް ފަހު އެއްލާލާފައި އޮއްވާ ފެނުނު ކުޑަކުއްޖާގެ މަންމަ ހައްޔަރު ކޮށްފައިވާކަމަށް ބުނީ އޮޅުމަކުން ކަމަށް ފުލުހުން ބުނެފި އެވެ.
މަރާލުމަށް ފަހު ކޮތަޅަކަށް ލައި އެ ރަށު ކުނި ގޮނޑަށް އެއްލާލާފައި އޮއްވާ ފެނުނު ކުޑަކުއްޖާގެ މަންމަ ވެލާނާ އިންޓަނޭޝަނަލް އެއާޕޯޓު (ވީއައިއޭ) ގައި ހުއްޓާ ހައްޔަރުކޮށްފައިވާ ކަމަށް ފުލުހުން ބުނީ މީގެ ގާތްގަނޑަކަށް ގަޑިއިރެއް ކުރިންނެވެ.
އެހެންނަމަވެސް, އޭގެ ވަގުތުކޮޅެއް ފަހުން ފޯނު ކޯލެއް މެދުވެރުކޮށް ފުލުހުން ވަނީ އެ މީހާ ހައްޔަރު ކުރެވުނު ކަމަށް ބުނެވުނީ އޮޅުމަކުން ކަމަށް ބުނެފަ އެވެ. އަދި, އެ މީހާ ހައްޔަރު ކުރުމަށް މަސައްކަތް ކުރަމުންދާ ކަމަށް ވެސް ފުލުހުން ބުންޏެވެ.
އެ މައްސަލައާ ގުޅިގެން ހައްޔަރު ކުރި މީހާއަކީ ބިދޭސީ އަންހެނެއް ކަމަށް ފުލުހުންގެ މީޑިއާ އޮފިޝަލަކު "އަދަދު"އަށް އޭރު ވިދާޅުވެފައިވެ އެވެ.
މިއަދު ހެނދުނު އެ ރަށު ކުނި ގޮނޑުން ކުއްޖާ ފެނުނު އިރު ވެސް އޮތީ މަރުވެފަ އެވެ.
ފުލުހުން ހިއްސާކުރި މެސެޖެއްގައިވާ ގޮތުން އެކަމާ ގުޅޭ މައުލޫމާތު އެ އިދާރާއަށް ލިބިފައި ވަނީ މިއަދު ހެނދުނު 09:20 ގަ އެވެ.
ދިގުރަށު ކައުންސިލުގެ ރައީސް އިބްރާހިމް އުސްމާން "އަދަދު" ނޫހަށް މައުލޫމާތު ދެއްވި ގޮތުގައި އެ ކުއްޖާގެ ހަށިގަނޑު ފެނުނީ ވޭސްޓް މެނޭޖްމަންޓު ސެންޓަރުގައި މަސައްކަތްކުރާ ބިދޭސީއަކަށެވެ. އަދި, މިހާރު އެތަން ބަންދުކޮށްގެން ފުލުހުން ތަހުގީގު ފަށާފައިވާ ކަމަށް ވެސް އޭނާ މައުލޫމާތު ދިނެވެ.
އެ ރަށުގެ ކުނިގޮނޑު ހުންނަނީ މީހުން އުޅޭ ސަރަހައްދާ ވަރަށް ދުރުގަ އެވެ.
