ލަންޑަން (ޑިސެމްބަރު 3) - އިނގިރޭސި ޕްރިމިއާ ލީގުގައި ވުލްވްސް އަތުން 2-1 އިން މޮޅުވެ، އާސެނަލުން އެއް ވަނަ މަގާމު ދެމެހެއްޓިއިރު، ނިއުކާސަލް ޔުނައިޓެޑުން ވަނީ އަމިއްލަ ދަނޑުގައި ކުޅެ، 1-0 އިން މެންޗެސްޓާ ޔުނައިޓެޑް ބަލިކޮށްފި އެވެ.
އާސެނަލް އެއް ވަނައިގައި އޮތީ 14 މެޗުން 33 ޕޮއިންޓާ އެކު އެވެ. ދެ ވަނައިގައި އޮތް މެންޗެސްޓާ ސިޓީ އަށް 13 މެޗުން ލިބިފައިވަނީ 29 ޕޮއިންޓެވެ. ތިން ވަނައިގައި އޮތް ލިވަޕޫލާއި ހަތަރެއްގައި އޮތް އެސްޓަން ވިލާ އަށް 13 މެޗުން ވަނީ 28 ޕޮއިންޓް ލިބިފަ އެވެ.
އެމިރޭޓްސް ސްޓޭޑިއަމްގައި އާސެނަލުން އަމިއްލަ ސަޕޯޓަރުން ކުރިމަތީގައި ކުޅުނު ރޭގެ މެޗުގެ 13 މިނިޓް ތެރޭ އެ ޓީމުން ދެ ގޯލު ޖެހި އެވެ. މި ލަނޑުތައް ޖެހީ ބުކާޔޯ ސަކާ އާއި މާޓިން އޮޑެގާޑް އެވެ. ވުލްވްސް އިން ދެ ވަނަ ހާފުގައި ކުޅުން ރަނގަޅުކޮށް އާސެނަލަށް ޕްރެޝަރު ކޮށްލި އެވެ. އެ ގޮތުން، ވުލްވްސްގެ މަތެއުސް ކޫންޏާ ވަނީ 86 ވަނަ މިނިޓްގައި ގޯލެއް ޖަަހައިފަ އެވެ. އެކަމަކު، އިތުރު ގޯލެއް ޖަހަން ވުލްވްސް އިން ކުރި މަސައްކަތް އާސެނަލުން ވަނީ ކާމިޔާބުވިޔަ ނުދީފަ އެވެ.
ނިއުކާސަލް އިން ރޭ ޔުނައިޓެޑްގެ މައްޗަށް ކުރިހޯދި މެޗުގެ ހަމައެކަނި ގޯލު ފެނިގެންދިޔައީ ދެ ވަނަ ހާފުގަ އެވެ. މެޗުގެ 55 ވަނަ މިނިޓްގައި ކިއެރަން ޓްރިޕިއޭ ދިން ބޯޅައަކުން މި ލަނޑު ޖެހީ ފަހަކަށް އައިސް ރަނގަޅު ފޯމެއްގައި ކުޅެމުން އަންނަ އެންތަނީ ގޯޑަން އެވެ. ފުރަތަމަ ހާފުގައި ޓްރިޕިއޭ ވެސް ގޯލެއް ޖެހުމާ ގާތަށް ޖެހިލި އެވެ.
މަހެއްހާ ދުވަސް ތެރޭ ޔުނައިޓެޑް އަތުން ހޯދި ދެ ވަނަ މޮޅާ އެކު ނިއުކާސަލް ވަނީ ލީގުގެ ފަސް ވަނަ އަށް އަރައިފަ އެވެ. އެއީ 14 މެޗުން 26 ޕޮއިންޓް ހޯދައިގެންނެވެ. ޔުނައިޓެޑް ހަތް ވަނައިގައި އޮތީ 14 މެޗުން 24 ޕޮއިންޓާ އެކު އެވެ.
ލީގުގައި ރޭ ކުޅުނު އެހެން މެޗުތަކުގެ ނަތީޖާ އަށް ބަލާއިރު، ބްރެންޓްފޯޑުން 3-1 އިން ލޫޓަން ބަލިކުރިއިރު، ބާންލީން ވަނީ 5-0 އިން ޝެފީލްޑް ޔުނައިޓެޑް އަތުން މޮޅުވެފަ އެވެ. އަދި އެވަޓަން އިން ވަނީ 1-0 އިން ނޮޓިންހަމް ފޮރެސްޓް ދަނޑުގައި މޮޅުވެފަ އެވެ.
