މަޖިލީހުގެ ކޮމެޓީން މިއަދު ފާސްކުރި ގޮތަށް، ރޯދަމަހުގެ ފަހަށް ރައްޔިތުންގެ މަޖިލީހުގެ އިންތިހާބު ލަސްކޮށްފި ނަމަ ދެ ވަނަ ބުރަކަށް ދާންޖެހޭ ހާލަތުގައި އެކަން ކުރުމުގެ ފުރުސަތެއް ނޯންނާނެ ކަމަށް އިލެކްޝަންސް ކޮމިޝަނުގެ ނައިބު ރައީސް އިސްމާއިލް ހަބީބް ވިދާޅުވެއްޖެ އެވެ.
މަޖިލީހުގެ ކޮމެޓީން މިއަދު ނިންމި ނިންމުމަށް ފުރިހަމައަށް އިހުތިރާމު ކުރައްވާކަން ފާހަގަ ކުރައްވައި ހަބީބު ވިދާޅުވީ ރޯދަމަހުގެ ފަހުން އިންތިހާބު ބާއްވާނަމަ، ދެވަނަ ބުރަކަށް ދާންޖެހޭ ހާލަތުގައި އެކަން ކުރުމަށް ގާނޫނު ތަން ނުދޭ ކަމަށެވެ.
ނަމަވެސް މަޖިލީހުން ދެއްވި ލަފަޔާ މެދު އިލެކްޝަންސް ކޮމިޝަނުން އަދި ގޮތެއް ނިންމާފައި ނުވާ ކަމަށާއި ގޮތެއް ނިންމާނީ ކޮމިޝަނުން ބަލަންޖެހޭ ކަންކަން ބަލައި އެކަމާ ގުޅޭގޮތުން މަޝްވަރާ ކުރުމަށްފަހު ކަމަށް ހަބީބު ވިދާޅުވި އެވެ.
ގާނޫނުގައި ބުނާ ގޮތުން މި ހިނގާ މަޖިލީހުގެ ދައުރު ހަމަވުމުގެ 30 ދުވަސް ކުރިން މަޖިލިސް އިންތިހާބުގެ ހުރިހާ ކަންތައްތަކެއް ކޮށް ނިންމަން ޖެހެ އެވެ. ގާނޫނުގައި ބުނާ 30 ދުވަސް ހަމަވާ ތާރީހަކީ އޭޕްރިލް 28 އެވެ. މި ފެށޭ އަހަރުގެ ރޯދަ މަސް ނިމޭނެ ކަމަށް ފަލަކީ ހިސާބުތަކުން ދައްކާ ދުވަހަކީ އޭޕްރިލް 9 ނުވަތަ އޭޕްރިލް 10 އެކެވެ.
އެހެންކަމުން ދެވަނަ ބުރަކަށް ދާން ޖެހިއްޖެ ނަމަ، ދެވަނަ ބުރުގެ ކުރިން ކެމްޕޭނު ކުރުމަށާއި އެހެނިހެން ހުރިހާ ކަމަކަށް ދޭންޖެހޭ 15 ދުވަހުގެ މުއްދަތު ދިނުމަށްފަހު ގާނޫނުގައި ބުނާ 30 ދުވަހުގެ ކުރިން އިންތިހާބު ހުރިހާ ކަންތައްތަކެއް ނިންމުމުގެ ފުރުސަތެއް ނޯންނާނެ އެވެ.
ހަބީބް ވިދާޅުވީ މިހާރު އޮތް ގޮތުން ނަމަ، އެންމެ ކުރިން ބޭއްވޭނެ ތާރީހުގައި އިންތިހާބު ބޭއްވުމުގެ ފުރުސަތު ވެސް ފަހިވެފައިވާ ކަމަށެވެ. އިލެކްޝަންސް ކޮމިޝަނުން ކުރިން ކަންބޮޑުވުން ފާޅު ކުރީ އެ ތާރީހު އޯލެވެލް އިމްތިހާނަށް ތައްޔާރުވުމުގެ ގޮތުން ސްކޫލްތަކުން ނަގާ މޮކް އެގްޒާމްއާ ދިމާވާތީ އިންތިހާބު ބާއްވާ މަރުކަޒުތައް ހަމަޖެއްސުމުގައި ދަތިތަކެއް ހުންނާނެތީ އެވެ.
ނަމަވެސް މޮކް އެގްޒާމް ރޯދައިގެ ކުރިއަށް ބަދަލު ކުރުމަށް އެޑިއުކޭޝަން މިނިސްޓަރީން ނިންމާފައި ވާތީ މާޗު 18، 2024 ގައި މަޖިލިސް އިންތިހާބުގެ ފުރަތަމަ ބުރު ބޭއްވުމުގެ ފުރުސަތު މިހާރު ފަހިވެފައި ވާކަމަށް ހަބީބު ވިދާޅުވި އެވެ. ނަމަވެސް އެ ހާލަތުގައި، ދެ ވަނަ ބުރަކަށް ދާން ޖެހިއްޖެ ނަމަ، ދެ ވަނަ ބުރުގެ އިންތިހާބު ބޭއްވޭނެ ތާރީހު ދިމާވަނީ ރޯދަ މަހުގެ ފަހު ދިހައެއްގެ ފުރަތަމަ ދުވަހަށް ވާތީ، ވޯޓު ލާން ދާ މީހުންގެ އަދަދު މަދުވެދާނެތީ އެކަމުގެ ކަންބޮޑުވުން ހަބީބު ފާހަގަ ކުރެއްވި އެވެ.
"[ދެވަނަ ބުރަކަށް ގޮސްފި ނަމަ] ބޭއްވޭނެ ދުވަހަކީ ރަމަޟާން މަހުގެ 20 ވަނަ ދުވަސް، އެއީ ފަހު ދިހައެއްގެ ފުރަތަމަ ދުވަަސް ކަމަށްވުމުން ވޯޓުލާ މީހުންގެ އަދަދު މަދުވެދާނެތީ އަޅުގަނޑުމެން ވަރަށް ބޮޑަށް ކަންބޮޑުވަން،" ހަބީބު ވިދާޅުވި އެވެ.
ރައްޔިތުންގެ މަޖިލީހުގެ 20 ވަނަ ދައުރަށް މެންބަރުން އިންތިހާބު ކުރަން ބާއްވަންޖެހޭ އިންތިހާބު ރޯދައިގެ ކުރިން ބޭއްވޭނެ ގޮތެއް އޮތްތާ ބަލަން އިލެކްޝަންސް ކޮމިޝަނުން މަޖިލީހުގެ މިނިވަން މުއައްސަސާތަކާ ބެހޭ ކޮމިޓީއަށް ހުށަހެޅީ ރޯދައިގެ ތެރޭގައި ނުވަތަ ރޯދައިގެ ފަހުން އިންތިހާބު ބާއްވާނަމަ، ހުރި ދަތިތަކެއް ފާހަގަކޮށެވެ.
ރައްޔިތުންގެ މަޖިލިސް އިންތިހާބުގެ ގާނޫނުގައިވާ ގޮތުން މަޖިލީހުގެ ދައުރު ހަމަވުމަށް 120 ދުވަސް ހަމަވާ ދުވަހުން ފެށިގެން 10 ދުވަހުގެ ތެރޭގައި މަޖިލިސް އިންތިހާބަށް ކުރިމަތިލާން ބޭނުންވާ މީހުންނަށް އެ ފުރުސަތު ހުޅުވާލައި އެކަން ކޮމިޝަނުން އަންގަންޖެހެ އެވެ. އެބުނާ 120 ދުވަސް ހަމަވާނީ އަންނަ ޖެނުއަރީ 28، 2024 ގަ އެވެ.
ހިނގަމުންދާ މަޖިލީހުގެ ދައުރު ހަމަވުމުގެ 30 ދުވަސް ކުރިން މަޖިލިސް އިންތިހާބު ބާއްވައި އިންތިހާބާ ގުޅޭ ހުރިހާ ކަމެއް ނިންމަންޖެހޭނެ ކަމަށް ވެސް ގާނޫނުގައި ބުނެފައިވެ އެވެ. އެ މުއްދަތަށް ބަލާނަމަ އިންތިހާބާ ގުޅޭ އެންމެހާ ކަންތައްތައް ނިންމަންޖެހޭ އެންމެ ފަހު ތާރީހަކީ އޭޕްރީލް 28، 2024 ގަ އެވެ.
ހަބީބް އޭރު ފާހަގަކުރެއްވި ގޮތުގައި ގާނޫނުގައި ބަޔާންކުރާ މުއްދަތުތަކަށް ބަލައިގެން އިންތިހާބަށް ތައްޔާރުވާ ނަމަ އިންތިހާބަށް ކުރިމަތިލުމަށް ހުޅުވާލެވޭނީ ޖެނުއަރީ 30 ގަ އެވެ. އަދި ކުރިމަތިލާ މީހުންނަށް އެކަމަށް 14 ދުވަހުގެ މުއްދަތެއް ދީނުމަށްފަހު ކެންޑިޑޭޓު ނަމްބަރު ތަރުތީބު ކުރުމުގެ ކަންތައް ކުރިއަށް ގެންގޮސް ލިސްޓު ތަރުތީބުކޮށް އިއުލާނުކުރެވޭނީ ފެބްރުއަރީ 17، ގައި ކަމަށް ހަބީބު ވިދާޅުވެފައިވެ އެވެ.
އޭނާ ވިދާޅުވި ގޮތުގައި މުއްދަތުން ފެށިގެން އިންތިހާބާ ދޭތެރޭ 30 ދުވަހުގެ މުއްދަތެއް ދޭން ޖެހޭ ކަމަށް ގާނޫނުގައި ބުނެފައިވާތީ 30 ދުވަސް ދިނުމުން އިންތިހާބު އެންމެ އަވަހަށް ވެސް ބޭއްވޭނެ ތާރީހަކީ މާޗް 18، 2024 ގަ އެވެ. އެއީ ރޯދަ މަހުގެ ނުވަ ވަނަ ދުވަހެވެ.
