އެކްޓިން ޕޮލިސް ކޮމިޝަނަރުގެ މަގާމުގައި ހުންނެވުމަށްފަހު ރިޓަޔާ ކުރެއްވި ކުރީގެ ޑެޕިއުޓީ ކޮމިޝަނާ އޮފް ޕޮލިސް އަބްދުލް މަންނާނު ޔޫސުފްއާ އަނެއްކާ ވެސް އެ މަގާމު ހަވާލުކޮށްފި އެވެ.
"އަދަދު" ނޫހަށް އެނގިފައިވާ ގޮތުގައި ނޮވެމްބަރު 19, ގައި އޭނާ ރިޓަޔާ ކުރައްވަން ހުށަހެޅުއްވި އެވެ. އެހެން ނަމަވެސް, އާ ކޮމިޝަނަރެއް އައްޔަނު ކުރުމާ ހަމައަށް އެ މަގާމުގައި ދެމިހުންނެވުމަށް ސަރުކާރުން އެދިވަޑައިގަތުމާ ގުޅިގެން މަންނާނު ވަނީ އަލުން އަނބުރާ މިއަދުން ފެށިގެން އެ މަގާމާ ހަވާލުވެވަޑައިގަނެފަ އެވެ.
މިދިޔަ ސަރުކާރުގައި ކޮމިޝަނަރަކަށް ހުންނެވި މުހައްމަދު ހަމީދު ނޮވެމްބަރު 15, ގައި އެ މަގާމުން ރިޓަޔާ ކުރެއްވުމާއެކު މަންނާނު އެކްޓިން ކޮމިޝަނަރަކަށް ހަމަޖެއްސީ ނޮވެމްބަރު 16, ގަ އެވެ. އޭގެ ތިން ދުވަސް ފަހުން އޭނާ ރިޓަޔާމަންޓު ހުށަހެޅުއްވި އެވެ.
ޕޮލިސް ބޯޑުގެ ނިންމުމެއްގެ ދަށުން ފުލުހުންގެ އިދާރާއިން ވަކިކޮށްފައި ހުރި، ކުރީގެ އެސިސްޓަންޓް ކޮމިޝަނަރު އަހުމަދު މުހައްމަދު (ޓޫފޯ) ޕޮލިސް ކޮމިޝަނަރުގެ މަގާމަށް އައްޔަނު ކުރަން މަސައްކަތް ކުރަމުންދާކަން މި ނޫހަށް ވަނީ އެނގިފަ އެވެ.
އިންޑިއަން ނޭޝަނަލް ޕޮލިސް އެކަޑަމީއިން ތައުލީމް ހާސިލް ކުރެއްވުމަށް ފަހު މަންނާނު ވަނީ އިނގިރޭސި ވިލާތުން މާސްޓާސް ޑިގްރީ ހާސިލް ކުރައްވައިފަ އެވެ. މަންނާން ފުލުހުންގެ ހިދުމަތާ ގުޅިވަޑައިގަތީ މީގެ 29 އަހަރު ކުރިންނެވެ.
އޭނާއަކީ ޗައިލްޑް އެންޑް ފެމިލީ ޕްރޮޓެކްޝަން އަދި ޔޫތު ކްރިމިނަލް ޖަސްޓިސްގެ ދާއިރާގައި މިވަގުތު އެންމެ ތަޖުރިބާކާރު އެއް އިންވެސްޓިގޭޓަރެވެ.
ޕޮލިސް ކޮމިޝަނަރަކަށް ބޭފުޅަކު ދެން އައްޔަން ކުރައްވާނީ އާ ރައީސް ޑރ. މުހައްމަދު މުއިއްޒެވެ. ޕޮލިސް ކޮމިޝަނަރުގެ މަގާމު ހުސްވާތާ 45 ދުވަހުގެ ތެރޭގައި އާ ކޮމިޝަނަރަކު އައްޔަނުކުރަން ޖެހޭއިރު އެ މަގާމަށް ކުރިމަތިލުމުގެ ފުރުސަތު ވެސް އާންމުކޮށް ހުޅުވާލަން ޖެހެ އެވެ.
