ފުލުހުންގެ ކްރިމިނަލް އިންވެސްޓިގޭޝަންގެ އިސްވެރިޔަކަށް ހުންނެވި އެސިސްޓަންޓު ކޮމިޝަނާ އޮފް ޕޮލިސް މުހައްމަދު ރިޔާޒު އެ މަގާމުން ދުރުކޮށް އިންޓެލިޖެންސްގެ ވެރިޔަކަށް ސުޕްރިޓެންޑެންޓު އޮފް ޕޮލިސް އިސްމާއީލް ޝަމީމް ހަމަޖައްސައިފި އެވެ.
"އަދަދު" ނޫހަށް ޔަގީން ކުރެވިފައިވާ ގޮތުގައި އިންޓެލިޖެންސްގެ ވެރިޔަކަށް ހުންނެވި ސުޕްރިޓެންޑެންޓު އޮފް ޕޮލިސް ފަރީދު އިސްމާއީލްގެ ބަދަލުގައި ވަގުތީގޮތުން ޝަމީމް ވަނީ އެ މަގާމަށް ހަމަޖައްސާފަ އެވެ. އޭގެ ބަދަލުގައި ފަރީދުއާ ހަވާލުކޮށްފައި ވަނީ ކޮން މަސްއޫލިއްޔަތުތަކެއްކަން މިހާތަނަށް އެނގިފައި ނުވެ އެވެ.
އޭސީޕީ ރިޔާޒުގެ މަގާމު ބަދަލު ކުރި ނަމަވެސް އޭނާއަށް އެހެން މަސްއޫލިއްޔަތުތަކެއް މިހާތަނަށް ހަވާލުކޮށްފައި ނުވާކަން ވެސް ވަނީ ޔަގީން ކުރެވިފަ އެވެ. ކްރިމިނަލް އިންވެސްޓިގޭޝަންގެ ވެރިޔަކަށް ވަގުތީގޮތުން ޗީފް ސުޕްރިޓެންޑެންޓު އަހުމަދު ނާފިޒު ވަނީ ހަމަޖައްސާފަ އެވެ.
އަދި, ސެކިއުރިޓީ އިންޓެލިޖެންސްގެ ވެރިޔަކަށް ވެސް އިންސްޕެކްޓަރު އަތީގުއް ރަހުމާން ހަމަޖައްސާފައިވާކަން ވެސް "އަދަދު" ނޫހަށް ވަނީ ޔަގީން ކުރެވިފަ އެވެ.
ރިޔާޒު އެސިސްޓަންޓު ކޮމިޝަނަރަކަށް އައްޔަނުކުރީ މާޗު 6, 2019 ގަ އެވެ. އެއީ ސެޕްޓެމްބަރު, 2017 ގައި އޭނާ ސުލޫކީ މައްސަލައެއްގައި ވަޒީފާއިން ވަކިކުރުމަށް ފަހު ސިވިލް ކޯޓުން ޑިސެމްބަރު, 2018 ގައި އޭނާއާ އެއްކޮޅަށް ކުރި ހުކުމާ އެކު ފުލުހުންގެ ވަޒީފާއާ އަލުން ގުޅިވަޑައިގެން ހުންނަވަނިކޮށެވެ.
މިދިޔަ ފަސް އަހަރުގެ ތެރޭގައި ރާއްޖޭގައި ހިންގި ބޮޑެތި ކުށްތަކުގެ ތަހުގީގުތަކުގައި ރިޔާޒު އިސް ދައުރެއް އަދާކުރައްވާފައިވެ އެވެ.
