ރޯޑް ޑިވެލޮޕްމެންޓް ކޯޕަރޭޝަން (އާރުޑީސީ)ގެ އޮފީހަށް އިއްޔެ ފުލުހުން ވަދެ ގާތްގަނޑަކަށް އެ އޮފީސް 12 ގަޑިއިރު ވަންދެން ބަލައިފާސްކުރުމަށް ފަހު ގިނަ އަދަދެއްގެ ލިޔެކިޔުން ތަހުގީގުގެ ބޭނުމަށް ގެންގޮސްފި އެވެ.
އަދަދު ނޫހަށް އެނގިފައިވާ ގޮތުގައި ކޯޓު އަމުރެއްގެ ދަށުން ފުލުހުންނާއި އެންޓި ކޮރަޕްޝަން ކޮމިޝަން (އޭސީސީ) އިއްޔެ ހެނދުނު 10:30 ހާއިރު އާރުޑީސީ އަށް ވަނީ، އެ ކުންފުނީގެ ބައެއް މުވައްޒަފުންގެ އަމިއްލަ އެކައުންޓުތަކަށް ޖަމާކުރި "ޕެޓީ ކޭޝް"ގެ މައްސަލައިގެ ތަހުގީގަށެވެ.
އެ އޮފީހުގެ މުވައްޒަފަކު ބުނި ގޮތުގައި ފުލުހުން ވަދެ ކޮންމެ ޑިޕާޓްމެންޓެއްގައި އެންމެ މުވައްޒަފަކު ބެހެއްޓުމަށް ފަހު އެހެން މުވައްޒަފުން ނެރުނެ އެވެ. އެއަށް ފަހު ބަލައިފާސްކުރަން ދެން އޮފީހަށް ވަދެވުނީ ހުއްދަ ދޭ ބަޔަކަށެވެ.
އާރުޑީސީގެ އޮފީސް ބަލައިފާސްކުރުމަށް ފަހު ފުލުހުން ނުކުތީ ރޭ 11:00 ހާއިރު އެވެ. ފުލުހުންގެ ވެހިކަލަކަށް އާރުޑީސީގެ ގިނަ ދަދަދެއްގެ ފައިލްތަކާއި ލިޔެކިޔުން ބަރުކޮށްގެން ގެންދިޔަ އެވެ.
"ވަރަށް ގިނަ އަދަދެއްގެ ލިޔުންތައް ގެންދިޔަ،" އެ ކުންފުނީގެ މުވައްޒަފަކު ބުންޏެވެ.
"އޮފީހުން ވަރަށް ބޮޑަށް އެއްބާރުލުން ދިން [ތަހުގީގަށް]."
ފުލުހުންނާއި އޭސީސީން ބަލަމުން ދަނީ އާރްޑީސީގެ ބީއެމްއެލް އެކައުންޓުން، އެކި ފަހަރު މަތިން ޖުމުލަ 13 މިލިއަނަށްވުރެ ގިނަ ރުފިޔާ ބައެއް މުވައްޒަފުންގެ އަމިއްލަ އެކައުންޓުތަކަށް ޖަމާކުރި މައްސަލައިގަ އެވެ.
އެ ފައިސާ ޖަމާކުރީ ކުންފުނީގެ މެނޭޖިން ޑިރެކްޓަރު މޫސާ އަލި މަނިކާއި ޗީފް ފައިނޭންޝަލް އޮފިސަރު (ސީއެފްއޯ) ޔާސިރު ހަސަންގެ ބޭންކު އެކައުންޓަށް ކަމަށް ބުނެ މީޑިއާތަކުން ކުރިން ރިޕޯޓު ކުރިއެވެ. ނަމަވެސް އާރްޑީސީން ވަނީ އެކަން ދޮގުކޮށްފަ އެވެ. އަދި އެގޮތަށް ހަބަރު ފެތުރި ބައެއް މީޑިއާތަކާ ދެކޮޅަށް ސިވިލް ކޯޓަށް ވެސް މައްސަލަ ހުށަހެޅި އެވެ.
މި މައްސަލައާ ގުޅިގެން އާރްޑީސީގެ މެނޭޖިން ޑިރެކްޓަރު މޫސާ އަލިމަނިކު (މޫކޭ) އޭރު ވިދާޅުވެފައި ވަނީ އެ ފައިސާ އަކީ ޕެޓީކޭޝްގެ ގޮތުގައި ކުންފުނީގެ ސައިޓުތަކަށް ފޮނުވާ ފައިސާ ކަމަށެވެ.
"އަދަދު"ގެ 'އެތެރެފުށް' ޕްރޮގްރާމްގައި ކުރި ސުވާލަކަށް ޖަވާބުދެއްވަމުން މޫސާ އަލިމަނިކު ވިދާޅުވީ އެކުންފުނީގެ މުވައްޒަފުން ތިރީހަކަށް ސަައިޓެއްގައި މަސައްކަތް ކުރަމުން އަންނަ ކަމަށާއި އެއިން ކޮންމެ ސައިޓަކަށް ޕެޓީކޭޝްގެ ގޮތުގައި މަހަކު 10،000.ރ ޖަމާކުރާ ކަމަށެވެ.
ޕެޓީކޭޝްގެ ގޮތުގައި ދޫކުރާ އެ ފައިސާ ޖަމާކުރަނީ މަސައްކަތު ސައިޓްތަކުގައި ތިބޭ މުވައްޒަފުންގެ އެކައުންޓަށް ކަަމަށް ވެސް އޭނާ ވިދާޅުވި އެވެ. ބޮޑު އަދަދެއްގެ ގޮތުގައި ފެނިގެން އުޅެނީ މިދިޔަ ގާތްގަނޑަކަށް ހަތަރު އަހަރުގެ ތެރޭގައި ޖަމާކުރި ފައިސާ ކަމަށް ވެސް އޭނާ ސިފަކުރެއްވި އެވެ.
މި މައްސަލައިގައި ކުރަމުންދާ ތަހުގީގާއި ގުޅޭ ގޮތުން ފުލުހުން ބަހެއް ނުބުނެ އެވެ.
