އަންނަ އަހަރު ބާއްވާ ރައްޔިތުންގެ މަޖިލިސް އިންތިހާބުގައި އިތުރު ދާއިރާތަކަކަށް ބަދަލު ގެނައުމަށް އިލެކްޝަން ކޮމިޝަނުން ނިންމައިފި އެވެ.
އިލެކްޝަން ކޮމިޝަނުގެ ނައިބުރައީސް އިސްމާއިލް ހަބީބް މިރޭ ކުރެއްވި ޓްވީޓެއްގައި ވިދާޅުވީ، އިންތިހާބީ ދާއިރާތަކުގެ އާބާދީ ކަނޑައަޅާފައިވާގޮތުގެ ވަގުތީ ރިޕޯޓަށް ލިބިފައިވާ ޝަކުވާތަކާއި ހިޔާލުތައް އިލެކްޝަން ކޮމިޝަނުން ދިރާސާކުރުމަށް ފަހު ބައެއް ބަދަލުތައް ގެނައުމަށް ނިންމާފައިވާ ކަމަށެވެ.
އެގޮތުން މާލޭ މުނިސިޕަލްޓީގެ ދަފްތަރުގައި ހިމެނޭ މީހުންގެ ތެރެއިން، ވިލިމާލެ ދާއިރާގައި ރަޖިސްޓަރީ ވެފައިވާ މީހުން ފިޔަވައި އެހެން ހުރިހާ އެންމެން ހުޅުމާލެ މެދު ދާއިރާ އާއި ހުޅުމާލެ އުތުރު ދާއިރާއަށް ބަދަލުކުރުމަށް ހަމަޖެހިފައިވާ ކަމަށެވެ. ދަފްތަރު ރަޖިސްޓްރީގައި ހިމެނޭ މާލޭ ދާއިރާތައް (މާފަންނު، މައްޗަންގޮޅި) ގެ އާބާދީ ހަމަހަމަކުރުމަށް ޗާޓަށް ބަދަލު ގެންނާނެ ކަމަށްވެއެވެ.
ހައްދުންމަތީ ގަމު ދާއިރާއިން މުންޑޫ ވަކިކޮށް، އިސްދޫ ދާއިރާއަށް ބަދަލުކުރުމަށް ވެސް އިލެކްޝަން ކޮމިޝަނުން ނިންމާފައިވެ އެވެ.
ހުވަދުއަތޮޅު އުތުރުބުރީގެ ތިން ދާއިރާ އަކަށް އާބާދީ ހަމަހަމަކުރުމަށް ބަދަލުގެނައުމަށް ވެސް ނިންމާފައިވެ އެވެ.
ހުވަދު އަތޮޅު އުތުރުބުރީ ދާއިރާތައް ބެހިގެން ދާނެ ގޮތް:
ވިލިނގިލި ދާއިރާ: ވިލިނގިލި
- ދާންދޫ ދާއިރާ: ނިލަންދޫ، ދާންދޫ، ކޮނޑޭ،
- ގެމަނަފުށި ދާއިރާ: ގެމަނަފުށި، ކަނޑުހުޅުދޫ، ދެއްވަދޫ،
- ކޮލަމާފުށި ދާއިރާ: ކޮލަމާފުށި، މާމެންދޫ މިގޮތަށް.
ކުރިއަށް އޮތް މަޖިލީހުގެ އިންތިހާބީ ދާއިރާތަކުގެ ގޮތުގައި އިލެކްޝަނުން ވަނީ 93 ދާއިރާ ހިމަނައިފަ އެވެ. މި ހިނގާ ދައުރުގައި މަޖިލީހުގައި ތިއްބަވަނީ 87 މެންބަރުންނެވެ.
ވިހި ވަނަ މަޖިލީހުގެ އިންތިހާބީ ދާއިރާތަކުގެ ވަގުތީ ރިޕޯޓަށް ޝަކުވާ ހުށަހަޅަން ހުޅުވާލި ފުރުސަތުގައި 65 ޝަކުވާ ހުށަޅާފައިވެ އެވެ. އެންމެ ގިނައިން ޝަކުވާ ހުށަހަޅާފައި ވަނީ ދާއިރާ ކަނޑައެޅުމުގައި އެންމެ ބޮޑު ބަދަލެއް ގެނެސްފައިވާ އައްޑޫސިޓީ ފޭދޫ އިތުރު ދާއިރާއިންނެވެ. އެ ދާއިރާއިން އެކަނި 44 ޝަކުވާ ހުށަހެޅިއިރު، އައްޑޫގެ އެހެން ދާއިރާތަކުން ހަ ޝަކުވާއެއް ހުށަހަޅާފައިވެ އެވެ.
